ଆଧାର ସହ ପାନ୍ ଲିଙ୍କ୍ କରିନାହାନ୍ତି କି ? ଗଣିବାକୁ ପଡିପାରେ ୧୦ ହଜାର ଟଙ୍କାର ଜରିମାନା? ଜାଣନ୍ତୁ ଆଧାର-ପାନ୍ ଲିଙ୍କର ପୂରା ପ୍ରକ୍ରିୟା ।
କନକ ବ୍ୟୁରୋ : ପାନକାର୍ଡଧାରୀ ଧ୍ୟାନ ଦିଅନ୍ତୁ । ଯଦି ଆପଣଙ୍କ ପାଖରେ ପାନକାର୍ଡ ଅଛି କିନ୍ତୁ ଏହାକୁ ଆପଣ ଆଧାରକାର୍ଡ ସହ ଲିଙ୍କ୍ କରି ନାହାନ୍ତି ତେବେ ବଡ ସମସ୍ୟାରେ ପଡିପାରନ୍ତି । କାରଣ ଆଧାର-ପାନକାର୍ଡ ଲିଙ୍କ୍ କରିବା ପାଇଁ ଆଉ ହାତରେ ମାତ୍ର ୨୭ ଦିନ ରହିଛି । ତେଣୁ ଏହି ଡେଡଲାଇନ ଭିତରେ ପାନ୍ ସହ ଆଧାର ଲିଙ୍କ୍ କରିବାକୁ କୁହାଯାଇଛି । ଏହାପରେ ମଧ୍ୟ ଯଦି କୌଣସି ପାନକାର୍ଡଧାରୀ ଆଧାର ସହ ଲିଙ୍କ୍ ନ କରନ୍ତି ତେବେ ପାନକାର୍ଡ ସମ୍ପୂର୍ଣ୍ଣ ରୂପେ ନିଷ୍କ୍ରିୟ ହୋଇଯିବ ।
Kanak News is now on WhatsApp
Join and get latest news updates delivered to you via WhatsApp
ତେବେ ଏହି ନିଷ୍କ୍ରିୟ ପାନକାର୍ଡକୁ ଯଦି ପରବର୍ତ୍ତୀ ସମୟରେ କେହି ବ୍ୟବହାର କରନ୍ତି ତେବେ ତାଙ୍କ ଠାରୁ ୧୦ ହଜାର ଟଙ୍କା ଜରିମାନା ଆଦାୟ କରାଯିବ । ତେବେ ପାନକାର୍ଡ ନିଷ୍କ୍ରିୟ ହୋଇଯିବା ପରେ ଅନେକ ଗୁଡିଏ ସମସ୍ୟାର ସମ୍ମୁଖୀନ ହେବାକୁ ପଡିବ । ଯେପରିକି ବ୍ୟାଙ୍କିଙ୍ଗ ଟ୍ରାଞ୍ଜାକସନ, ଜମି କିଣାବିକାରେ ସମସ୍ୟା ଉପୁଜିବ । ଏପରିକି ବ୍ୟାଙ୍କ ଆକାଉଣ୍ଟରୁ ୫୦ ହଜାରରୁ ଅଧିକ ଟଙ୍କା କାରବାର କଲେ ପାନ୍ କାର୍ଡ ଦେଖାଇବାକୁ ପଡିବ ।
ଏହାପୂର୍ବରୁ ଅନେକ ଥର ପାନ୍ ସହ ଆଧାର ଲିଙ୍କ୍ କରିବାକୁ ଡେଡଲାଇନ ଦିଆଯାଇଛି । କିନ୍ତୁ ମାର୍ଚ୍ଚ ୩୧ ଶେଷ ଡେଡଲାଇନ ବୋଲି କୁହାଯାଇଛି ।ସିବିଡିଟି ମୁତାବକ ୨୭ ଜାନୁଆରୀ ୨୦୨୦ ପର୍ୟ୍ୟନ୍ତ ୩୦.୭୫ କୋଟି ପାନ କାର୍ଡକୁ ଆଧାର ସହ ଯୋଡାଯାଇଛି । କିନ୍ତୁ ଏବେ ମଧ୍ୟ ୧୭.