ଇରାନରେ ଥମୁନି ହିଜାବ ବିବାଦ : ପୋଲିସ୍ ଗୁଳିମାଡ଼ରେ ଏଯାଏଁ ଗଲାଣି ୩୧ ଆନ୍ଦୋଳନକାରୀଙ୍କ ଜୀବନ
କନକ ବ୍ୟୁରୋ : ହିଜାବ ବିରୋଧୀ ଆନ୍ଦୋଳନକାରୀଙ୍କୁ ଗୁଳିମାଡ଼ । ଇରାନରେ ହିଜାବ ବିରୋଧୀ ଆନ୍ଦୋଳନ ଭୟାନକ ସ୍ଥିତି ସୃଷ୍ଟି କରିଛି । ହିଜାବ ପିନ୍ଧିନଥିବାରୁ ଇରାନ୍ ମୋରାଲିଟି ପୋଲିସ ନିର୍ଯାତନାରେ ମହସା ଆମିନୀ ନାମକ ଜଣେ ମହିଳାଙ୍କ ମୃତ୍ୟୁକୁ ନେଇ ସବୁଠି ହିଂସାତ୍ମକ ବିକ୍ଷୋଭ ଚାଲିଛି । ରାଜଧାନୀ ତେହରାନ୍ ସମେତ ପ୍ରାୟ ୩୦ଟି ପ୍ରମୁଖ ସହରରେ ଲୋକେ ରାସ୍ତାକୁ ଓହ୍ଲାଇବା ସହ ପ୍ରତିବାଦ ଜାରି ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆନ୍ଦୋଳନକାରୀଙ୍କୁ ବଳ ପ୍ରୟୋଗ କରି ଘଉଡ଼ାଇବା ପାଇଁ ସରକାରଙ୍କ ନିର୍ଦ୍ଦେଶ ପରେ ସୁରକ୍ଷାକର୍ମୀଙ୍କ ଗୁଳିମାଡ଼ରେ ୩୧ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଛି । ଶତାଧିକ ଲୋକ ଏଥିରେ ଆହତ ହୋଇଛନ୍ତି । ପୋଲିସ ହଜାରରେ ଅଧିକ ଲୋକଙ୍କୁ ଗିରଫ ମଧ୍ୟ କରିଛି । ଏହା ସତ୍ତେ୍ୱ ମହିଳା ହିଜାବ ବିରୋଧରେ ବିକ୍ଷୋଭ ପ୍ରଦର୍ଶନ କରୁଛନ୍ତି । ସେମାନେ ହିଜାବ ଜାଳି, କେଶ କାଟି ପୋଲିସ ଏବଂ ସରକାରଙ୍କ ବିରୋଧରେ ସ୍ଲୋଗାନ ଦେଉଛନ୍ତି । ସରକାରଙ୍କ ଏକଛତ୍ର ନୀତି ବିରୋଧରେ ଯୁବଗୋଷ୍ଠୀ ଆପ୍ଲିକେସନ ମଧ୍ୟ ବନାଇଛନ୍ତି । ଏହି ଆପକୁ ୫ଦିନରେ ୧୦ଲକ୍ଷ ଲୋକ ଡାଉନଲୋଡ୍ କଲେଣି । ଯୁବଗୋଷ୍ଠୀ ଏହା ମାଧ୍ୟମରେ ଗୋପନୀୟ ବାର୍ତ୍ତା ପଠାଉଛନ୍ତି । ଏହାକୁ ଦେଖି ତେହେରାନରେ ଇଣ୍ଟରନେଟ୍ ବନ୍ଦ କରିଦିଆଯାଇଛି । ଏପରିକି ଇନଷ୍ଟାଗ୍ରମକୁ ମଧ୍ୟ ନିଷିଦ୍ଧ କରାଯାଇଛି ।
ଏହି ମାମଲା ୧୩ତାରିଖରୁ ଆରମ୍ଭ ହୋଇଥିଲା । ଏହି ଦିନ ଇରାନର ମୋରାଲ ପୋଲିସ ହିଜାବ ପିନ୍ଧି ନଥିବା ଅଭିଯୋଗରେ ଜଣେ ମହିଳା ମହସା ଅମିନୀଙ୍କୁ ଗିରଫ କରିଥିଲା । ଏହାର ତିନି ଦିନ ପରେ ମହିଳାଙ୍କ ମୃତଦେହ ପରିବାର ଲୋକଙ୍କୁ ପ୍ରଦାନ କରାଯାଇଥିଲା । ପୋଲିସ ନିର୍ଯାତନା ସହି ନ ପାରି ମହିଳାଙ୍କ ମୃତ୍ୟୁ ହୋଇଥିଲା । ସୋସିଆଲ ମିଡିଆ ମାଧ୍ୟମରେ ଏହି ଖବର ଲୋକଙ୍କ ନିକଟରେ ପହଞ୍ଚିଥିଲା । ଇରାନ୍ ମାନବାଧିକାର ସଂସ୍ଥାର ନିର୍ଦ୍ଦେଶକ କହିଛନ୍ତି, ଲୋକମାନେ ସେମାନଙ୍କ ମୌଳିକ ଅଧିକାର ପାଇଁ ରାସ୍ତାକୁ ଓହ୍ଲାଇଛନ୍ତି । କିନ୍ତୁ ସରକାର ସେମାନଙ୍କ ଶାନ୍ତିପୂର୍ଣ୍ଣ ଆନ୍ଦୋଳନକୁ ବୁଲେଟରେ ଜବାବ ଦେଉଛନ୍ତି ।