ମାଲକାନଗିରିରେ ସୁଟିଂ ସାରି ଫେରିଗଲା ପୁଷ୍ପା-୨ ଟିମ୍ । ଜୁନ ଶେଷ ଆଡକୁ ପୁଣି ହେବ ସୁଟିଂ, ଆସିପାରନ୍ତି ଅଲ୍ଲୁ ଅର୍ଜୁନ୍ !
କନକ ବ୍ୟୁରୋ: ମାଲକାନଗିରି ମାଟିରେ ସରିଲା ପୁଷ୍ପା-୨ ସିନେମାର ସୁଟିଂ । ଆନ୍ଧ୍ର- ଓଡିଶା ସୀମା ପୋଲେରୁ ଗାଁ, ସିଲେରୁ ନଈ କୂଳରେ ଚାଲିଥିବା ପୁଷ୍ପା-୨ ସିନେମାର ସୁଟିଂ ଶେଷ ହୋଇଛି । ଦୀର୍ଘ ୧୦ ଦିନ ଧରି ମାଲକାନଗିରିରେ ପ୍ରଥମ ପର୍ଯ୍ୟାୟ ସୁଟିଂ ସାରି ଆନ୍ଧ୍ର ଫେରି ଯାଇଛନ୍ତି ପୁଷ୍ପା-୨ର ଅଭିନେତା, ନିର୍ଦ୍ଦେଶକଙ୍କ ଠାରୁ ଆରମ୍ଭ କରି ସମସ୍ତ କ୍ରିୟୁ ମେମ୍ବର । ତେବେ ପୁଷ୍ପା-୨ର ୨ୟ ପର୍ଯ୍ୟାୟ ସୁଟିଂ ଆଗାମୀ ଜୁନ ମାସର ଶେଷ ଆଡକୁ ହୋଇପାରେ ବୋଲି ସୂଚନା ମିଳିଛି । ଯେଉଁଥିରେ ନାୟକ ଅଲ୍ଲୁ ଅର୍ଜୁନଙ୍କ ସୁଟିଂ ରହିଛି । ଆଉ ସେ ମାଲକାନଗିରି ଆସୁଥିବା କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ସ୍ୱାଭିମାନ ଅଞ୍ଚଳର ହନ୍ତାଳଗୁଡା, ସାର୍କୁବନ୍ଧ ଝୁଲା ପୋଲ ଠାରେ ୨ ପର୍ଯ୍ୟାୟ ସୁଟିଂର ଜବରଦସ୍ତ ସିନ୍ ସବୁ ସୁଟ୍ ହେବାର ସୂଚନା ରହିଛି । ଯେଉଁଥିରେ ପୁଷ୍ପା ଚନ୍ଦନ କାଠ ତସ୍କରୀ କରିବ । ତେଣୁ ପୁଷ୍ପା-୨ର ଟିମ୍ ପୁଣି ଥରେ ମାଲକାନଗିରି ଆସିବେ ।
ତେବେ ମେ ୫ ତାରିଖ ଦିନ ସିନେମାର ନିର୍ଦ୍ଦେଶକ ସୁକୁମାରଙ୍କ ସମେତ ଅନ୍ୟ ମେମ୍ବର ମାନେ ଆସି ସ୍ଥାନ ଦେଖିଥିଲେ । ୮ ତାରିଖ ଦିନ ଲାଲ ଚନ୍ଦନ ପରି ଦିଶୁଥିବା ନକଲି କାଠ ଟ୍ରକରେ ଆସି ସିଲେରୁ ନଦୀ କୂଳରେ ପହଞ୍ଚିଥିଲା । ଆଉ ୧୦ ତାରିଖରୁ ସୁଟିଂ ଆରମ୍ଭ ହୋଇଥିଲା ।
ପ୍ରଥମ ପର୍ଯ୍ୟାୟ ସୁଟିଂରେ ଜଙ୍ଗଲରୁ ରକ୍ତ ଚନ୍ଦ କାଟି ନଈ କୂଳକୁ ଅଣାଯାଇଛି । ଯାହା ବିଦେଶକୁ ଚୋରା ଚାଲାଣ ହେବ । ମାଲକାନଗିରିର ଘଞ୍ଚ ଜଙ୍ଗଲରେ ଚନ୍ଦନ କାଠ ଚାଲାଣ ହେଉଥିବା ଖବର ପାଇ ପୋଲିସ ସମସ୍ତଙ୍କୁ ଘେରାବନ୍ଦୀ କରିବାକୁ ଉଦ୍ୟମ କରିଛି । ଖୋଦ୍ ଏସପି ଭଁୱର ସିଂ ଶେଖାୱତ ମାଲକାନଗିରି ଜଙ୍ଗଲରେ ପହଞ୍ଚିଥିଲେ । ଆଉ ପୁଷ୍ପାକୁ ଧରିବାକୁ ପୋଲିସ ଫୋର୍ସ ସହ ପଇଁତରା ମାରୁଥିବାର ସିନ୍ ସୁଟିଂ ସରିଛି । ତେବେ ଆଗକୁ କେଉଁ ସିନ୍ ସୁଟ୍ ହେଉଛି ତାହା ଜାଣିବାକୁ ସମସ୍ତେ ଅପେକ୍ଷା କରି ରହିଛନ୍ତି ।
ପୁଷ୍ପା-୨ ସୁଟିଂ ବେଳେ ଅନେକ ଦର୍ଶକଙ୍କ ସୁଟିଂ ସେଟ ପାଖରେ ଭିଡ ଲାଗିଥିଲା । ଅନେକ ଲୋକ ଫିଲ୍ମରେ ଅଭିନୟ କରିବାକୁ ମଧ୍ୟ ଆଗ୍ରହ ପ୍ରକାଶ କରିଥିଲେ । କାଠ ବୁହା ସିନ୍ ହେଉ ପଛେ ତେଲୁଗୁ ମୁଭିରେ ଟିକେ ଚାନ୍ସ ପାଇବାକୁ ଲାଇନ ଲଗେଇଥିଲେ । ଅନେକଙ୍କୁ ସୁଯୋଗ ମିଳିଥିଲେ ହେଁ ଅନେକ ନିରାଶ ହୋଇଥିଲେ । ଆଉ ୟାରି ଭିତରେ ସିଲେରୁ ନଈ କୂଳରୁ କ୍ୟାମ୍ପ ଉଠାଇ ଫେରି ଯାଇଛି ପୁଷ୍କା ଟିମ୍ ।