ସୁରତ୍ ଅଗ୍ନିକାଣ୍ଡ : କାଲି ହୋଇଥିଲା ମୃତ୍ୟୁ , ଆଜି ବାହାରିଲା ପରୀକ୍ଷାଫଳ ! ଦ୍ୱାଦଶ ପରୀକ୍ଷାଫଳ ବାହାରିବା ପୂର୍ବରୁ ଆଖି ବୁଜିଦେଲେ ତିନି ଛାତ୍ରୀ ।

ଗୁଜୁରାଟର ସୁରଟ୍ ସ୍ଥିତ ତକ୍ଷଶିଳା କମ୍ପଲେକ୍ସରେ ଶୁକ୍ରବାର ସନ୍ଧ୍ୟା ସମୟରେ ଭିଷଣ ନିଆଁ ଲାଗିବା କାରଣରୁ ଏବେ ପର୍ଯ୍ୟନ୍ତ ୨୦ ଜଣ ନିରୀହଙ୍କ ଜୀବନ ଯାଇଥିବା ବେଳେ ୧୮ ଜଣ ଗୁରୁତର ଅବସ୍ଥାରେ ଜୀବନ ଏବଂ ମୃତ୍ୟୁ ସହ ସଂଘର୍ଷ କରୁଛନ୍ତି । ଯେଉଁଥିରେ କେବଦିୟା ୟଶସ୍ୱୀ ଦିନେଶଭାଇ,ବର୍ଷାନୀ ମାନସୀ ପରବୀନଭାଇ ଏବଂ ସୁରାନୀ ହସ୍ତୀ ହିତେଶଭାଇଙ୍କ ନାମ ମଧ୍ୟ ରହିଛି । ଏହି ତିନି ଜଣ ଛାତ୍ରୀ ଦ୍ୱାଦଶ ଶ୍ରେଣୀର ଛାତ୍ରୀ ଥିଲେ । ଆଜି ଗୁଜୁରାଟ ବୋର୍ଡ ତରଫରୁ ଦ୍ୱାଦଶ ବୋର୍ଡର ଫଳାଫଳ ବାହାରି ଯାଇଛି । ଯେଉଁଥିରେ ଏହି ତିନି ଛାତ୍ରୀ ଖୁବ୍ ଭଲ ନମ୍ବର ଆଣି ପାସ୍ କରିଛନ୍ତି । ଅନ୍ୟପକ୍ଷରେ ଆଜି ଯେଉଁଠି ପରିବାରରେ ମାତାପିତା ଖୁସି ହେବା କଥା ସେଠାରେ ଝିଅଙ୍କ ମୃତ୍ୟୁରେ ଶୋକ ଖେଳେଇ ଯାଇଛି । ଏହି ତିନି ଛାତ୍ରୀ ଦ୍ୱାଦଶରେ ବାଣିଜ୍ୟ ବିଷୟରେ ଅଧ୍ୟୟନ କରୁଥିଲେ ଏବଂ ତକ୍ଷଶୀଳା କୋଚିଙ୍ଗ୍ କ୍ଲାସକୁ ଫାଇନ୍ ଆର୍ଟସ୍ ଟ୍ୟୁସନ୍ ନେବାକୁ ଯାଉଥିଲେ । ଏହି ସମୟରେ ତିନି ଛାତ୍ରୀ ସେଠାରେ ଉପସ୍ଥିତ ଥିଲେ ।

ତିନି ଜଣ ପାଠପଢାରେ ଖୁବ୍ ଆଗୁଆ ଥିଲେ । କେବଦିୟା ୟଶସ୍ୱୀ ଦିନେଶଭାଇ ୬୭.୭୫ ପ୍ରତିଶତ ମାର୍କ ଆଣିଥିବା ବେଳେ ବର୍ଷାନୀ ମାନସୀ ୫୨.୦୩ ମାର୍କ ଏବଂ ସୁରାନୀ ହସ୍ତୀ ହିତେଶଭାଇ ୬୯.୩୯ ପ୍ରତିଶତ ମାର୍କ ଆଣିଥିଲେ । ଏଭଳି ଅନେକ ଦ୍ୱାଦଶ ପରୀକ୍ଷା ଦେଇଥିବା ଛାତ୍ରଛାତ୍ରୀଙ୍କ ଆଜି ଫଳାଫଳ ବାହାରିଥିଲେ ମଧ୍ୟ ପରୀକ୍ଷା ଫଳାଫଳକୁ ଦେଖିବା ପାଇଁ କେହି ଜୀବିତ ନାହାନ୍ତି ।