ଆସନ୍ତା ୧୧ରେ ପ୍ରଥମ ପଲିଟିକାଲ ପେପର । ପ୍ରସ୍ତୁତି ଚଳାଇଛନ୍ତି ପରୀକ୍ଷାର୍ଥୀ, ପ୍ରାର୍ଥୀଙ୍କ ପରୀକ୍ଷା ଖାତାରେ ମାର୍କ ଦେବେ ଜନତା ।
ଗଣତନ୍ତ୍ରର ମହାପର୍ବ ଅର୍ଥାତ୍ ୨୦୧୯ ସାଧାରଣ ନିର୍ବାଚନର ପ୍ରଥମ ପର୍ଯ୍ୟାୟ ପରୀକ୍ଷା ପାଇଁ ପ୍ରସ୍ତୁତ ହେଉଛନ୍ତି ପରୀକ୍ଷାର୍ଥୀ ବା ପ୍ରମୁଖ ଦଳର ପ୍ରାର୍ଥୀ ।
କନକ ବ୍ୟୁରୋ: ୧୯ ପରୀକ୍ଷାରେ କିଏ ହେବ ଟପ୍ପର ? ଗଣତନ୍ତ୍ରର ମହାପର୍ବ ଅର୍ଥାତ୍ ୨୦୧୯ ସାଧାରଣ ନିର୍ବାଚନର ପ୍ରଥମ ପର୍ଯ୍ୟାୟ ପରୀକ୍ଷା ପାଇଁ ପ୍ରସ୍ତୁତ ହେଉଛନ୍ତି ପରୀକ୍ଷାର୍ଥୀ ବା ପ୍ରମୁଖ ଦଳର ପ୍ରାର୍ଥୀ । ଆଉ ମାତ୍ର ୫ ଦିନ ପରେ ପଲିଟିକାଲ ବ୍ୟାଟେଲର ପ୍ରଥମ ରାଉଣ୍ଡରେ ଭାଗ୍ୟ ପରୀକ୍ଷା କରିବେ ବିଭିନ୍ନ ଦଳର ପ୍ରାର୍ଥୀ । ଚଳିତ ୨୦୧୯ ପଲିଟିକ୍ସ ପରୀକ୍ଷାରେ କେଉଁ ଦଳର ପରୀକ୍ଷାର୍ଥୀ ଭଲ ରେଜଲ୍ଟ ଆଣିବେ ସେନେଇ ଦିନରାତି, ଖରାତରାରେ ଜୋରଦାର ପ୍ରଚାର ଚଳାଇଛନ୍ତି । ନିଜ ସପକ୍ଷରେ ଜନମତ ସାଉଣ୍ଟି ମେ’ ୨୩ ଫଳାଫଳ ଭଲ କରିବା ସହ ସୁପ୍ରିମୋଙ୍କୁ ଖୁସି କରିବା ପାଇଁ ପ୍ରାଣମୂର୍ଚ୍ଛା ଉଦ୍ୟମ ଚଳାଇଛନ୍ତି ପ୍ରାର୍ଥୀ ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ୧୧ ତାରିଖରେ ବ୍ରହ୍ମପୁର, କୋରାପୁଟ, ନବରଙ୍ଗପୁର, କଳାହାଣ୍ଡି ଭଳି ୪ଟି ପରୀକ୍ଷା କେନ୍ଦ୍ର ବା ଲୋକସଭା କ୍ଷେତ୍ରରେ ପ୍ରଥମ ପଲିଟିକାଲ ପେପରର ଭାଗ୍ୟ ପରୀକ୍ଷା କରିବେ ପ୍ରାର୍ଥୀ । ଏହାସହ ୨୮ଟି ବିଧାନସଭା କ୍ଷେତ୍ରରେ ମଧ୍ୟ ଜନତା ଜନାର୍ଦ୍ଧନ ନିଜର ନେତା ବାଛିବେ । ଆଉ ପ୍ରଚାର ମୈଦାନରେ ଜନତାଙ୍କୁ ସନ୍ତୁଷ୍ଟ କରିଥିବା ନେତା ହିଁ ଭୋଟ ବ୍ୟାଙ୍କ୍ ହାତେଇପାରିବ ବୋଲି ରାଜନୀତି ବିଷାରଦ ମାନେ ମତ ପ୍ରକାଶ କରିଛନ୍ତି । ସବୁଠାରୁ ରୋଚକ ବିଷୟ ହେଲା, ଚଳିତ ପଲିଟିକାଲ୍ ପେପର ସମସ୍ତ ଦଳର ପରୀକ୍ଷାର୍ଥୀଙ୍କ ପାଇଁ କଠିନ ରହିବ ବୋଲି ଚର୍ଚ୍ଚା ହେଉଛି ।
