ବିଶ୍ୱ ଇତିହାସରେ ସବୁଠୁ କଳଙ୍କିତ ଫର୍ଦ୍ଦ ! ଶ୍ରୀଲଙ୍କା ସିରିଜ ବିସ୍ଫୋରଣ ମୃତ୍ୟୁ ସଂଖ୍ୟା ପାଖାପାଖି ୩ଶହ, ମୃତକଙ୍କ ମଧ୍ୟରେ ଅଛନ୍ତି ୫ଭାରତୀୟ ।
କନକ ବ୍ୟୁରୋ : ଶ୍ରୀଲଙ୍କାରେ ସିରିଜ ବିସ୍ଫୋରଣ ହେଲା । ଆଉ ଦୋହଲି ଗଲା ସାରା ଦୁନିଆଁ । ଇଷ୍ଟର ବ୍ଲାଷ୍ଟରେ ମୃତକଙ୍କ ସଂଖ୍ୟା ବଢିବାରେ ଲାଗିଛି । ଶେଷ ଖବର ସୁଦ୍ଧା ୨୯୦ ଜଣଙ୍କ ମୃତ୍ୟୁ ଓ ୫ ଶହରୁ ଅଧିକ ଆହତ ହୋଇଥିବା ସରକାରୀ ସୂତ୍ରରୁ ସୂଚନା ମିଳିଛି । ମୃତକଙ୍କ ମଧ୍ୟରେ ୩୩ଜଣ ବିଦେଶୀ ନାଗରିକ ରହିଛନ୍ତି । ଆଉ ସବୁଠାରୁ ବଡ କଥା ହେଉଛି ମୃତକଙ୍କ ମଧ୍ୟରେ ଅଛନ୍ତି ୫ ଜଣ ଭାରତୀୟ । ଶ୍ରୀଲଙ୍କା ଇତିହାସରେ ଏହାକୁ ସବୁଠାରୁ ଭୟାବହ ଆକ୍ରମଣ ବୋଲି କୁହାଯାଉଛି । ସିରିଜ ବୋମା ବିସ୍ଫୋରଣରେ ବର୍ତମାନ ସୁଦ୍ଧା ୨୪ଜଣଙ୍କୁ ଗିରଫ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀଲଙ୍କା ସ୍ୱାସ୍ଥ୍ୟମନ୍ତ୍ରୀ ରଜିଥା ସେନାରତ୍ନେ କହିଛନ୍ତି ଏହି ସିରିଜ ବିସ୍ଫୋରଣରେ ସମସ୍ତ ଆତ୍ମଘାତୀ ଶ୍ରୀଲଙ୍କାର ନାଗରିକ ବୋଲି ଅନୁମାନ କରାଯାଉଛି । ବର୍ତ୍ତମାନ ସୁଦ୍ଧା ଏହି ଆକ୍ରମଣ ପାଇଁ କୌଣସି ସଂଗଠନ ନିଜକୁ ଦାୟୀ କରି ନାହାନ୍ତି । ତେବେ ଶ୍ରୀଲଙ୍କା ପୁଲିସ ହମଲା ପଛରେ ଚରମପନ୍ଥୀ ଇସଲାମିକ ସଂଗଠନ ନେସନାଲ ତୌହାଦି ଜମାତର ହାତ ଥିବା ସନ୍ଦେହ କରୁଛି । ୨୦୧୩ ମସିହାରେ ଏହି ସଂଗଠନର ନାମ ପ୍ରଥମ ଥର ପାଇଁ ଚର୍ଚ୍ଚାକୁ ଆସିଥିଲା । ଆଇଏସ ଆଇଏସ ସଂଗଠନ ସହ ଏନଟେଜିର ସଂପୃକ୍ତି ନେଇ ଚର୍ଚ୍ଚା ହୋଇଥିଲା । ଏହାପରେ ୨୦୧୪ରେ ବୌଦ୍ଧମୂର୍ତି ଭଙ୍ଗା ଘଟଣାକୁ ନେଇ ତୌହାଦି ଜମାତ ବିରୋଧରେ ଶ୍ରୀଲଙ୍କାର ବିଭିନ୍ନ ସ୍ଥାନରେ ବିରୋଧର ସ୍ୱର ଉଠିଥିଲା ।