ପେଟ୍ରୋଲ ପମ୍ପ ବିସ୍ଫୋରଣ ଘଟଣା : ମିଳିଲାଣି ୩ ବସ୍ତା ପୋଡ଼ା ମାଂସ, ମିଳୁନି ମୃତକଙ୍କ ହିସାବ

17,118

କନକ ବ୍ୟୁରୋ : ପେଟ୍ରୋଲ୍‌ ପମ୍ପରେ ଘଟିଥିବା ଛାତିଥରା ବିସ୍ଫୋରଣରେ କେତେ ଜଣଙ୍କ ମୃତ୍ୟୁ ଘଟିଛି, ତାହା ସ୍ପଷ୍ଟ ହୋଇପାରିନାହିଁ।  ଗୁରୁତର ଆହତ ହୋଇ ଏସ୍‌ସିବିରେ ଚିକିତ୍ସିତ ହେଉଥିବା ୨ ଜଣଙ୍କ ମଧ୍ୟରୁ ଗଞ୍ଜାମର ସତ୍ୟ ନାୟକ ନାମକ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଥିବା ସୂଚନା ମିଳିଛି। ଅନ୍ୟପକ୍ଷରେ ପୁଲିସ ୩ ବସ୍ତା ପୋଡ଼ା ମାଂସ ଜବତ କରି କ୍ୟାପିଟାଲ ହସ୍ପିଟାଲର ଶବ ସଂରକ୍ଷଣ ଗୃହରେ ରଖିଛି। ସେଥିରେ ୨ଟି ଖପୁରି ଓ ଅନେକ ଅଙ୍ଗପ୍ରତ୍ୟଙ୍ଗ ରହିଛି।

ନିକଟସ୍ଥ ବଣବୁଦାରେ ଆହୁରି ପୋଡ଼ା ମାଂସ ପଡ଼ିଥିବା ଜଣାପଡ଼ିଛି। ତେଣୁ ଏକାଧିକ ଲୋକଙ୍କ ମୃତ୍ୟୁ ଘଟିଥିବା ଜଣାପଡ଼ୁଥିଲେ ମଧ୍ୟ ପରିଚୟ ମିଳିପାରିନାହିଁ। ଏମିତିକି ପୁଲିସ ନିକଟରେ ନିଖୋଜଙ୍କ ସଂଖ୍ୟା ବାବଦରେ ମଧ୍ୟ ସ୍ପଷ୍ଟ ସୂଚନା ନାହିଁ। ପୁଲିସ କମିସନରଙ୍କ ସୂଚନାନୁସାରେ ବର୍ତ୍ତମା‌ନ ସୁଦ୍ଧା ଜଣେ ନିଖୋଜ ଥିବା ଅଭିଯୋଗ ମିଳିଛି ଓ ଚିକିତ୍ସାଧୀନ ଜଣେ ଗୁରୁତର ଆହତଙ୍କ ମୃତ୍ୟୁ ଘଟିଛି। ପୋଡ଼ା ମାଂସର ଡିଏନ୍‌ଏ ପରୀକ୍ଷା କରାଯିବ ଓ ନିଖୋଜ ବ୍ୟକ୍ତିଙ୍କ ବାବଦରେ ଜଣାପଡ଼ିବ ବୋଲି ସେ ସୂଚନା ଦେଇଛନ୍ତି।

ଦୁଇ ବସ୍ତା ପୋଡ଼ା ମାଂସ ଜବତ ହୋଇଥିଲା। ସେଥିରେ ମନୁଷ୍ୟ ଶରୀରର ବିଭିନ୍ନ ଅଙ୍ଗପ୍ରତ୍ୟଙ୍ଗ, ଖପୁରି, ପାପୁଲି, ପାଦ, ହାତ ଆଦି ମିଳିଥିଲା। ଆଜି ମଧ୍ୟ ଆଉ ପାଖାପାଖି ବସ୍ତାଏ ପୋଡ଼ା ମାଂସ ଖଣ୍ଡ ଓ ଶରୀରର ଛିନ୍ନ ଅଂଶ ମିଳିଛି। ସ୍ଥାନୀୟ ଲୋକଙ୍କ ସୂଚନାନୁସାରେ ଆଖପାଖ ବଣବୁଦାରେ ମଧ୍ୟ ମାଂସ ଖଣ୍ଡ ଲାଗିଥିବା ଦେଖିବାକୁ ମିଳୁଛି। ପ୍ରାୟ ୨୦ ମିଟର ଦୂରରେ ରହୁଥିବା ଟ୍ରାନ୍ସପୋର୍ଟ କମିସନର ସଞ୍ଜିବ ପଣ୍ଡାଙ୍କ ଘର କ୍ୟାମ୍ପସରୁ ମାଂସ ଖଣ୍ଡ ମିଳିଛି। ମାଂସ ଖଣ୍ଡଗୁଡ଼ିକ ପ୍ରାୟ ୨ ଶହ ମିଟର ବ୍ୟାସାର୍ଦ୍ଧ ପରିମିତ ଅଞ୍ଚଳରେ ପଡ଼ିଥିବାରୁ ରାଜଭବନ ପରିସରରେ ଥିବା ଜଙ୍ଗଲ ଓ ଆଖପାଖ ବୁଦାରେ ପଡ଼ି ରହିଥିବା ଆଶଙ୍କା କରାଯାଉଛି। ମାଂସ ଖଣ୍ଡସବୁକୁ କ୍ୟାପିଟାଲ ହସ୍ପିଟାଲ ଶବ ସଂରକ୍ଷଣ ଗୃହରେ ରଖାଯାଇଛି। ଦୁଇଟି ଖପୁରି ମିଳିଥିବାରୁ ନିହାତି ମୃତ୍ୟୁ ସଂଖ୍ୟା ୨ ହୋଇଥିବା ସନ୍ଦେହ କରାଯାଉଛି।

