ବୁଢା ବାପା କାନ୍ଧରେ ଭେଣ୍ଡିଆ ପୁଅ । ବୋଝ ବୋହିବା ବୟସରେ ଘରର ଦୁଇ ଦୁଇଟି ଭେଣ୍ଡିଆ ପୁଅ ହରାଇଛନ୍ତି ମାନସିକ ଭାରସାମ୍ୟ । ପୁଅ କଥା ଭାବି ଭାବି ମାଆ ବି ହେଲା ମାନସିକ ବିକାରଗ୍ରସ୍ତ । ଆରାମ କରିବା ବୟସରେ ମୂଲ ଲାଗି ତିନି ତିନିଟି ପେଟକୁ ଦାନା ଦେଉଛନ୍ତି ହରେକୃଷ୍ଣ । ଏମିତି ବାପାଙ୍କୁ ସଲାମ ସହ ସାହାଯ୍ୟ କରୁ ସାରା ଓଡିଶା…
କନକ ବ୍ୟୁରୋ: ମାଟିର ତକିଆ, ମାଟିର ଶେଯ । ମାଟିର ମଲାଟ ଉପରେ ଶୋଇଛି ମଣିଷର ଜୀବନ । ଜୀବନ ସିନା ଅଛି ହେଲେ ନାହିଁ ଜୀବନଶୈଳୀ, ଜିଇଁବାର ଶକ୍ତି । ଦେହ ଭିତରେ ପ୍ରାଣ, ଦେହ ବାହାରେ ପାଗଳାମି । ଦାଢି ବଢିଯାଇଛି, ନଖ ବଢିଯାଇଛି ମୁଣ୍ଡର ଚୁଟି ଜଟା ବାନ୍ଧିଛି.. ଆଉ ମଇଳା ଲୁଗାରେ ଢାଙ୍କି ହୋଇଛି ମଣିଷର ନଗ୍ନତା । ଭଙ୍ଗା ଘରେ ବଡ ଭାଇ, ଦୁଃଖର ଦଦରା କାନ୍ଥକୁ ଆଉଜି ପିଣ୍ଡାରେ ବସିଛି ସାନ ଭାଇ… ଦୁଇ ଭାଇଙ୍କ ଦେହରେ ବଳ ଅଛି ହେଲେ ମୁଣ୍ଡରେ ନାହିଁ ବିଚାର କରିବାର ଶକ୍ତି । ଆଜି କି କାଲି ନୁହେଁ ଦୀର୍ଘ ୧୨ ବର୍ଷ ହେବ ମାନସିକ ଭାରସାମ୍ୟ ହରାଇ ନିଜ ଭାଗ୍ୟକୁ ନେଇ ଏଇ ଭଙ୍ଗାଘରେ ଅଛନ୍ତି ଦୁଇ ଭେଣ୍ଡିଆ ପୁଅ…
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ଆଳି ବ୍ଲକ ଡିମିରିପାଳ ଗାଁର ହରେକୃଷ୍ଣ ନାୟକଙ୍କ ଦୁଇ ପୁଅ ହିରଣ୍ୟ ଓ ରାଜେଶ ମାନସିକ ବିଚାରଶକ୍ତି ହରାଇଛନ୍ତି । ଦିନେ ଦୁଇ ପୁଅ ବିଦେଶରେ କାମ କରି ଘରର ଦୁଃଖ ଦୂରେଇବାକୁ ଜୀଜାନ୍ ଲଗାଇ ଦେଇଥିଲେ । ବାହାରେ ଚାକିରି କରି ବାପାମାଆଙ୍କ ସହ ବେଶ ଖୁସିରେ ଚଳୁଥିଲେ । ହେଲେ ୧୨ ବର୍ଷ ତଳେ ବଡ ପୁଅ ଗାଁକୁ ଫେରିବା ପରେ ହଠାତ୍ ନିଜ ମାନସିକ ସ୍ଥିତି ହରାଇ ବସିଥିଲେ । ପରେ ପରେ ସାନ ଭାଇ ବି ଘରକୁ ଫେରି ସମନା ଅବସ୍ଥା ଭୋଗିଥିଲେ । ଆଉ ସେବେଠାରୁ ଦୁଇ ଜଣ ଏମିତି ଜୀବନ ବିତାଉଛନ୍ତି ।
