କନକ ବ୍ୟୁରୋ: ଜୀବନର କଅଁଳ ସୂର୍ଯ୍ୟୋଦୟକୁ ଢାଙ୍କିଦେଇଛି ଦୁଃଖର କଳାହାଣ୍ଡିଆ ମେଘ । ଜୀବନ ଜିଇଁବା ଆଗରୁ ଯନ୍ତ୍ରଣା ଦେଇଯାଇଛି ସମୟ । ଅସମୟରେ ବାପା ମା’ ଆରପାରିକୁ ବାହୁଡିଯିବା ପରେ କେମିତି ଅଛନ୍ତି ଏହି ଦୁଇ କୁନି ପିଲା । ଦୁଇ ବର୍ଷର ସାନ ଭାଇ ଅଝଟ ହେଲେ ତାକୁ ବୁଝାଇଦେଉଛି ୪ ବର୍ଷର ଭଉଣୀ । ଗୋଟିଏ କଦଳୀକୁ ଥରେ ଭାଇ ମୁହଁରେ ଦେଲେ ଥରେ ନିଜେ ଖାଉଛି ।
ଏହି ନୀରିହ ନିଷ୍ପାପ କଅଁଳ କଢିଙ୍କ ଉପରେ କଷ୍ଟର କଷଣ ଅଜାଡି ଦେଇଛି ବିଧାତା । ଦୁନିଆ କଣ ଦେଖିବା, ଆଉ ଜାଣିବା ଆଗରୁ ଏମାନେ ଅନାଥ ହୋଇଯାଇଛନ୍ତି । ଏମାନଙ୍କୁ ଆଗକୁ ନେବା ପାଇଁ କିଏ ସାହା ହେବ, ନା ଏହି ଝାଟିମାଟିର କୁଡିଆ ଭିତରେ ଦୁଇ ଅନାଥ ଶିଶୁଙ୍କର ଭବିଷ୍ୟତ ସବୁଦିନ ପାଇଁ ଅନ୍ଧାର ଭିତରକୁ ଠେଲିହୋଇଯିବ ?
Kanak News is now on WhatsApp
Join and get latest news updates delivered to you via WhatsApp
ସମ୍ବଲପୁର ଜିଲ୍ଲା କୁଚିଣ୍ଡା ଉପଖଣ୍ଡ ବାମରା ବ୍ଲକ ପଣ୍ଡରିପଥର ଗାଁର ଏହି ଦୁଇ କୁନି ଶିଶୁଙ୍କ କାହାଣୀ ଶୁଣିଲେ, ଆପଣଙ୍କ ଆଖି ବି ଓଦା ହୋଇଯିବ । ବାହାରକୁ କାମ କରିବାକୁ ଯାଇ ସାପ କାମୁଡାରେ ମା’ଙ୍କ ମୃତ୍ୟୁ ହୋଇଥିବା ବେଳେ ଅଜଣା ରୋଗରେ ପଡି ବାପା ବି ଆରପାରିକୁ ଚାଲିଗଲେ । କିନ୍ତୁ ଏଇ କୁନି ପିଲାଙ୍କ ମନ କେମିତି ମାନିବ…ସେଥିପାଇଁ ତ ବାପା ମା’ଙ୍କ ଫଟୋକୁ ନୀରିହ ଆଖିରେ ଦେଖି ତାଙ୍କ ଫେରିବା ବାଟକୁ ଚାହିଁରହିଛନ୍ତି ।
ପଡୋଶୀ ଏବଂ ସମ୍ପର୍କୀୟ ଦୁଇ ଛୁଆଙ୍କର ଭଲମନ୍ଦ ବୁଝୁଥିବା ବେଳେ, ସେମାନଙ୍କର ଆର୍ଥିକ ସ୍ଥିତି ମଧ୍ୟ ଭଲନାହିଁ । କୁଲି ମଜୁରି କରି ନିଜେ ଦୁଃଖ କଷ୍ଟରେ ଦିନ କାଟୁଥିବା ବେଳେ ଏହି ନୀରିହ ଶିଶୁଙ୍କର ଭବିଷ୍ୟତର ଚିନ୍ତା, ସେମାନଙ୍କୁ ବ୍ୟଥିତ କରିଛି । ତେବେ ଏସମ୍ପର୍କରେ ବାମରା ଏବିଡିଓ ଜାଣିବା ପରେ, ଅନାଥ ଦୁଇ ଶିଶୁଙ୍କର ସମସ୍ତ ସୁବିଧା କରିବାକୁ ପ୍ରତିଶ୍ରୁତି ଦେଇଛନ୍ତି ।