ଏକାଠି ଶୋଇଥିଲେ, ଏକାଠି ଶ୍ମଶାନ ଗଲେ: ମାଆ କୋଳରୁ ଦୁଇ ଝିଅଙ୍କୁ ଛଡାଇନେଲା କାଳସର୍ପ
କନକ ବ୍ୟୁରୋ: କାଲି ଏଇଠି ଦିହେଁ ଶୋଇଥିଲେ । ଗୋଟିଏ ଖଟରେ ଶୋଇ ଗୋଟିଏ ଚାଦରକୁ ଟଣାଭିଡା ହେଉଥିଲେ । ମୁଁ ଏପଟେ ଶୋଇବିନି, ସେପଟେ ଶୋଇବି… ମୋତେ ସେଇ ତକିଆଟା ଦେ, ମୋ ସୁନା ଭଉଣୀଟା ପରା… ଦେଇ ଦେ…ଏମିତି କିଛି ମିଠା ମୁହୂର୍ତ୍ତ କାଟି ଗୋଟିଏ ଖଟରେ ଜାକିଜୁକି ଶୋଇଯାଇଥିଲେ ଦୁଇ ଭଉଣୀ ରୋଜାଲିନ ଆଉ ସୁଜାତା । ହେଲେ ରାତି ପାହିବା ପରେ ଭାଗ ଭାଗ ହୋଇଥିଲା ସେମାନଙ୍କ ବିଛଣା । କୋକେଇରେ ବଦଳିଥିଲା ଶୋଇଥିବା କାଠ ଖଟ । ଆଉ ଶେଯରୁ ଶ୍ମଶାନ ଯିବା ପାଇଁ ଦାଣ୍ଡରେ ସଜଡା ସରିଥିଲା ଦୁଇ ଦୁଇଟି କୋକେଇ…
Kanak News is now on WhatsApp
Join and get latest news updates delivered to you via WhatsApp
ସାପ କାମୁଡାରେ ଦୁଇ ଝିଅ ଆଖି ବୁଜିବା ପରେ ମାଟିରେ ମୁଣ୍ଡ ପିଟି କାନ୍ଦୁଛି ମାଆ । ଝିଅକୁ ହରାଇ ବାକଶୂନ୍ୟ ହୋଇଛନ୍ତି ବାପା । ଆଉ ଦୁଇ କଅଁଳ କଢିକୁ ହରାଇ ଲୁହ କୋହରେ ଫାଟି ପଡୁଛି ଅନୁଗୁଳ ବେନ୍ତପୁର ଗାଁ ।
ଗତକାଲି ରାତିରେ ଦୁଇ ଭଉଣୀଙ୍କୁ ସାପ କାମୁଡିବା ପରେ ସେମାନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟ ନିଆଯାଇଥିଲା ମାତ୍ର ସେଠୁ କଟକ ସ୍ଥାନାନ୍ତର ବେଳେ ଆଜି ସକାଳୁ ମାଆ କୋଳରେ ସେମାନଙ୍କ ଜୀବନ ଯାଇଥିଲା । ତେବେ ପାଠ ପଢି ବଡ ମଣିଷ ହେବାର ସ୍ୱପ୍ନ ଦେଖିଥିବା ଦୁଇ ଭଉଣୀଙ୍କ ସ୍ୱପ୍ନ ଅଧାରେ ରହିଯିବା ପରେ ଏବେ ତାଙ୍କ ପଢାବହିକୁ ଧରି ଝୁରି ହେଉଛି ମାଆ । ନିଜ ଘରର ଦୁଇ କୁନି କୁସୁମଙ୍କୁ ହରାଇବା ପରେ ଏବେ ପଢାବହି ‘ସାହିତ୍ୟ କୁସୁମ’କୁ ଶ୍ମଶାନକୁ ଦେଇ ଦେଇଛି ମାଆ ।
ହୁଏତ ଦୁର୍ଗାପୂଜାରେ ଦୁଇ ଭଉଣୀ ନୂଆ ଜାମା ପାଇଁ ବାପାଙ୍କ ପାଖରେ ଅଳି କରିଥାନ୍ତେ, ଅଝଟ ହୋଇଥାନ୍ତେ । ହେଲେ ସେ ଅଳି ପୂର୍ବରୁ ଦୁହେଁ ଆର ପାରିକୁ ଚାଲିଗଲା । ଆଉ ସେମାନଙ୍କ ସହ ଶ୍ମଶାନକୁ ଚାଲିଗଲା ପୁରୁଣା ଦିନର ସାଇତା ସ୍ମୃତି ଆଉ ଅଭୁଲା ଅଝଟ ।