୨୦୦୦ ଟଙ୍କିଆ ନୋଟ ବଦଳାଇବା ବିରୋଧରେ ଆବେଦନ ସୁପ୍ରିମକୋର୍ଟରେ ଖାରଜ, ଜାଣନ୍ତୁ କଣ କହିଲେ କୋର୍ଟ ?
କନକ ବ୍ୟୁରୋ : ପରିଚୟ ପତ୍ର ନଦେଇ ୨୦୦୦ ଟଙ୍କିଆ ନୋଟ ବଦଳାଇବା ବିରୋଧରେ ସୁପ୍ରିମକୋର୍ଟରେ ହୋଇଥିବା ଆବେଦନ ଉପରେ ତୁରନ୍ତ ଶୁଣାଣି କରିବାକୁ ସୁପ୍ରିମକୋର୍ଟ ମନା କରିଛନ୍ତି । କୋର୍ଟର ଅବକାଶକାଳୀନ ବେଞ୍ଚ କହିଛନ୍ତି କି, ଏହା ଏଭଳି ମାମଲା ନୁହେଁ ଯାହା ଉପରେ ତୁରନ୍ତ ଶୁଣାଣି କରାଯିବାର ଆବଶ୍ୟକତା ରହିଛି । ଆବେଦନକାରୀ ଗ୍ରୀଷ୍ମକାଳୀନ ଛୁଟି ପରେ ମୁଖ୍ୟ ବିଚାରପତିଙ୍କ ନିକଟରେ ଶୁଣାଣି ପାଇଁ ଅନୁରୋଧ କରିପାରିବେ । ଏହା ପୂର୍ବରୁ ବି ଦିଲ୍ଲୀ ହାଇକୋର୍ଟ ସମାନ ଆବେଦନ ଉପରେ ଶୁଣାଣି କରିବାକୁ ମନା କରିଦେଇଥିଲେ । ଆବେଦନକାରୀ ହାଇକୋର୍ଟଙ୍କ ରାୟକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଆବେଦନକାରୀଙ୍କ ଓକିଲ ଅଶ୍ୱନୀ ଉପାଧ୍ୟାୟଙ୍କ କହିବା କଥା କି, ଜଣେ ଲୋକ ଯଦି ବିନା ପ୍ରମାଣ ପତ୍ରରେ ୨୦୦୦ ଟଙ୍କିଆ ନୋଟ ବଦଳ କରେ ତେବେ ଏହା ଦୁର୍ନୀତି ଓ ଦେଶ ବିରୋଧୀ ତତ୍ୱଙ୍କୁ ଲାଭ ପହଂଚାଇବ । ମେ’୨୯ ତାରିଖରେ ଦିଲ୍ଲୀ ହାଇକୋର୍ଟ ଏହାକୁ ନୀତିଗତ ମାମଲା କରି ଆବେଦନକୁ ଖାରଜ କରିଦେଇଥିଲେ । ସୁପ୍ରିମକୋର୍ଟର ଜଷ୍ଟିଷ ସୁଧାଂସୁ ଧୂଲିଆ ଓ ଜଷ୍ଟିସ ବିଶ୍ୱନାଥନଙ୍କ ବେଞ୍ଚ ସାମ୍ନାରେ ଆବେଦନକାରୀଙ୍କ ଓକିଲ ଦଲିଲ୍ ଦେଇଥିଲେ କି ରିଜର୍ଭ ବ୍ୟାଙ୍କର ଏଭଳି ନିଷ୍ପତ୍ତି ମନମାନୀ ଓ ଏହାକୁ ମଞ୍ଜୁରୀ ପ୍ରଦାନ କରି ହାଇକୋର୍ଟ ଭୁଲ କରିଛନ୍ତି ।
ଆବେଦନରେ କୁହାଯାଇଛି କି, ଦୁର୍ନୀତିଖୋର ଲୋକ, ମାଫିଆ ଓ ଦେଶ ବିରୋଧୀ ତତ୍ୱଙ୍କ ପାଖରେ ୩ଲକ୍ଷ କୋଟି ଟଙ୍କାର ୨ ହଜାର ଟଙ୍କିଆ ନୋଟ ଥିବା ଆଶଂକା କରାଯାଉଛି । ତେଣୁ ବିନା ପ୍ରମାଣପତ୍ରରେ ଏହାକୁ ସେମାନେ ସହଜରେ ବଦଳାଇପାରିବେ ବୋଲି ଆବେଦନରେ ଅଭିଯୋଗ କରାଯାଇଛି ।