ଆଉମାତ୍ର ୫ ଦିନ ପରେ ଜନତା ଜନାର୍ଦ୍ଦନ ବିଭିନ୍ନ ଦଳର ପ୍ରାର୍ଥୀ ବା ପରୀକ୍ଷାର୍ଥୀଙ୍କ ଖାତାରେ ମାର୍କ ଦେବେ । କିଏ କେତେ ପ୍ରତିଶ୍ରୁତି ଆଉ ପ୍ରଚାର ଜରିଆରେ ମତଦାତାଙ୍କ ହୃଦୟକୁ ଛୁଇଁ ପାରିବ ସେନେଇ ଦିଲ୍ଲୀରୁ ପଲ୍ଲୀ ସବୁଠି ଏବେ ମନ୍ତ୍ରଣା ପରେ ମନ୍ତ୍ରଣା ନେଉଛନ୍ତି ପ୍ରାର୍ଥୀ । ଆଉ କେଉଁଠି କେନ୍ଦ୍ର ସରକାର ତ କେଉଁଠି ରାଜ୍ୟ ସରକାରଙ୍କ ସଫଳତାକୁ ନେଇ ପ୍ରଥମ ପଲିଟିକାଲ ପେପରରେ ଭଲ କରିବାକୁ ଉଦ୍ୟମ ଚଳାଇଛନ୍ତି ପ୍ରାର୍ଥୀ । ତେବେ ଏହାରି ଭିତରେ ଚଳିତ ନିର୍ବାଚନ ପୂର୍ବରୁ ଦଳଡ଼ିଆଁ ପର୍ବ ରାଜ୍ୟ ରାଜନୀତିର ପଲିଟିକାଲ୍ ସିଲାବସକୁ ପୂରା ବିଗାଡ଼ି ଦେଇଛି । ଯାହାକି ସାଧାରଣ ଜନତାଙ୍କ ବୁଝିବାରେ କଷ୍ଟ ସାଧ୍ୟ ହୋଇପଡ଼ିଛି ।
୨୦୧୯ ପଲିଟିକାଲ ପରୀକ୍ଷାର ପ୍ରଥମ ପେପର ପାଇଁ ରାଜ୍ୟର ତିନି ପ୍ରମୁଖ ଦଳ ବିଜେଡି, ବିଜେପି ଓ କଂଗ୍ରେସ ପ୍ରସ୍ତୁତ । ଆଉ ନିଜର ପ୍ରାର୍ଥୀ ବା ପରୀକ୍ଷାର୍ଥୀ ମାନଙ୍କୁ ମନ୍ତ୍ରଣା ପରେ ମନ୍ତ୍ରଣା ଦେଉଛନ୍ତି ସିନିୟର ନେତା । କେତେବେଳେ ଦିଲ୍ଲୀ ଦରବାରରୁ ଶୀର୍ଷ ନେତା ତ ଆଉ କେତେବେଳେ ଖୋଦ୍ ଶାସକ ଦଳର ସୁପ୍ରିମୋ ନିର୍ବାଚନୀ ବ୍ୟାଟେଲ୍ ଗ୍ରାଉଣ୍ଡକୁ ଓହ୍ଲାଇ ଘମାସାନ ପ୍ରଚାର କରୁଥିବା ଦେଖିବାକୁ ମିଳୁଛି । ହେଲେ ଏହି ପରୀକ୍ଷାର ରେଜଲ୍ଟ ଆସନ୍ତା ମେ ୨୩ ତାରିଖରେ ଆସିବାକୁ ଥିବାବେଳେ ଏବେ ପରୀକ୍ଷାର୍ଥୀ ବା ପ୍ରାର୍ଥୀମାନଙ୍କ ମନରେ ଛନକା ଭରିଛି । ତେଣୁ ନିଜ ନିଜର ସତ୍ତା ବଜାୟ ରଖିବାକୁ ଆପ୍ରାଣ ଉଦ୍ୟମ ଜାରି ରଖିଛନ୍ତି ପ୍ରାର୍ଥୀ ।