ଧୀରେ ଧୀରେ ସ୍ୱାଭାବିକ ହେଉଛି ପୁରୀ ! ବନ୍ଦଥିବା ଟ୍ରେନ ମଧ୍ୟରୁ ଗଡିଲା ୩ ଟ୍ରେନ

କନକ ବ୍ୟୁରୋ : ପୁରୀକୁ ସ୍ବାଭାବିକ ହେଉଛି ଟ୍ରେନ୍ ସେବା। ଦୁଇ ଦିନ ଧରି ଖୋର୍ଧା ରୋଡ୍ରୁ ପୁରୀକୁ ପରୀକ୍ଷାମୂଳକ ଭାବେ ଟ୍ରେନ୍ ଚଳାଚଳ କରିବା ପରେ  ସ୍ଥିତିରେ କିଛିଟା ସୁଧାର ଆସିଛି। ପୁରୀରୁ ୩ଟି ଏକ୍ସପ୍ରେସ୍ ଚଳାଚଳ ଆରମ୍ଭ କରିଛି। ନିର୍ଦ୍ଧାରିତ ସମୟରେ ପୁରୀ-ନୂ୍ଆଦିଲ୍ଲୀ ପୁରୁଷୋତ୍ତମ ଏକ୍ସପ୍ରେସ୍(୧୨୮୦୧), ପୁରୀ-ହଟିଆ ତପସ୍ବିନୀ ଏକ୍ସପ୍ରେସ୍(୧୮୪୫୨) ଓ ପୁରୀ-ଦୁର୍ଗ ଏକ୍ସପ୍ରେସ୍(୧୮୪୨୫) ପୁରୀରୁ ଛାଡ଼ିଥିବା ପୂର୍ବତଟ ରେଳପଥ ପକ୍ଷରୁ ସୂଚନା ମିଳିଛି। ଏହାବ୍ୟତୀତ ବାତ୍ୟା ପରବର୍ତ୍ତୀ ସ୍ଥିତିରେ ସୁଧାର ଆସିଥିବାରୁ ବାତିଲ୍ ହୋଇଥିବା କେତେକ ପାସେଞ୍ଜର ଟ୍ରେନ୍ ୯ ତାରିଖଠାରୁ ନିର୍ଦ୍ଧାରିତ ସମୟରେ ଚଳାଚଳ କରିବ।

ସେଗୁଡ଼ିକ ହେଉଛି ଖଡ଼ଗପୁର-ଯାଜପୁର-କେନ୍ଦୁଝର ରୋଡ୍ ପାସେଞ୍ଜର ଟ୍ରେନ୍, ଖଡ଼ଗପୁର-ଭଦ୍ରକ-ଖଡ଼ଗପୁର ପାସେଞ୍ଜର, ବାଲେଶ୍ବର-ଭଦ୍ରକ-ବାଲେଶ୍ବର ପାସେଞ୍ଜର, ହାୱଡା-ଭଦ୍ରକ-ହାୱଡା ପାସେଞ୍ଜର, ଭଦ୍ରକ-ଭୁବନେଶ୍ବର-ଭଦ୍ରକ ମେମୁ, କଟକ-ପଲାସା-କଟକ ପାସେଞ୍ଜର, ଅନୁଗୁଳ-ପୁରୀ-ଅନୁଗୁଳ ମେମୁ, ଭୁବନେଶ୍ବର-ବ୍ରହ୍ମପୁର-ଭୁବନେଶ୍ବର ମେମୁ, ଭୁବନେଶ୍ବର-ପଲାସା-ଭୁବନେଶ୍ବର ମେମୁ, ପଲାସା-ବିଶାଖାପାଟଣା-ପଲାସା ପାସେଞ୍ଜର ଟ୍ରେନ୍। ୧୭ ଯୋଡ଼ା ପାସେଞ୍ଜର ଟ୍ରେନ୍ ଏବେ ବି ବାତିଲ୍ ରହିଛି। ଏଥିସହ ମେ’ ୮ରୁ ୧୦ ତାରିଖ ପର୍ଯ୍ୟନ୍ତ ୧୭ଟି ମେଲ୍ ଏକ୍ସପ୍ରେସ୍ ଟ୍ରେନ୍କୁ ବାତିଲ୍ କରାଯାଇଥିବା ପୂର୍ବତଟ ରେଳପଥ ପକ୍ଷରୁ ସୂଚନା ଦିଆଯାଇଛି।