ଦିଲ୍ଲୀର ସବୁଠାରୁ ବଡ ଗହଣା ଲୁଟର ହେଲା ପଦ୍ଦାଫାସ, ଜାଣନ୍ତୁ କେମିତି ଯୋଜନାବଦ୍ଧଭାବେ ଲୁଟି ନେଇଥିଲେ ୨୫ କୋଟି ମୂଲ୍ୟର ଗହଣା

କନକ ବ୍ୟୁରୋ : ଦିଲ୍ଲୀର ଏକ ଗହଣା ଦୋକାନରୁ କିଛିଦିନ ତଳେ ହୋଇଥିବା ଲୁଟର ପଦ୍ଦାଫାସ ହୋଇଛି । ଏହି ଲୁଟରେ ସାମିଲ ଥିବା ୩ ଅପରାଧୀଙ୍କୁ ଛତିଶଗଡରୁ ଗିରଫ କରାଯାଇଛି । ଲୁଟ ହୋଇଥିବା ସୁନାକୁ ଉଦ୍ଧାର କରିବାକୁ ପୋଲିସ ଏବେ ବି ବିଭିନ୍ନ ସ୍ଥାନରେ ଚଢାଉ କରୁଛି । ଧରାପଡିଥିବା ଅପରାଧୀଙ୍କ ମଧ୍ୟରୁ ମୁଖ୍ୟ ଅପରାଧୀ ଲୋକେଶ ଶ୍ରୀବାସ୍ତବ ଓ ଅନ୍ୟ ଅଭିଯୁକ୍ତ ଶିବା ଚନ୍ଦ୍ରବଂଶୀଙ୍କ ସହ ଅନ୍ୟଜଣେ ସାମଲ ଅଛି । ପୋଲିସ ସେମାନଙ୍କ ଠାରୁ ଲୁଟ ସୁନା ଗହଣାର କିଛି ଜବତ କରିଛି । ପୋଲିସ ତରଫରୁ କୁହାଯାଇଛି କି ଏହି ଲୁଟେରା ଗ୍ୟାଙ୍ଗ ବିଶେଷ ଭାବେ ଆନ୍ଧ୍ରପ୍ରଦେଶ ଓ ଛତିଶଗଡରେ ଲୁଟ କରିଥାନ୍ତି ।

ସୂଚନା ଥାଉକି ସେପ୍ଟେମ୍ବର ୨୬ ତାରିଖରେ ଦିଲ୍ଲୀର ଭୋଗଲ ଅଞ୍ଚଳରେ ଥିବା ଉମରାଓ ଗହଣା ଦୋକାନରୁ କୋଟି କୋଟି ଟଙ୍କାର ଗହଣା ଚୋରି ହୋଇଯାଇଥିଲା । ଗହଣା ଦୋକାନର ମାଲିକଙ୍କ ହିସାବ ମୁତାବକ ଯେତିକି ଗହଣା ଲୁଟ ହୋଇଥିଲା ତାର ଆନୁମାନିକ ମୂଲ୍ୟ ୨୫ କୋଟି ଟଙ୍କା ହେବ । ଏହାକୁ ଦିଲ୍ଲୀର ସବୁଠାରୁ ବଡ ଲୁଟ୍ ବୋଲି ପୋଲିସ କହିଥିଲା ।

ଚତୁର ଲୁଟେରାମାନେ ବହୁ ସତର୍କତାର ସହିତ ଏହି ଚୋରି ପାଇଁ ଯୋଜନା ପ୍ରସ୍ତୁତ କରିଥିଲେ । ଚୋରମାନେ ଗହଣା ଦୋକାନର କାନ୍ଥ କଣା କରି ସୋରୁମର ଲକର ପର୍ଯ୍ୟନ୍ତ ପହଂଚି ଯାଇଥିଲେ । ଚୋରମାନେ ସୋରୁମର ଚତୁର୍ଥ ମହଲାକୁ ଯାଇ ଛାତର ତାଲା ଭାଙ୍ଗି ତଳକୁ ଆସିଥିଲେ । ଏହାପରେ ସୋରୁମ ମଧ୍ୟରେ ପ୍ରବେଶ କରିବା ପୂର୍ବରୁ ସିସିଟିଭି କନେକସନ କାଟି ଦେଇଥିଲେ । ସବୁଠାରୁ ଆଶ୍ଚର୍ଯ୍ୟର କଥା ହେଉଛି ଷ୍ଟ୍ରଙ୍ଗରୁମରେ ୩ ସ୍ତରର ଲୁହା କାନ୍ଥ ନିର୍ମାଣ କରାଯାଇଥିଲେ ବି ଚୋରମାନେ ଏହାକୁ କାଟି ଷ୍ଟ୍ରଙ୍ଗରୁମ ଭିତରେ ପ୍ରବେଶ କରିଥିଲେ । ଏହାପରେ ଷ୍ଟ୍ରଙ୍ଗରୁମର ଲକରରେ ଥିବା ସମସ୍ତ ଗହଣା ଓ ଟଙ୍କା ନେଇ ଫେରାର ହୋଇଯାଇଥିଲେ ।