ସଙ୍କଟରେ ଜୀବନ-ଜୀବିକା : ରୋଜଗାର ହରାଇଛନ୍ତି ୨ଲକ୍ଷ ଅଟୋ ଚାଳକ, ଦେଇପାରୁନାହାନ୍ତି ଋଣ କିସ୍ତି; ଘରଭଡ଼ା ପାଇଁ ଟଙ୍କା ନଥିବାରୁ ଏବେ ଗାଁ ମୁହାଁ
କନକ ବ୍ୟୁରୋ : କ’ ଣ କରିବେ, କେମିତି ଚଳାଇବେ ତାଙ୍କ ପରିବାର? ଏହି ଚିନ୍ତାରେ ହଜାର ହଜାର ଅଟୋ ଚାଳକ । ଅଟୋ ଗଡୁନି କି ଗଡ଼ାଇବା ପାଇଁ ପାଖରେ ସମ୍ବଳ ବି ନାହିଁ । ଏପଟେ ବ୍ୟାଙ୍କ ଖାତାରେ ବଢ଼ି ଚାଲିଛି ଋଣଭାର। ସ୍ଥିତି ଏମିତି ଯେ, ଘରଭଡ଼ା ଦେବାକୁ ଟଙ୍କା ନଥିବାରୁ ଏବେ ଅଟୋଚାଳକ ସହର ଛାଡ଼ି ଗାଁ ମୁହାଁ ହୋଇଛନ୍ତି । ଯେଉଁମାନେ ପଡ଼ି ରହିଛନ୍ତି, ସେମାନଙ୍କ ଅବସ୍ଥା ସଙ୍ଗିନ। କେବଳ କଟକ ନୁହେଁ; ରାଜ୍ୟର ପାଖାପାଖି ୨ ଲକ୍ଷ ଅଟୋଚାଳକ ଏବେ ସେମାନଙ୍କ ଜୀବିକା ଚିନ୍ତାରେ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ରାଜ୍ୟରେ ନିଖିଳ ଓଡିଶା ଅଟୋ ଚାଳକ ମହାସଂଘ ଅଧୀନରେ ରହିଛନ୍ତି ପାଖାପାଖି ଦେଢ ଲକ୍ଷ ଅଟୋ । ସେମାନଙ୍କର ପ୍ରତି ଜିଲ୍ଲାରେ ସଂଘ ମଧ୍ୟ ରହିଛି । ଏହା ବାଦ୍ ରାଜ୍ୟରେ ଅଟୋ, ଟାଟା ମ୍ୟାଜିକ୍, ଡାଲା ଅଟୋ ଆଦି ସଂଖ୍ୟାକୁ ଯଦି ମିଶାଯାଏ ତେବେ ଏହା ୨ ଲକ୍ଷ ଟପିଯିବ। ଲକ୍ଡାଉନ୍ ପରଠାରୁ ୫ମାସ ହେଲା ସେମାନଙ୍କ ଜୀବନଜୀବିକା ବ୍ୟାପକ ଭାବେ ପ୍ରଭାବିତ । ପ୍ରଶାସନ ଅଟୋ ଚଳାଚଳ ପାଇଁ ଅନୁମତି ଦେଉଥିଲେ ସୁଦ୍ଧା କାଁ ଭାଁ ଅଟୋକୁ ଛାଡ଼ି ବାକି ସବୁ ଅଟୋ ବନ୍ଦ। ଯେଉଁ ସବୁ ଅଟୋକୁ ଚଳାଚଳ ପାଇଁ ଅନୁମତି ମିଳୁଛି, ସେଥିରେ ବି ଗ୍ରାହକ ଆସୁ ନଥିବାରୁ ଖାଲିରହୁଛି ଅଟୋ ।
ଅଧିକାଂଶ ଅଟୋଚାଳକ ବିଭିନ୍ନ ସଂସ୍ଥାରୁ ଋଣ କରିଥିବାବେଳେ ଏବେ କିସ୍ତି ଟଙ୍କା କିଭଳି ପୈଠ କରିବେ, ସେ ଚିନ୍ତାରେ ବସିଛନ୍ତି । ପରିବାର ପାଇଁ ଖାଦ୍ୟର ବ୍ୟବସ୍ଥା କରିବେ ନା ଋଣ ପରିଶୋଧ କଥା ଚିନ୍ତା କରିବେ, ତାହାକୁ ନେଇ ଆଶଙ୍କାରେ ପଡ଼ିଛନ୍ତି । ଏଭଳି ସ୍ଥିତିରେ ଅନେକ ଅଟୋଚାଳକ ଏବେ ଅନ୍ୟ ବେଉସା ପାଇଁ ଆଗକୁ ଆସିଲେଣି । ଏପଟେ କିସ୍ତି ଟଙ୍କା ପଇଠ ପାଇଁ ବାରମ୍ବାର ଫୋନ ଆସୁଛି । ଭୟରେ ବି ଅନେକ ଫୋନ ଉଠାଉ ନାହାନ୍ତି ।