ଏପଟେ ଜୀବନ, ସେପଟେ ଯନ୍ତ୍ରଣା । ଏପଟେ ମମତା, ସେପଟେ ସ୍ନେହ । ମାନସିକ ବିକାରଗ୍ରସ୍ତ ହୋଇ ମାଆକୁ ମାରଧର କରିବା ପରେ ଦୁଇ ଭାଇଙ୍କୁ ଗୋଟିଏ ଘରେ ସିନା ବନ୍ଦ କରିଦେଲେ । ହେଲେ ମାନିଲାନି ମାଆର ମନ । ଆଖି ଆଗରେ ଦୁଇ ପୁଅଙ୍କ ଏଭଳି ଅବସ୍ଥା ଦେଖି ମାଆବି ନିଜ ମାନସିକ ସ୍ଥିତି ହରାଇବାକୁ ଲାଗିଛନ୍ତି । କେତେବେଳେ କାହାକୁ କଣ କହୁଛନ୍ତି କିଛି ଜାଣି ପାରୁନାହାନ୍ତି । ଘରର ପାଇଟି ସିନା କରୁଛନ୍ତି ହେଲେ ପୁଅ ପାଇଁ ମାଆ ବି ପାଗିଳି ହୋଇଯାଇଛି…
ସେପଟେ ଘରର ତିନି ତିନି ଜଣଙ୍କ ଅବସ୍ଥା ବିଗିଡିଯିବା ପରେ ବି ହାରିଯାଇ ନାହାନ୍ତି ବାପା ହରେକୃଷ୍ଣ । ବୟସର ଅପରାହ୍ଣରେ ବି ନିଜ ଅଣ୍ଟାକୁ ଶକ୍ତ କରି ଚିଡା ହୋଇଛନ୍ତି । ପୁଅ ବଡ ହେବେ ରୋଜଗାର କରିବେ ଆଉ ବାପ କାନ୍ଧୁର ବୋଝକୁ ହାଲକା କରି ଖୁସିରେ ରଖିବେ । ସବୁ ବାପାଙ୍କ ପରି ହରେକୃଷ୍ଣ ମଧ୍ୟ ଦେଖିଥିଲେ ହଜାରେ ସପନ । ହେଲେ ଦୁଇ ପୁଅ ଦିବ୍ୟାଙ୍କ ହୋଇଯିବା ପରେ ଭାଙ୍ଗିଯାଇଛି ତାଙ୍କ ସ୍ୱପ୍ନ, କୋଠା ଘରର ଆଶା କୁଟାକାଠିରେ ଅଟକିଛି ।
କଲିକତାରୁ କାମ ଛାଡି ଗାଁକୁ ଫେରିବା ପରେ ଏବେ ୩ ଜଣଙ୍କ ପେଟ କଥା ବୁଝୁଛନ୍ତି ହରେକୃଷ୍ଣ । ବୟସ୍କ ହାତରେ ଆଉ ବଳ ନାହିଁ କି ଦେହରେ ଆଉ ଦମ୍ଭ ନାହିଁ । ଘର ତୋଳିବା ତ ଦୂରର କଥା ଖାଇବାକୁ ପାଖରେ ଟଙ୍କାଟିଏ ନଥିବାରୁ ଏଇ ଚାଳ ନଥିବା ମାଟି ଘରେ ଭାଗ୍ୟକୁ ଭାଗ କରୁଛନ୍ତି । ଭେଣ୍ଡିଆ ପୁଅଙ୍କ ପେଟରେ ଦାନା ଗଣ୍ଡେ ଦେବାକୁ ମୁଲ ଲାଗୁଥିବା ହରେକୃଷ୍ଣଙ୍କ ଥରିଲା ହାତ କେବେ ଥକୁନାହିଁ । କାରଣ ସେ ହେଉଛନ୍ତି ବାପା । ଆଉ ବାପାମାନେ ମଲାଯାଏଁ ଥକନ୍ତିନି…
ହୁଏତ ପୁଅମାନେ ଯଦି ଆଜି ଭଲଥାନ୍ତେ ତେବେ ଗରିବିର ଲଙ୍ଗଳା ଚିତ୍ର ଦେଖି ହରେକୃଷ୍ଣଙ୍କୁ ପଚାରୁଥାନ୍ତେ… ବାପା ! ତମେ ଏମିତି କଷ୍ଟ ସହୁଛ କେମିତି ? ନିଜେ ଯନ୍ତ୍ରଣା ପାଇ ଆମ ଜୀବନକୁ ବଞ୍ଚାଉଛ କେମିତି?