ଚର୍ଚ୍ଚାରେ ଉତ୍ତର ପ୍ରଦେଶ ରାଜନୀତି : ୨୪ ବର୍ଷ ପରେ ଗୋଟିଏ ମଂଚରେ ଏକାଠି ହେଲେ ମାୟାବତୀ ଓ ମୁଲାୟମ
କନକ ବ୍ୟୁରୋ : ଗୋଟିଏ ମଂଚରେ ଏକାଠି ହେଲେ ମାୟାବତୀ ଓ ମୁଲାୟମ । ଉତ୍ତର ପ୍ରଦେଶ ରାଜନୀତିର ଏହି ଚିତ୍ର ବେଶ୍ ଚର୍ଚ୍ଚାକୁ ଆସିଛି । କାରଣ ଦୀର୍ଘ ୨୪ ବର୍ଷ ପରେ ଏକାଠି ଦେଖିବାକୁ ମିଳୁଛି ଦୁଇ ନେତାଙ୍କୁ । ୧୯୯୫ ମସିହାର ଗେଷ୍ଟହାଉସ୍ ଘଟଣା ପରଠାରୁ କେବେ ବି ଏହି ଦୁଇ ହେଭିୱ୍ୱେଟଙ୍କୁ ଗୋଟିଏ ମଂଚରେ ଦେଖିବାକୁ ମିଳିନଥିଲା । ହେଲେ ଏବେ କିନ୍ତୁ ରାଜନୀତିର ଚିତ୍ର ବଦଳିଯାଇଛି । ଏବେ କ୍ଷମତାରେ ନାହାନ୍ତି ମାୟାବତୀ, କ୍ଷମତାରେ ନାହାନ୍ତି ମୁଲାୟମ୍ ସିଂ ଯାଦବ । ଉତ୍ତର ପ୍ରଦେଶର ଦୁଇ ପୂର୍ବତନ ମୁଖ୍ୟମନ୍ତ୍ରୀ ଚଳିତ ଲୋକସଭା ନିର୍ବାଚନରେ ମୈନପୁର ଲୋକସଭା ଆସନର ରାଲିରେ ଏକାଠି ହେବାକୁ ବାଧ୍ୟ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚଳିତ ଥର ଉତ୍ତର ପ୍ରଦେଶର ମୈନପୁର ଆସନରୁ ନିର୍ବାଚନ ଲଢୁଛନ୍ତି ସମାଜବାଦୀ ପାର୍ଟି ନେତା ମୁଲାୟମ ସିଂ ଯାଦବ । ଏଠାରେ ଅପ୍ରେଲ ୨୩ ତାରିଖରେ ହେବ ଭୋଟ୍ । ଏବେ ଏହି ଆସନରେ ମୁଲାୟମଙ୍କୁ ଜିତାଇବାକୁ ପ୍ରଚାର ମୈଦାନକୁ ଆସିଛନ୍ତି ବିଏସପି ସୁପ୍ରିମୋ ମାୟାବତୀ । କାରଣ ଏଥର ନିର୍ବାଚନରେ ଉତ୍ତର ପ୍ରଦେଶରେ ସମାଜବାଦୀ ପାର୍ଟି ଓ ବହୁଜନ ସମାଜବାଦୀ ପାର୍ଟି ସହିତ ମେଂଟ କରି ନିର୍ବାଚନ ମୈଦାନକୁ ଆସିଛି । ଫଳରେ ମାୟାବତୀ ତାଙ୍କର ଏକଦା ଘୋର ରାଜନୈତିକ ବିରୋଧୀ ଥିବା ମୁଲାୟମଙ୍କ ପାଇଁ ଭୋଟ୍ ମାଗିବାକୁ ବାଧ୍ୟ ହୋଇଛନ୍ତି । ଦୀର୍ଘ ୨୪ ବର୍ଷ ପରେ ୟୁପି ରାଜନୀତିରେ ପ୍ରଥମଥର ପାଇଁ ଦୁଇ ହେଭିୱେଟ୍ ନେତା ଭୋଟ୍ ପାଇଁ ଗୋଟିଏ ମଂଚରେ ଏକାଠି ବସିଛନ୍ତି ।