ଯେବେ ପ୍ରତିରକ୍ଷା ମନ୍ତ୍ରୀ ଥିଲେ ପାରିକର ! ନାକରେ ପାଣି ପିଇଥିଲେ ଆତଙ୍କବାଦୀ, ପାକିସ୍ତାନ ଓ ମିଆଁମାରରେ ହୋଇଥିଲା ସର୍ଜିକାଲ ଷ୍ଟ୍ରାଇକ
କନକ ବ୍ୟୁରୋ : ପରପାରିରେ ପାରିକର । ଗୋଆ ମୁଖ୍ୟମନ୍ତ୍ରୀ ମନୋହର ପାରିକର ୬୩ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ଦେଶ ନିଜର ବୀର ପୁଅକୁ ହରାଇଛି । ରାଜନୀତିରେ ସରଳ ସ୍ୱଭାବର ଏହି ନେତା ଦେଶ ପ୍ରତି ବର୍ଗର ଲୋକଙ୍କ ମନରେ ନିଜର ଏକ ସ୍ୱତନ୍ତ୍ର ଛାପ ଛାଡିଛାନ୍ତି । ୪ଥର ଗୋଆର ମୁଖ୍ୟମନ୍ତ୍ରୀ ଓ ଥରେ ଦେଶର ପ୍ରତିରକ୍ଷା ମନ୍ତ୍ରୀ ଦାୟିତ୍ୱ ତୁଳାଇଥିବା ପାରିକର ଏବେ ଚିରନିଦ୍ରାରେ । ତେବେ ତାଙ୍କର କାର୍ଯ୍ୟଶୈଳୀ ପୂରା ତାଙ୍କୁ ଦେଶବାସୀଙ୍କ ମନରେ ସବୁବେଳେ ଜୀବିତ ରଖିବ ।
Kanak News is now on WhatsApp
Join and get latest news updates delivered to you via WhatsApp
ପ୍ରତିରକ୍ଷା ମନ୍ତ୍ରୀ ଥିବା ବେଳେ ପାରିକର ଯେଉଁ ଅଦ୍ୟମ ସାହସ ଦେଖାଇଛନ୍ତି ତାହାକୁ ଆଜି ପର୍ଯ୍ୟନ୍ତ ପୂରା ଦେଶବାସୀ ସଲାମ କରୁଛନ୍ତି । ୨୦୧୪ରେ କେନ୍ଦ୍ରରେ ମୋଦି ସରକାର ଆସିବା ପରେ ପାରିକରଙ୍କୁ ଖୋଜା ପଡିଥିଲା । ପାରିକରଙ୍କ ହାତରେ ଦେଶର ସୁରକ୍ଷା ଦାୟିତ୍ୱ ଦେଇଥିଲେ ମୋଦି । ଆଉ ଏହାକୁ ବେଶ ସଫଳତାର ସହ ତୁଲାଇଥିଲେ ପାରିକର । ରକ୍ଷା ମନ୍ତ୍ରୀ ଥିବା ବେଳେ ଭାରତୀୟ ସେନାର ୨ଟି ବଡ ଅପରେସନକୁ ଗ୍ରୀନ୍ ସିଗନାଲ ଦେବା ସହ ଏହାକୁ ସଫଳ କରିଥିଲେ ପାରିକର ।
ଉରୀ ଆତଙ୍କବାଦୀ ଆକ୍ରମଣ ପରେ ନଭେମ୍ବର ୨୦୧୭ରେ ଭାରତୀୟ ସେନା ପାକିସ୍ତାନ ସୀମା ମଧ୍ୟରେ ପଶି ଯେଉଁ ସର୍ଜିକାଲ ଷ୍ଟ୍ରାଇକ କରିଥିଲା ତାହା ପଛର ମୁଖ୍ୟ ବିନ୍ଧାଣୀ ଥିଲେ ପାରିକର । ସର୍ଜିକାଲ ଷ୍ଟ୍ରାଇକ କରି ଆତଙ୍କୀ ଶିବିରକୁ ମାଟିରେ ମିଶାଇ ଦେଇଥିଲେ ଭାରତର ବୀର ଯବାନ । ଏହି ଅପରେସନରେ ପାରା ସ୍ପେଶାଲ ଫୋର୍ସର ୨୫ ଜଣ କମାଣ୍ଡୋ ଏମଆଇ-୧୭ ହେଲିକପ୍ଟରରେ ପିଓକେରେ ତିନି କିଲୋମିଟର ଭିତରକୁ ପ୍ରବେଶ କରି ଆତଙ୍କବାଦୀଙ୍କୁ ନିପାତ କରିଥିଲେ ।
ଏହାପୂର୍ବରୁ ୪ ଜୁନ୍ ୨୦୧୫ରେ ମଣିପୁରର ଚନ୍ଦେଲ ଜିଲ୍ଲାରେ ଉଗ୍ରବାଦୀଙ୍କ ଆକ୍ରମଣରେ ୧୮ ଜଣ ଯବାନ ସହିଦ ହୋଇଥିଲେ । ତେଣୁ ଏହାର ପ୍ରତିଶୋଧ ନେବାକୁ ମିଆଁମାର ସୀମାରେ ଲୁଚି ରହିଥିବା ଉଗ୍ରବାଦୀଙ୍କୁ ନିପାତ କରିବାକୁ ଭାରତୀୟ ପାରାକମାଣ୍ଡୋ ମାନେ ଆରମ୍ଭ କରିଥିଲେ ଅପରେସନ । ଆଉ ଏହି ଅପରେସନ ମଧ୍ୟ ପାରିକରଙ୍କ କାର୍ଯ୍ୟକାଳ ମଧ୍ୟରେ ହୋଇଥିଲା । ଭାରତୀୟ ପାରାକମାଣ୍ଡୋ ମାନେ ମିଆଁମାର ସୀମାରେ ପଶି ଦୁଇଟି ଆତଙ୍କୀ ଶିବିରକୁ ଧ୍ୱଂସ କରିଥିଲେ । ଯେଉଁଥିରେ ପ୍ରାୟ ୧୦୦ ଜଣ ଉଗ୍ରବାଦୀ ନିପାତ ହୋଇଥିଲେ । ଏହି ଅପରେସନରେ ୭୦ ଜଣ କମାଣ୍ଡୋ ସାମିଲ ଥିଲେ ଓ ଏହା ପ୍ରାୟ ୪୦ ମିନିଟ ଧରି ଚାଲିଥିଲା । ତେବେ ୨୦୧୭ ମସିହାରେ ଗୋଆରେ ରାଜନୈତିକ ସଙ୍କଟ ଦେଖା ଦେବାରୁ ପୁଣିଥରେ ମୁଖ୍ୟମନ୍ତ୍ରୀ ଭାବେ ଗୋଆକୁ ଫେରିଥିଲେ ପାରିକର । କିନ୍ତୁ ପ୍ରତିରକ୍ଷା ମନ୍ତ୍ରୀ ଥିବା ସମୟରେ ପାରିକର ଯେଉଁ ସାହସ ଦେଖାଇଥିଲେ ତାହାକୁ ଆଜି ପୂରା ଦେଶବାସୀ ସଲାମ କରୁଛନ୍ତି ।