ଗଞ୍ଜାମରେ ଜନପ୍ରତିନିଧି ମାଗୁଛନ୍ତି ସୁରକ୍ଷା : ଜୀବନ ପ୍ରତି ବିପଦ ଥିବା ଆଶଙ୍କା କଲେ ଏକାଧିକ ସମିତି ସଭ୍ୟ

କନକ ବ୍ୟୁରୋ : ଗଞ୍ଜାମରେ ରାଜନୈତିକ ହିଂସା ତେଜିବାରେ ଲାଗିଛି । ଆଗକୁ ଦିଗପହଣ୍ଡି ବ୍ଲକ ଅଧ୍ୟକ୍ଷା ଉପନିର୍ବାଚନ ଥିବାରୁ ମାସକ ଭିତରେ ତିନି ଜଣ ରାଜନେତାଙ୍କ ହତ୍ୟା ପରେ ଆତଙ୍କରେ ଅଛନ୍ତି ନେତାମାନେ । । ଆସନ୍ତା ୪ ତାରିଖରେ ବ୍ଲକ ଅଧ୍ୟକ୍ଷା ଉପନିର୍ବାଚନ ହେବ । ବିଜେଡିର ଦୁଇ ଗୋଷ୍ଠୀ ବିପ୍ଳବ ପାତ୍ର ଓ ବିପିନ ପ୍ରଧାନଙ୍କ ସମର୍ଥକଙ୍କ ମଧ୍ୟରେ ବିବାଦ ଲାଗି ରହିଛି ।

ଗଞ୍ଜାମରେ ଯେଉଁଭଳି ଭାବେ ନେତାମାନଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରି ହତ୍ୟା କରାଯାଉଛି, ତାହା ବିପିନ ଗୋଷ୍ଠୀଙ୍କ ଭିତରେ ଭୟର ବାତାବରଣ ସୃଷ୍ଟି କରିଛି । ବିପିନଙ୍କ ସମର୍ଥିକ ୧୪ଜଣ ସମିତି ସଭ୍ୟ ନିଜକୁ ଅସୁରକ୍ଷିତ ମନେ କରୁଛନ୍ତି । ସେମାନଙ୍କୁ କାଳେ କିଏ ଅପହରଣ ବା ହତ୍ୟା କରିଦେବ, ସେନେଇ ଆତଙ୍କରେ ଅଛନ୍ତି । ସେଥିପାଇଁ ୨୪ ଘଂଟା ଦିଗପହଣ୍ଡି ବ୍ଲକର ପ୍ରତି ପଞ୍ଚାୟତର ଲୋକେ ପାଳି ପାଳି ନିଜ ନେତାଙ୍କୁ ଜଗୁଛନ୍ତି ।

ଏପରିକି ଅଜ୍ଞାତବାସରେ ଥିବା ବେଳେ ଆନ୍ଧ୍ରର ସୀମାଞ୍ଚଳ ମନ୍ଦିରରେ କିଛି ଦୁର୍ବୃତ୍ତ ବିପିନ ଓ ତାଙ୍କ ସମର୍ଥକଙ୍କୁ ଅପହରଣ ଉଦ୍ୟମ କରିଥିବା ଅଭିଯୋଗ ହୋଇଥିଲା । ତେଣୁ ଆସନ୍ତା ଉପନିର୍ବାଚନ ପୂର୍ବରୁ ବିପିନ ସମର୍ଥିତ ୧୪ଜଣ ସମିତି ସଭ୍ୟ ଜିଲ୍ଲା ପ୍ରଶାସନକୁ ସୁରକ୍ଷା ପାଇଁ ନିବେଦନ କରିଛନ୍ତି । ସୂଚନା ଅନୁସାରେ, ଦିଗପହଣ୍ଡିରେ ଦୁଇ ଗୋଷ୍ଠୀଙ୍କ ବିବାଦ ଯୋଗୁଁ ବିପିନଙ୍କୁ ବିଜେଡି ବହିଷ୍କାର କରିଥିଲା । ବର୍ତ୍ତମାନ ବିପ୍ଳବଙ୍କ ପାଖରେ ୧୪ ସମିତି ସଭ୍ୟ ଏବଂ ବିପ୍ଳବଙ୍କ ପାଖରେ ୧୦ ସମିତି ସଭ୍ୟଙ୍କ ସମର୍ଥନ ରହିଛି ।