ମୁହଁରେ ମାସ୍କ ଆଉ ହାତରେ କୁରାଢୀ । ସାମାଜିକ ଦୂରତା ରଖି ରଥଖଳାରେ ରଥ ନିର୍ମାଣ କରୁଛନ୍ତି ବିଶ୍ୱକର୍ମା ସେବାୟତ ।
କନକ ବ୍ୟୁରୋ: ଦ୍ୱିତୀୟ ଦିନରେ ଆଗେଇ ଚାଲିଛି ରଥ ନିର୍ମାଣ କାମ । ମୁହଁରେ ମାସ୍କ ଆଉ ହାତରେ କୁରାଢୀ । ରଥଖଳାରେ ସବୁ କଟକଣାକୁ ପାଳନ କରି ରଥ ନିର୍ମାଣ କାମରେ ନିୟୋଜିତ ବିଶ୍ୱକର୍ମା ସେବାୟତ । ରଥଖଳାକୁ ବ୍ୟାରିକେଡିଂ ଓ କପଡାରେ ଆବଦ୍ଧ କରାଯାଇଛି । ଗୃହ ମନ୍ତ୍ରାଳୟର ସର୍ତ ଅନୁସାରେ ରଥଖଳାରେ ସାମାଜିକ ଦୂରତାକୁ ପାଳନ କରି ବିଶ୍ୱକର୍ମା ସେବାୟତମାନେ ରଥ ନିର୍ମାଣ କାର୍ଯ୍ୟରେ ଲାଗିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ରଥ ଖଳା ନିକଟରେ ଲୋକଙ୍କ ସମାବେଶ ଯେପରି ନହେବ ସେଥିପାଇଁ ରଥଖଳାରୁ ୨୦୦ ମିଟର ପର୍ଯ୍ୟନ୍ତ ନିଷେଧାଂଚଳ କରାଯାଇଛି । ଶ୍ରୀମନ୍ଦିର ପ୍ରଶାସନ ଅଫିସ ସମ୍ମୁଖରେ ଥିବା ଦୋଳବେଦି କୋଣ ସାହି, ଦୋଳ ମଣ୍ଡପ ସାହି ରାସ୍ତାକୁ ମଧ୍ୟ ସିଲ କରାଯାଇଛି । ଏବେ ବିଶ୍ୱକର୍ମା ଏବଂ ଭୋଇ ସର୍ଦ୍ଦାରଙ୍କ ମୁଖ୍ୟ ଲକ୍ଷ୍ୟ ହେଲା ରଥ ନିର୍ମାଣ କାମକୁ ଶୀଘ୍ର ଶେଷ କରିବା ।
ସେପଟେ ରଥକାମ ସହ ଏଥିରେ ନିୟୋଜିତ ସମସ୍ତ ସେବାୟତଙ୍କ ସ୍ୱାସ୍ଥ୍ୟକୁ ପ୍ରାଧାନ୍ୟ ଦେଇଛନ୍ତି ଶ୍ରୀମନ୍ଦିର ପ୍ରଶାସନ । କୋଭିଡ୍-୧୯ ପରିସ୍ଥିତିକୁ ନଜରରେ ରଖି ରଥ ଖଳାରେ ନିୟୋଜିତ ମହାରଣା ଓ ଭୋଇ ସେବାୟତଙ୍କୁ ସଚେତନ କରାଯାଇଛି । ସକାଳେ ଓ ସନ୍ଧ୍ୟାରେ ସେବାୟତଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଉଛି । ସେମାନେ ଯେପରି କାହା ସଂସ୍ପର୍ଶରେ ନ ଆସିବେ ସେଥିପାଇଁ ଭକ୍ତ ନିବାସରେ ୧୫୦ ବିଶ୍ୱକର୍ମା ସେବାୟତଙ୍କ ରହିବା ବ୍ୟବସ୍ଥା କରାଯାଇଛି । ବିଳମ୍ବରେ ହେଉ ପଛେ ରଥ ନିର୍ମାଣ କାମ ଜୋର୍ ସୋରରେ ଆଗେଇ ଚାଲିଛି । ରଥଯାତ୍ରାକୁ ନେଇ ଆଗାମୀ ଦିନରେ ସରକାର କଣ ନିଷ୍ପତି ନେଉଛନ୍ତି ତାହା ଦେଖିବାକୁ ବାକି ରହିଲା ।