ପକ୍ଷୀଙ୍କୁ କାଳ ହେଉଛି ସୁଉଚ୍ଚ କୋଠା : ୱାର୍ଲ୍ଡ ଟ୍ରେଡ୍ ସେଣ୍ଟର ନିକଟରେ ମାଳମାଳ ମଲା ପକ୍ଷୀ, ପରିବେଶବିତଙ୍କ ମଧ୍ୟରେ କ୍ଷୋଭ
କନକ ବ୍ୟୁରୋ: ପରିବେଶରେ ମାଦକତା ଭରିଦିଏ ପକ୍ଷୀଙ୍କ ଖିଚିରିମିଚିରି ଶବ୍ଦ । ଏହି କୋମଳ ସୃଷ୍ଟି ପାଇଁ ଲୋକେ ଅନେକ କିଛି ସୁବିଧା କରୁଛନ୍ତି । ହେଲେ ଆମର ଅତ୍ୟାଧୁନିକ ଜୀବନ ଶୈଳୀ ଏମାନଙ୍କ ପାଇଁ ହେଉଛି କାଳ । ୱାର୍ଲ୍ଡ ଟ୍ରେଡ୍ ସେଣ୍ଟର ନିକଟରୁ ୩୦୦ରୁ ଅଧିକ ପକ୍ଷୀଙ୍କ ମୃତଦେହ ମିଳିବା ପରେ ପକ୍ଷୀ ପ୍ରେମୀ ତଥା ପରିବେଶ ବିଜ୍ଞାନୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । । ସ୍କାଏ ସ୍କ୍ରାପର୍ସରେ ବ୍ୟବହୃତ କାଚରେ ବାଡେଇ ହୋଇ ଏମାନଙ୍କ ମୃତ୍ୟୁ ହୋଇଥିବା କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଆମେରିକାର ନଭଶ୍ଚୁମ୍ବି ଟାୱାର ଗୁଡିକ ଏମାନଙ୍କ ପାଇଁ ଘାତକ ପ୍ରମାଣିତ ହେଉଛି, ଯେଉଁଥିରେ ଧକ୍କା ଖାଇ ଏମାନଙ୍କର ମୃତ୍ୟୁ ହେଉଛି ।କୁହାଯାଉଛି ଯେ, ପେଣ୍ଟାଗନ ଟାୱାର ଭାଙ୍ଗିବା ପରେ ଏଠାରେ ନିର୍ମିତ ହୋଇଥିବା ସୁଉଚ୍ଚ ଟାୱାରର ଚାରିପଟେ କାଚ ସଂଲଗ୍ନ ହୋଇଛି । ଯାହା ରାତିରେ ପକ୍ଷୀ ମାନଙ୍କ ମନରେ ଭ୍ରମ ସୃଷ୍ଟି କରୁଛି । ରାତିରେ କାଚ ଝରକାରେ ଆଲୋକ ପଡିବା ଫଳରେ ଏହା ଆକାଶର ଭ୍ରମ ସୃଷ୍ଟି କରୁଥିବାରୁ ପକ୍ଷୀ ଗୁଡିକ ଏହା ଆଡକୁ ଉଡିଯିବା ସମୟରେ ଏଥିରେ ଧକ୍କା ହୋଇ ପ୍ରାଣ ହରାଇଥିବା ଆମେରିକାର ଜନୈକ ପରିବେଶବିତ୍ ମତ ଦେଇଛନ୍ତି ।
କହିରଖୁଁ କି, ଆମେରିକାର କର୍ଣ୍ଣେଲ ଲ୍ୟାବ୍ ଅଫ୍ ଆର୍ନିଥୋଲୋଜିର ରିପୋର୍ଟ ମୁତାବକ, ଆମରିକାର ସ୍କାଏ ସ୍କ୍ରାପରରେ ଧକ୍କା ଖାଇ ପ୍ରତିବର୍ଷ ୬୦ କୋଟି ପକ୍ଷୀ ପ୍ରାଣ ହରାଉଛନ୍ତି । ଚିକାଗୋ, ହଷ୍ଟନ୍ ଓ ଡାଲାସ ସହର ପକ୍ଷୀ ମାନଙ୍କ ପାଇଁ ସବୁଠୁ ବିପଜ୍ଜନକ ସ୍ଥାନ ବୋଲି ଏହି ରିପୋର୍ଟରେ ପ୍ରକାଶ ପାଇଛି । ଶିତ ଋତୁରେ କାନାଡାରୁ ଦକ୍ଷଣ ଆମେରିକା ଯିବା ବାଟରେ ଏହି ସହରରେ ଏହି କାରଣରୁ ଅଧିକ ପ୍ରବାସୀ ପକ୍ଷୀ ପ୍ରାଣ ହରାଉଥିବା ଜଣାପଡିଛି । ଏନେଇ ଆମେରିକା ସରକାର କିଛି ନିୟମ କରିଥିଲେ ତାହା ପକ୍ଷୀମାନଙ୍କୁ କୌଣସି ଭାବେ ସୁରକ୍ଷା ଦେଇପାରୁନଥିବା ପରିବେଶବିତ୍ ମାନେ କ୍ଷୋଭ ପ୍ରକାଶ କରିଛନ୍ତି ।