ଛାତ୍ରଛାତ୍ରୀ ସାବଧାନ…! ଆପଣ ନକଲି ବିଶ୍ୱବିଦ୍ୟାଳୟରେ ପଢୁନାହାନ୍ତି ତ ପାଠ? ରାଜ୍ୟରେ ରହିଛି ୨ଟି ନକଲି ବିଶ୍ୱବିଦ୍ୟାଳୟ, ୟୁଜିସି ଜାରି କଲା ତାଲିକା । ଜାଣନ୍ତୁ କେଉଁଠି ରହିଛି ଏହି ଜାଲି ବିଶ୍ୱବିଦ୍ୟାଳୟ ।
କନକ ବ୍ୟୁରୋ : ଛାତ୍ରଛାତ୍ରୀ ସାବଧାନ । ଆପଣ ନକଲି ବିଶ୍ୱବିଦ୍ୟାଳୟରେ ପଢୁନାହାନ୍ତି ତ ପାଠ । କାରଣ ଶିକ୍ଷା ନାଁରେ ହେଉଛି ସାଂଘାତିକ ଠକେଇ । ଏନେଇ ଛାତ୍ରଛାତ୍ରୀଙ୍କୁ ଆଗୁଆ ସର୍ତକ କରିଛି ୟୁଜିସି । ସମଗ୍ର ଦେଶରେ ସରକାରଙ୍କୁ ଭୂଆଁ ବୁଲାଇ ୨୪ଟି ‘ଆତ୍ମଘୋଷିତ’ ଓ ‘ଅଣସ୍ୱୀକୃତ’ ବିଶ୍ୱବିଦ୍ୟାଳୟ ସେମାନଙ୍କର ବ୍ୟବସାୟ ଚଲାଇଥିବା ଆଜି ୟୁଜିସି ପକ୍ଷରୁ ପ୍ରକାଶିତ ଏକ ବିଜ୍ଞପ୍ତିରେ କୁହାଯାଇଛି। ଏଥିସହ ଏହି ସମସ୍ତ ‘ଆତ୍ମଘୋଷିତ’ ଓ ‘ଅଣସ୍ୱୀକୃତ’ ବିଶ୍ୱବିଦ୍ୟାଳୟଗୁଡ଼ିକର ତାଲିକା ମଧ୍ୟ ପ୍ରକାଶ କରିଛି ୟୁଜିସି। ଏଥିରେ ଓଡ଼ିଶାର ୨ଟି ବିଶ୍ୱବିଦ୍ୟାଳୟ ରହିଥିବା ବେଳେ ଉତ୍ତରପ୍ରଦେଶରେ ୮ଟି, ଦିଲ୍ଲୀରେ ୭ଟି, କେରଳ, କର୍ଣ୍ଣାଟକ, ମହାରାଷ୍ଟ୍ର,, ଆନ୍ଧ୍ରପ୍ରଦେଶ ଓ ପୁଡ଼ୁଚେରିରେ ଗୋଟିଏ କରି ଜାଲି ବିଶ୍ୱବିଦ୍ୟାଳୟ ରହିଥିବା ଜାଣିବାକୁ ମିଳିଛି। ସେହିଭଳି ପଶ୍ଚିମବଙ୍ଗରେ ୨ଟି ନକଲି ବିଶ୍ୱବିଦ୍ୟାଳୟ ରହିଛି । ଏଥିସହ ଏହି ସମସ୍ତ ଜାଲି ବିଶ୍ୱବିଦ୍ୟାଳୟ ଗୁଡ଼ିକରେ ନାମ ନ ଲେଖାଇବା ପାଇଁ ଛାତ୍ରଛାତ୍ରୀମାନଙ୍କୁ ସାବଧାନ କରି ଦେଇଛି ୟୁଜିସି।
Kanak News is now on WhatsApp
Join and get latest news updates delivered to you via WhatsApp
ଓଡ଼ିଶାର ରାଉରକେଲାରେ ନବଭାରତ ଶିକ୍ଷା ପରିଷଦ ଏବଂ ମୟୂରଭଞ୍ଜରେ ଥିବା ନର୍ଥ ଓଡ଼ିଶା ୟୁନିଭର୍ସିଟି ଅଫ୍ ଏଗ୍ରିକଲଚର ଆଣ୍ଡ ଟେକ୍ନୋଲୋଜି ବିଶ୍ୱବିଦ୍ୟାଳୟ ସମ୍ପୂର୍ଣ୍ଣ ନକଲି ବୋଲି ଏହି ବିଜ୍ଞପ୍ତିରେ କୁହାଯାଇଛି । ୟୁଜିସି ଏକ ନୋଟିସ ଜାରି କରି କହିଛି, ଛାତ୍ରଛାତ୍ରୀ ଓ ସାଧାରଣ ଲୋକଙ୍କୁ ସୂଚିତ କରାଯାଉଛି କି ଏବେ ଦେଶରେ ବିଭିନ୍ନ ପ୍ରାନ୍ତରେ ୨୪ଟି ନକଲି ବିଶ୍ୱବିଦ୍ୟାଳୟ ରହିଛି । ଯେଉଁମାନେ ୟୁଜିସି ଦ୍ୱାରା ପଞ୍ଜିକୃତ ହୋଇନାହାନ୍ତି । ଏହି ବିଶ୍ୱବିଦ୍ୟାଳୟ ଗୁଡିକ ନକଲି ଓ ଏମାନଙ୍କର ଡିଗ୍ରି ଦେବାର କୌଣସି ଅଧିକାର ନାହିଁ ।