ରାଜ୍ୟରେ ସରି ଆସୁଛି କୋଭିଡ ଟିକା : ଆଜି ଦିନ ୨ଟା ସୁଦ୍ଧା ପହଂଚିବ ୩ଲକ୍ଷ ୫୦ ହଜାର କୋଭିସିଲଡ ଡୋଜ
କନକ ବ୍ୟୁରୋ : ରାଜ୍ୟରେ ଜୋରସୋରରେ ଚାଲିଛି ଟିକାକରଣ କାମ । ହେଲେ ଦିନକ ଭିତରେ ରାଜ୍ୟରେ ମହଜୁଦ ଥିବା ଟିକା ଶେଷ ହୋଇଯିବାର ଆଶଙ୍କା ରହିଛି । ତେଣୁ ତୁରନ୍ତ ୧୫ଲକ୍ଷ କୋଭିସିଲଡ ଟିକା ଯୋଗାଇଦେବାକୁ କେନ୍ଦ୍ରକୁ ଅନୁରୋଧ କରିଛନ୍ତି ରାଜ୍ୟ ସରକାର । ସୋମବାର ସକାଳ ସୁଦ୍ଧା ରାଜ୍ୟରେ ୬ଲକ୍ଷ ୨ହଜାର ୪୩୦ କୋଭିସିଲଡ ଓ ୧ଲକ୍ଷ ୪୮ ହଜାର ୫୫୦ କୋଭାକସିନ ଡୋଜ ଉପଲବ୍ଧ ଥିଲା । ଏପଟେ ସୋମବାର ଗୋଟିଏ ଦିନରେ ୨ଲକ୍ଷ ୬୩ ହଜାର ୪୧ ଡୋଜ ଟିକା ଦିଆଯାଇସରିଛି । ଯଦି କେନ୍ଦ୍ର ତୁରନ୍ତ ଟିକା ଯୋଗାଇ ନଦେବ ତାହେଲେ ରାଜ୍ୟରେ ଟିକାକରଣ ପ୍ରକ୍ରିୟାରେ ବିରାଟ ସମସ୍ୟା ସୃଷ୍ଟି ହୋଇପାରେ ।
Kanak News is now on WhatsApp
Join and get latest news updates delivered to you via WhatsApp
ଆଜି ଦିନ ୨ଟା ସୁଦ୍ଧା କେନ୍ଦ୍ର ୩ଲକ୍ଷ ୪୯ ହଜାର ୧୩୦ କୋଭିସିଲଡ ଟିକା ଯୋଗାଇ ଦେବାପାଇଁ ପ୍ରତିଶ୍ରୁତି ଦେଇଛି । ହେଲେ ରାଜ୍ୟରେ ଚାଲିଥିବା ବ୍ୟାପକ ଟିକାକରଣ ପାଇଁ ଏହା ସମୁଦ୍ରକୁ ଶଂଖେ । ଏପଟେ ସୀମାବର୍ତୀ ଜିଲ୍ଲାଗୁଡିକରେ ସଂକ୍ରମଣ ବଢୁଥିବାରୁ ରାଜ୍ୟ ସରକାର ସଂପୂର୍ଣ୍ଣ ଆଲର୍ଟର ଅଛନ୍ତି । ଏସବୁ ସ୍ଥାନରେ ଟିକାକରଣକୁ ତ୍ୱରାନ୍ୱିତ କରିବାକୁ ସିଡିଏମଓ ଓ ଜିଲ୍ଲାପାଳମାନଙ୍କୁ କୁହାଯାଇଛି । କୋଭାକ୍ସିନ ଭୁବନେଶ୍ୱରରେ ଦିଆଯାଉଥିବାବେଳେ ରାଜ୍ୟର ଅନ୍ୟ ସବୁ ସ୍ଥାନରେ କୋଭିସିଲ୍ଡ ଦିଆଯାଉଛି ।
ରାଜ୍ୟରେ ୧ କୋଟି ୧୬ ଲକ୍ଷ ଲୋକଙ୍କୁ ଟିକାକରଣ କରାଯିବା ନେଇ ଟାର୍ଗେଟ ରହିଛି । ବର୍ତମାନ ସୁଦ୍ଧା ୩୫ ଲକ୍ଷ ୬୭ ହଜାର ୮୧୦ ଜଣଙ୍କୁ ଟିକା ଦିଆଯାଇଛି । ରାଜ୍ୟରେ ବଢୁଥିବା ଗ୍ରୀଷ୍ମପ୍ରବାହକୁ ଆଖି ଆଗରେ ରଖି ଟିକାକରଣ ସମୟରେ ପରିବର୍ତନ ଆଣିଛନ୍ତି ସରକାର । ଏଣିକି ସକାଳ ୮ଟାରୁ ୧୨ଟା ଓ ଅପରାହ୍ନ ୩ଟାରୁ ୬ଟା ଯାଏଁ ଟିକା ଦିଆଯିବ ।