ବେଆଇନ ଚାଲାଣ ବେଳେ ୩ଶହରୁ ଅଧିକ ଶ୍ରମିକ ଉଦ୍ଧାର । ଦାଦନ ସର୍ଦ୍ଦାର ଫେରାର
କନକ ବ୍ୟୁରୋ: ଚାଲାଣ ହେଉଥିବା ବେଳେ ୩ଶହରୁ ଅଧିକ ଦାଦନ ଶ୍ରମିକଙ୍କୁ ଉଦ୍ଧାର କଲା ପୁଲିସ । ଗତକାଲି ବିଳମ୍ବିତ ରାତିରେ କଂଟାବାଂଜି ପୁଲିସ ଏବଂ ବଲାଙ୍ଗୀର ସ୍ପେଶାଲ ସ୍କ୍ୱାଡ ପୁଲିସ ଶ୍ରମିକଙ୍କୁ ଉଦ୍ଧାର କରିଛି । ଦାଦନ ଶ୍ରମିକଙ୍କୁ ଉଦ୍ଧାର କରାଯାଇ କଂଟାବାଂଜି ଥାନାରେ ରଖାଯାଇଥିବାବେଳେ ଦାଦନ ସର୍ଦ୍ଧାର ଫେରାର ହୋଇଯାଇଥିବା ସୂଚନା ମିଳିଛି । ଗତ କିଛି ଦିନ ପୂର୍ବରୁ ମଧ୍ୟ କଂଟାବାଂଜି ରେଳଷ୍ଟେସନରୁ ୮୧ଜଣ ଶ୍ରମିକଙ୍କୁ ଉଦ୍ଧାର କରିଥିଲା ପୁଲିସ । ଚଳିତ ବର୍ଷ ମରୁଡି ଦେଖାଯିବା ସହ କାମଧନ୍ଧା ନମିଳିବାରୁ ଲୋକେ ଦାଦନ ଖଟିବାକୁ ଯାଉଥିବା କହିଛନ୍ତି । ସରକାର ଦାଦନ ରୋକିବାକୁ ବହୁ ପଦକ୍ଷେପ ନେଉଥିବା କହୁଛନ୍ତି । ହେଲେ କଳାହାଣ୍ଡି ଜିଲ୍ଲାରେ ଦାଦନ ଶ୍ରମିକ ଥମିବାର ନା ନେଉ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଗତ ୨୩ ତାରିଖରେ ବାହାର ରାଜ୍ୟକୁ ଚାଲାଣ ବେଳେ ୧୪ ଜଣ ଦାଦନ ଶ୍ରମିକଙ୍କୁ ଉଦ୍ଧାର କରି ଥିଲା ପାଟଣାଗଡ଼ ପୋଲିସ । ଉଦ୍ଧାର ଶ୍ରମିକଙ୍କ ମଧ୍ୟରେ ଥିଲେ ୬ ଜଣ ପୁରୁଷ, ୬ଜଣ ମହିଳା ଏବଂ ୨ଜଣ ଶିଶୁ । ଚିଙ୍ଗେରବନ୍ଧ ଗାଁର ମହେଶ୍ୱର ବାଗ ନାମକ ଜଣେ ଦଲାଲ ଏହି ଶ୍ରମିକ ମାନଙ୍କୁ ଚାଲାଣ କରୁଥିବା ଜଣାପଡୁଥିଲା । ପରିବାର ପିଛା ୨୨ ହଜାର ଟଙ୍କା ଦେଇ ବେଲପଡା ଥାନା ଚନ୍ଦ୍ରପୁର ଗାଁର ଜଣେ ସର୍ଦ୍ଦାର ପାଖକୁ ଗାଡି ଯୋଗେ ନେଉଥିବା ବେଳେ କେନ୍ଦୁମୁଣ୍ଡି ଗାଁ ନିକଟରେ ପୋଲିସ ଏହି ଶ୍ରମିକ ମାନଙ୍କୁ ଉଦ୍ଧାର କରିଥିଲା । ଟ୍ରେନ୍ ଯୋଗେ ଏହି ଶ୍ରମିକମାନେ ହାଇଦ୍ରାବାଦକୁ ଇଟା ବାଡ଼େଇବାକୁ ନେବାର ଯୋଜନା ରହିଥିଲା । ବଲାଙ୍ଗୀର ଜିଲ୍ଲା ଶ୍ରମିକ ଅଧିକାରିଙ୍କୁ ଡ଼ାକି ତଦନ୍ତ ପରେ ଡ୍ରାଇଭର ସହ ଦଲାଲକୁ ଗିରଫ କରିଥିଲା ପାଟଣାଗଡ଼ ପୋଲିସ ।
ସେହିପରି ମାର୍ଚ ମାସରେ ଅର୍ଥ ଉପାର୍ଜନର ପ୍ରଲୋଭନ ଦେଖାଇ ଜିଲ୍ଲାର ଧର୍ମଗଡ ବ୍ଲକ ଗୋଳାମୁଣ୍ଡା ଅଂଚଳର ୧୨ଜଣ ନାବାଳିକାକୁ ଚୋରା ଚାଲାଣ କରାଯାଉଥିବା ବେଳେ ପୋଲିସ ଉଦ୍ଧାର କରିଥିଲା । ତିନି ଜଣ ଦଲାଲ ଟ୍ରେନ ଯୋଗେ ୧୨ ନାବାଳିକାଙ୍କୁ ତାମିଲନାଡୁକୁ ନେଉଥିବା ବେଳେ କେସିଙ୍ଗା ପୋଲିସ ହାତରେ ଧରାପଡିଥିଲେ । ସରକାରଙ୍କ ବିଭିନ୍ନ ଯୋଜନା ପରେ ବି ଜିଲ୍ଲାରେ ଦାଦାନ ଶ୍ରମିକଙ୍କ ସଂଖ୍ୟା କମିବାର ନାଁ ଧରୁନି । ପେଟ ପାଇଁ ବାଧ୍ୟ ହୋଇ ବାହାର ରାଜ୍ୟକୁ ଯାଉଥିବା ସେମାନେ କହିଛନ୍ତି ।