କନକ ବ୍ୟୁରୋ : କରୋନା ମାରିଦେଲା ମଣିଷପଣିଆ । ଜେସିବିରେ ବୁହା ହେଲା କରୋନାରେ ମୃତ ବ୍ୟକ୍ତିଙ୍କ ଶବ । ଏହା ଏପରି ଏକ କାହାଣୀ ଯାହା ମଣିଷସମାଜର ମାନବିକତା ଉପରେ ପୁଣି ଥରେ ପ୍ରଶ୍ନବାଚୀ ସୃଷ୍ଟି କରିଛି । ସାରା ବିଶ୍ୱରେ କରୋନା କାୟା ମେଲାଇ ଚାଲିଥିବା ବେଳେ ଆନ୍ଧ୍ରପ୍ରଦେଶରୁ ଆସିଛି ଅମାନବିକତାର ଏକ ଲଜ୍ଜାଜନକ ଘଟଣା ।
Kanak News is now on WhatsApp
Join and get latest news updates delivered to you via WhatsApp
କରୋନା ଭାଇରସ କବଳରେ ଆସି ଦୁଇ ଜଣ ବ୍ୟକ୍ତିଙ୍କ ମୃତ୍ୟୁ ପରେ, ସେମାନଙ୍କ ଶବକୁ ଜେସିବି ମେସିନ ଜରିଆରେ ଶବଦାହ ଗୃହକୁ ନିଆଯାଇଥିଲା । ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଅନେକ ନକରାତ୍ମକ ପ୍ରତିକ୍ରିୟା ଦେଖିବାକୁ ମିଳିଛି ।
ଏହି ଘଟଣାକୁ ନେଇ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇଏସ୍ ଜଗନମୋହନ ରେଡି ଦୁଃଖପ୍ରକାଶ କରିବା ସହ ଏହା ଅତ୍ୟନ୍ତ ନିନ୍ଦନୀୟ ଏବଂ ବେଆଇନ୍ ବୋଲି କହିଛନ୍ତି । କେବଳ ଏତିକି ନୁହେଁ, ଘଟଣାରେ ସମ୍ପୃକ୍ତ ଅଧିକାରୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନେବା ପାଇଁ ସେ ନିର୍ଦ୍ଦେଶ ମଧ୍ୟ ଦେଇଥିଲେ ।
ଘଟଣାକୁ ନେଇ ମୁଖ୍ୟମନ୍ତ୍ରୀ ଜଗନମୋହନ ରେଡି ଟ୍ୱିଟରରେ ଲେଖିଛନ୍ତି, ଏବେ ମାନବିକତା ଦେଖାଇବାର ସମୟ । କିନ୍ତୁ ଯେଉଁଭଳି ଘଟଣା ଘଟିଛି, ତାହା ହୃଦୟକୁ ଗଭୀର ଆଘାତ ପହଂଚାଇଛି । ଏଭଳି ଘଟଣା ଆଉ କେଉଁଠି ବି ନହେବା ଦରକାର । ଘଟଣାରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ତେବେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ଦୁଇ ବରିଷ୍ଠ ଅଧିକାରୀଙ୍କୁ ନିଲମ୍ବିତ କରାଯାଇଛି ।