ଜାଇଡସ କାଡିଲାର ଟିକାକୁ ଭାରତରେ ଜରୁରୀକାଳୀନ ବ୍ୟବହାର ପାଇଁ ଅନୁମତି : ୧୨ବର୍ଷରୁ ଅଧିକ ସମସ୍ତେ ନେଇପାରିବେ ଟିକା
କନକ ବ୍ୟୁରୋ : ଜାଇଡସ୍ କାଡିଲାର କରୋନା ଟିକାକୁ ଜରୁରୀ ବ୍ୟବହାର ପାଇଁ ଅନୁମତି । ୩ ଡୋଜର ଏହି ଟିକାକୁ ଜାଇକୋଭ୍-ଡି ନାଁରେ ବିକଶିତ କରିଛି ଫାର୍ମା କଂପାନୀ ଜାଇଡସ୍ କାଡିଲା । କୋଭାକ୍ସିନ୍ ପରେ ଭାରତର ଦ୍ୱିତୀୟ ଦେଶୀ ଟିକା ଭାବେ ଆସିବ ଜାଇକୋଭ୍-ଡି । ଷଷ୍ଠ ଟିକା ଭାବେ ଦେଶରେ ଜରୁରୀ ବ୍ୟବହାର ପାଇଁ ଏହାକୁ ଅନୁମତି ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସବୁଠୁ ବଡ଼ କଥା ହେଉଛି, ୧୨ ବର୍ଷରୁ ଉର୍ଦ୍ଧ୍ୱ ଶିଶୁଙ୍କ ପାଇଁ ଏହା ହେବ ଦେଶର ପ୍ରଥମ କରୋନା ଟିକା । ଏହାଛଡ଼ା ଏହା ଏକ ଛୁଂଚିବିହୀନ ଟିକା । ଅର୍ଥାତ ଟିକା ଦେବା ବେଳେ ଛୁଂଚିର ଆବଶ୍ୟକତା ହେବନାହିଁ । ଜରୁରୀ ବ୍ୟବହାର ପାଇଁ ଜୁଲାଇ ୧ ରେ ଆବେଦନ କରିଥିଲା ଅହମ୍ମଦାବାଦ ସ୍ଥିତ କାଡିଲା ହେଲ୍ଥ କେୟାର ଲିମିଟେଡ୍ । ୫୦ଟି କେନ୍ଦ୍ରରେ ୨୭ ହଜାର ସ୍ୱେଚ୍ଛାସେବୀଙ୍କ ଉପରେ ପରୀକ୍ଷା କରିଥିଲେ ଜାଇଡସ୍ କାଡିଲା । ପରୀକ୍ଷଣରେ ମଧ୍ୟ ସାମିଲ ହୋଇଥିଲେ ୧୨ରୁ ୧୮ ବର୍ଷ ବୟସର ଏକ ହଜାର ପିଲା । ଟିକା ୬୬.୬ ପ୍ରତିଶତ ପ୍ରଭାବୀ ବୋଲି ଦାବି କରିଛି କଂପାନୀ ।
ପୂର୍ବରୁ କଂପାନୀ ପକ୍ଷରୁ କୁହାଯାଇଥିଲା, ଦୁଇ ଡୋଜ୍ ଓ ତିନି ଡୋଜ୍ ଟିକା ଉଭୟ କରୋନା ବିରୋଧରେ କାମ କରିବ । ଜାଇକୋଭ-ଡି ହେଉଛି ବିଶ୍ୱର ପ୍ରଥମ ଡିଏନ୍ଏ କୋଭିଡ୍ ଟିକା । ଏଥିରେ ସୃଷ୍ଟି ହେଉଥିବା ପ୍ରୋଟିନ୍ ସ୍ପାଇକ୍ କରୋନା ଭୂତାଣୁ ବିରୋଧରେ କାମ କରିବ । ଏଥିରେ ଛୁଂଚି ଆବଶ୍ୟକ ହେଉନଥିବାରୁ ପାଶ୍ୱର୍ ପ୍ରତିକ୍ରିୟା କମ୍ ରହିବ ବୋଲି କୁହାଯାଇଛି । କୋଭିସିଲ୍ଡ, କୋଭାକ୍ସିନ୍, ସ୍ପୁଟନିକ୍ ଭି, ମଡେର୍ନା, ଜନସନ୍ ଆଣ୍ଡ ଜନ୍ସନ ପରେ ଜାଇକୋଭ-ଡି ହେଉଛି ଷଷ୍ଠ ଟିକା ଯାହାକୁ ଭାରତରେ ବ୍ୟବହାର ପାଇଁ ଅନୁମତି ମିଳିଛି ।