ମୋଦୀ ବିରୋଧୀ ମେଳି : କଂଗ୍ରେସ ନେତୃତ୍ୱରେ ୨୪ ବିରୋଧୀ ଦଳଙ୍କ ବୈଠକ; ଆଜି ହେବ ଔପଚାରିକ ଆଲୋଚନା

କନକ ବ୍ୟୁରୋ : ୨୦୨୪ ନିର୍ବାଚନରେ ମୋଦୀଙ୍କୁ ଟକ୍କର ଦେବା ପାଇଁ ଏକାଠି ହୋଇଛନ୍ତି ବିରୋଧୀ । ପାଟନା ପରେ ବେଙ୍ଗାଲୁରୁରେ ବିରୋଧୀ ଦଳଙ୍କ ଆୟୋଜିତ ହୋଇଛି ଦୁଇ ଦିନିଆ ବୈଠକ । ଏହି ବୈଠକର କଂଗ୍ରେସ ନେତୃତ୍ୱ ନେଉଛି। କଂଗ୍ରେସର କହିବା କଥା ହେଲା, ଏଥିରେ ୨୬ ଦଳ ସାମିଲ ହୋଇଛନ୍ତି । କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ବିରୋଧୀ ନେତାଙ୍କ ପାଇଁ ନୈଶ୍ୟ ଭୋଜି ଦେଇଛନ୍ତି ।

ଏଥିରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ପୂର୍ବତନ ସଭାପତି ସୋନିଆ ଗାନ୍ଧି, ରାହୁଲ ଗାନ୍ଧି, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମୁଖ୍ୟମନ୍ତ୍ରୀ ମମତା ବାନାର୍ଜୀ, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ, ବିହାର ମୁଖ୍ୟମନ୍ତ୍ରୀ ନିତିଶ କୁମାର, ଝାଡଖଣ୍ଡ ମୁଖମନ୍ତ୍ରୀ ହେମନ୍ତ ସୋରେନ ସାମିଲ ହୋଇଛନ୍ତି । ତାମିଲନାଡୁ ମୁଖ୍ୟମନ୍ତ୍ରୀ ଷ୍ଟାଲିନ, ଆରଜେଡି ମୁଖ୍ୟ ଲାଲୁ ଯାଦବ, ଶିବସେନା ଉଦ୍ଧବ ଗୋଷ୍ଠୀ ମୁଖ୍ୟ ଉଦ୍ଧବ ଠାକରେ ବି ଏଥିରେ ଯୋଗଦେଇଛନ୍ତି । ଆଜି ଶରଦ ପାୱାର ବୈଠକରେ ସାମିଲ ହେବେ ।

ଆଜି ସବୁ ବିରୋଧୀ ଦଳ ୨୦୨୪ ରଣନୀତି ନେଇ ବିଧିବଦ୍ଧ ଆଲୋଚନା କରିବେ । ସାଧାରଣ ସର୍ବନିମ୍ନ କାର୍ଯ୍ୟସୂଚୀ, ରାଜ୍ୟୱାରି ଆସନ ଭାଗବଣ୍ଟା ଓ ମେଣ୍ଟର ନୂଆ ନାଁ ନେଇ ଆଲୋଚନା ହୋଇପାରେ । ୟୁପିଏର ଚେୟାରମ୍ୟାନ ଭଳି ନୂଆ ମେଂଟ ବି ଜଣେ ଚେୟାରମ୍ୟାନ ରହିପାରନ୍ତି । ଆଉ ସବୁଠାରୁ ବଡ ଦଳ ଭାବେ କଂଗ୍ରେସ ଏଥିପାଇଁ ଦାବି କରିପାରେ । ୨୩ ଜୁନରେ ପାଟନାରେ ହୋଇଥିବା ବୈଠକରେ ନୀତିଶ କୁମାରଙ୍କୁ ସଂଯୋଜକ କରିବା ସପକ୍ଷରେ ଅନେକ ବିରୋଧୀ ଦଳ ମତ ଦେଇଥିଲେ ।