୫୮ କୋଟି ପାନକାର୍ଡ ଆଧାର ସହ ଲିଙ୍କ୍ କରାଯାଇନାହିଁ । ଆୟକର ନିୟମର ଧାରା ୧୩୯ ଏଏ(୨) ଅନୁଯାୟୀ, ୧ ଜୁଲାଇ ୨୦୧୭ ପର୍ଯ୍ୟନ୍ତ ଯେଉଁମାନଙ୍କୁ ପାନକାର୍ଡ ଆବଣ୍ଟିତ କରାଯାଇଛି ସେମାନଙ୍କୁ ଆଧାର କାର୍ଡ ସହ ପାନକୁ ସଂଯୋଗ କରିବାକୁ ପଡିବ । ଆଉ ଏଥିପାଇଁ ମାର୍ଚ୍ଚ ୩୧ ଯାଏଁ ଡେଡଲାଇନ ଦିଆଯାଇଛି ।
ତେବେ ଆଧାରକାର୍ଡ ସହ ପାନକାର୍ଡ କିଭଳି ଲିଙ୍କ୍ କରାଯାଏ ତାହା ଉପରେ ଥରେ ନଜର ପକାନ୍ତୁ ।
– ପ୍ରଥମେ ଆୟକର ବିଭାଗର ୱେବସାଇଟ incometaxindiaefilling.gov.inରେ କ୍ଲିକ୍ କରନ୍ତୁ
– ଏଠାରେ ବାମ ପାଶ୍ୱର୍ରେ ଆଧାର ଲିଙ୍କ୍ କରିବାକୁ ବିକଳ୍ପ ଆସିବ
– ଏଠାରେ କ୍ଲିକ କରିବା ପରେ ନୂଆ ପେଜ ଖୋଲିବ, ଯାହାର ଉପରପାଶ୍ୱର୍ରେ ଲାଲରଙ୍ଗରେ click here ବିକଳ୍ପ ରହିବ
– ଯଦି ପୂର୍ବରୁ ପାନ୍-ଆଧାର ଲିଙ୍କ୍ କରିଥାନ୍ତି ତେବେ ଏହାର ଷ୍ଟାଟସ ବିକଳ୍ପ ଉପରେ କ୍ଲିକ୍ କରି ଏହାକୁ ଭେରିଫାଇ କରିପାରିବେ
– ଲିଙ୍କ୍ ହୋଇନଥିଲେ click here ବିକଳ୍ପର ନିମ୍ନରେ ଦିଆଯାଇଥିବା ବକ୍ସରେ ପାନ୍, ଆଧାର ନମ୍ବର, ନିଜ ନାଁ ଓ ଦିଆଯାଇଥିବା କାପଚା ଏଣ୍ଟର କରିବାକୁ ପଡିବ
– ଏହାପରେ Link Aadhar ବିକଳ୍ପ ଉପରେ କ୍ଲିକ କରିବାକୁ ପଡିବ । ଏହାସହ ଏହି ପ୍ରୋସେସ ପୂରା ହେବ ।
ଆୟକର ବିଭାଗ ମୁତାବକ, ୫୬୭୬୭୮ କିମ୍ବା ୫୬୧୬୧ ନମ୍ବରରେ ଏସଏମଏସ ପଠାଇ ଆଧାର-ପାନ୍ ଲିଙ୍କର ଷ୍ଟାଟସ କଣ ତାହା ଜାଣିପାରିବେ ଲୋକେ । ଆଧାର-ପାନ୍ ଲିଙ୍କ୍ କରିବାର ଡେଡଲାଇନ ସରିବା ପରେ ଆୟକର ବିଭାଗ ପକ୍ଷରୁ ଲିଙ୍କ୍ ହୋଇନଥିବା ସମସ୍ତ ପାନ୍ କାର୍ଡକୁ ଡିଆକ୍ଟିଭେଟ କରାଯିବ । ତେବେ ନୂଆ ପାନ୍ କାର୍ଡ ଆବେଦନ କରୁଥିଲେ ଆବେଦନକାରୀଙ୍କୁ ଆଧାର ନମ୍ବର ଦେବା ଅପରିହାର୍ଯ୍ୟ ।