ଭାରତକୁ ମିଳିବ ଆଉ ଏକ କରୋନା ଟିକା: ସେରମ ଇନଷ୍ଟିଚ୍ୟୁଟ୍ ମୁଖ୍ୟଙ୍କ ବଡ ଘୋଷଣା; ଜୁନ୍ ମାସରେ ଲଞ୍ଚ ହେବ 'କୋଭାଭାକ୍ସ' ଟିକା

କନକ ବ୍ୟୁରୋ: ଭାରତକୁ ମିଳିବ ଆଉ ଏକ କରୋନା ଟିକା । ଜୁନ୍ ମାସରେ ଶୁଭାରମ୍ଭ ହୋଇପାରେ ‘କୋଭାଭାକ୍ସ’  ଟିକା । ଏଭଳି ଘୋଷଣା କରିଛନ୍ତି ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ମୁଖ୍ୟ ଅଦାର ପୁନାୱାଲା । ଟ୍ୱିଟ୍ କରି ପୁନାୱାଲା ସୂଚନା ଦେଇଛନ୍ତି, କୋଭାଭାକ୍ସ ଟିକାର ପରୀକ୍ଷଣ ପାଇଁ ସରକାରଙ୍କୁ ଅନୁମତି ମଗାଯାଇଛି । ଜୁନ୍ ୨୦୨୧ ସୁଦ୍ଧା ଏହାର ଆରମ୍ଭ ହୋଇପାରେ ବୋଲି ଆଶା କରାଯାଉଛି । ସେରମ୍ ଇନଷ୍ଟିଚ୍ୟୁଟ୍ ନୋଭୋଭାକ୍ସ ସହ ମିଳିତ ଭାବେ ଏହି ଟିକା ପ୍ରସ୍ତୁତ କରୁଛି । ଏହା ସଫଳ ହେଲେ ଭାରତକୁ ତୃତୀୟ କରୋନା ଟିକା ମିଳିବ ।

ପୂର୍ବରୁ ସେରମ୍ ଇନଷ୍ଟିଚ୍ୟୁଟ ଓ ଅକ୍ସଫୋର୍ଡ- ଆଷ୍ଟ୍ରାଜେନେକା ଦ୍ୱାରା ପ୍ରସ୍ତୁତ କୋଭିସିଲ୍ଡ ଏବଂ ଭାରତ ବାୟୋଟେକ୍ ଦ୍ୱାରା ପ୍ରସ୍ତୁତ କୋଭାକ୍ସିନ୍ ଭାରତରେ ଚାଲିଥିବା ଟିକାକରଣରେ ବ୍ୟବହାର କରାଯାଉଛି । ଟୁଇଟ କରି ପୁନୱାଲା କହିଛନ୍ତି କରୋନା ଭାଇରସ ବିରୁଦ୍ଧରେ ଫଳପ୍ରଦ ପାଇଁ ପରୀକ୍ଷଣ ଚାଲିଥିବା କୋଭାଭାକ୍ସ ଟିକାର ଉକ୍ତୃଷ୍ଟ ଫଳାଫଳ ମିଳିଛି । ଆମେରିକୀୟ କମ୍ପାନୀ ନୋଭୋଭାକ୍ସ ଦାବି କରୁଛି ୟୁକେରେ ହୋଇଥିବା ପରୀକ୍ଷଣରେ ଏହା ୮୯ ଦଶମିକ୩ ପ୍ରତିଶତ ପ୍ରଭାବଶାଳୀ ଥିବା ଜଣାପଡିଛି । ଏହା ବ୍ରିଟେନର ନୂଆ କରୋନା ଷ୍ଟେନ୍ ବିରୋଧରେ ମଧ୍ୟ କାର୍ଯ୍ୟକ୍ଷମ ବୋଲି କମ୍ପାନୀ ଦାବି କରୁଛି । ଏହା ସହ ଗତବର୍ଷ ନୋଭୋଭାକ୍ସ ଭାରତୀୟ କମ୍ପାନୀ ସେରମ୍ ଇନ୍ଷ୍ଟିଚ୍ୟୁଟ୍ ସହ ମିଳିତ ଭାବେ ୨ଶହ କୋଟି ଡୋଜର ଟିକା ଉତ୍ପାଦନ କରିବ ବୋଲି ଘୋଷଣା କରିଥିଲା ।