ତେବେ ଜବତ ମାଂସ ଖଣ୍ଡ ପରିମାଣରୁ ଏକାଧିକ ବ୍ୟକ୍ତିଙ୍କ ମୃତ୍ୟୁ ଘଟିଥିବା ସନ୍ଦେହ କରାଯାଉଛି। କିନ୍ତୁ ଏବେ ସୁଦ୍ଧା ଜଣେ ନିଖୋଜ ଥିବା ନେଇ କ୍ୟାପିଟାଲ ଥାନାରେ ଅଭିଯୋଗ ହୋଇଛି। ଟେକ୍ନିସିଆନ୍‌ଭାବେ କାମ କରୁଥିବା ଗଞ୍ଜାମ ଅଞ୍ଚଳର ସୀମାଞ୍ଚଳ ପରିଡ଼ାଙ୍କ ପତ୍ତା ମିଳୁନାହିଁ। ଯେଉଁ ମାଂସ ଖଣ୍ଡଗୁଡ଼ିକ ଜବତ କରାଯାଇଛି, ସେଗୁଡ଼ିକ ନିଖୋଜ ବ୍ୟକ୍ତିଙ୍କ ପରିବାର ଲୋକଙ୍କ ଡିଏନ୍ଏ ସହ ମେଳ କରାଯିବ ବୋଲି ପୁଲିସ କହିଛି। ଡିଏନ୍ଏ ରିପୋର୍ଟ ଆସିବା ପରେ ତାହା ସୀମାଞ୍ଚଳଙ୍କର କି ନାହିଁ ତାହା ଜଣାପଡ଼ିବ।

ସେହିଭଳି ପଟ୍ରୋଲ ପମ୍ପ ଚାରିପଟେ କେଉଁଠି ଲୁହାଖଣ୍ଡ ପଡ଼ିଛି ତ ଆଉ କେଉଁଠି ବିସ୍ଫୋରଣରେ ଖଣ୍ଡବିଖଣ୍ଡିତ ହୋଇ ପଡ଼ିଥିବା ରାସାୟନିକ ଟାଙ୍କିର ଅଂଶ ସବୁ ପଡ଼ିଛି। ପେଟ୍ରୋଲ ପମ୍ପ କାଉଣ୍ଟର ନିକଟ, ବିସ୍ଫୋରଣ ସ୍ଥଳ, ପମ୍ପ ପରିସରରେ ଥିବା ସଫଲ୍ ଦୋକାନ ନିକଟରୁ ଏହି ଖଣ୍ଡ ଗୁଡ଼ିକ ଜବତ କରାଯାଇଛି। ସେହିପରି ରାଜଭବନ ପରିସରରେ ୧୨ ନମ୍ବର ଵାଚ୍ ଟାଵାର ପାଖରୁ ବଡ଼ ଲୁହାଖଣ୍ଡ ମିଳିଥିବା ବେଳେ ଗୋଟିଏ ଲୁହା ଖଣ୍ଡ ଗଛରେ ଲଟକି ରହିଛି। ସେହି ଅଞ୍ଚଳଗୁଡ଼ିକ ଯାଞ୍ଚ କରାଗଲେ ଆହୁରି କିଛି ମନୁଷ୍ୟ ଶରୀରର ଅଙ୍ଗପ୍ରତ୍ୟଙ୍ଗ ମିଳିପାରେ ବୋଲି କୁହାଯାଉଛି।