କନକ ବ୍ୟୁରୋ :   ଉତ୍ତରପ୍ରଦେଶରେ ବିଧାନସଭା ନିର୍ବାଚନ ପୂର୍ବରୁ ବିଜେପିକୁ ଜୋରଦାର ଝଟକା ଲାଗିଛି । ଜଣକ ପରେ ଜଣେ ନେତା ପଦ୍ମକୁ ପର କରୁଥିବାର ଦେଖିବାକୁ ମିଳୁଛି । ମଙ୍ଗଳବାରରେ ବିଜେପି ପାଇଁ ସବୁ ଯେପରି ଅମଙ୍ଗଳ ହେଉଛି । ଯୋଗୀ ସରକାରରେ ମନ୍ତ୍ରୀ ଥିବା ସ୍ୱାମୀ ପ୍ରସାଦ ମୌର୍ଯ୍ୟ ନିଜ ପଦରୁ ଇସ୍ତଫା ଦେଇଛନ୍ତି। କେବଳ ଏତିକି ନୁହେଁ ସେ ସମାଜବାଦୀ ପାର୍ଟିରେ ଯୋଗ ଦେଇଛନ୍ତି।  ସ୍ୱାମୀ ପ୍ରସାଦ ମୌର୍ଯ୍ୟଙ୍କ ପରେ ଦଳର ଆଉ ୩ ଜଣ ବିଧାୟକ ମଧ୍ୟ ବିଜେପି ଛାଡିଛନ୍ତି । ଏମାନେ ମଧ୍ୟ ସମାଜବାଦୀ ପାର୍ଟିରେ ଯୋଗ ଦେବେ ବୋଲି ଚର୍ଚ୍ଚା ହେଉଛି ।

Advertisment

ଆଜି ଖୋଦ ସପା ଅଧ୍ୟକ୍ଷ ଅଖିଳେଶ ଯାଦବ ନିଜେ ଟ୍ୱିଟ୍ କରି ସ୍ୱାମୀ ପ୍ରସାଦ ମୌର୍ଯ୍ୟ ଏସପିରେ ଯୋଗଦେବା ବିଷୟରେ ସୂଚନା ଦେଇଛନ୍ତି। ଅଖିଳେଶ ଯାଦବ ଲେଖିଛନ୍ତି, ‘ସାମାଜିକ ନ୍ୟାୟ ଏବଂ ସମାନତା ପାଇଁ ସଂଗ୍ରାମ କରିଥିବା ଲୋକପ୍ରିୟ ନେତା ସ୍ୱାମୀ ପ୍ରସାଦ ମୌର୍ଯ୍ୟ ଏବଂ ତାଙ୍କ ସହ ଆସିଥିବା ଅନ୍ୟ ସମସ୍ତ ନେତା, କର୍ମୀ ଏବଂ ସମର୍ଥକଙ୍କୁ ଏସପିକୁ ହାର୍ଦ୍ଦିକ ସ୍ୱାଗତ ଏବଂ ଶୁଭେଚ୍ଛା।’

ଅନ୍ୟପଟେ ଉତ୍ତରପ୍ରଦେଶର ଉପ-ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କ କହିବା ଅନୁଯାୟୀ, ସ୍ୱାମୀ ପ୍ରସାଦ ମୌର୍ଯ୍ୟ କେଉଁ କାରଣରୁ ଇସ୍ତଫା ଦେଇଛନ୍ତି ତାହା ଜାଣିନାହିଁ । ତେଣୁ ତାଙ୍କୁ ଅପିଲ କରୁଛି ବସିକି ଆଲୋଚନା କରନ୍ତୁ  । କାରଣ ତରତରରେ ନିଆଯାଇଥିବା ନିଷ୍ପତ୍ତି ଅନେକ ସମୟରେ ଭୁଲ ପ୍ରମାଣିତ ହୋଇଥାଏ । ଏସବୁ ଭିତରେ ଦଳରେ ଅସନ୍ତୁଷ୍ଟ ଥିବା ନେତାଙ୍କ ସହ ଆଲୋଚନା କରିବାକୁ ବିଜେପି ନେତାଙ୍କୁ ଦାୟିତ୍ୱ ଦିଆଯାଇଛି ।