କେ. କବିତାଙ୍କ ମହିଳା ସଂରକ୍ଷଣ ବିଲ୍ ପାରିତ ଦାବିକୁ ସମର୍ଥନ କଲେ ୧୮ ବିରୋଧୀ ଦଳ । ହେଲେ ଏପର୍ଯ୍ୟନ୍ତ ବିଜୁ ଜନତା ଦଳ ଦେଇନାହିଁ ସମର୍ଥନ ।
ପାର୍ଲାମେଣ୍ଟରେ ବାରମ୍ବାର ପ୍ରସଙ୍ଗ ଉଠାଉଥିବା ବିଜେଡି, କାହିଁକି ରହିଲା ନିରବ?
କନକ ବ୍ୟୁରୋ: କବିତାଙ୍କ ସାଙ୍ଗରେ ନାହିଁ ବିଜେଡି । ମହିଳା ସଂରକ୍ଷଣ ସପକ୍ଷରେ ସବୁବେଳେ କହି ଆସୁଥିବା ବିଜେଡି ବିଆରଏସ୍ ନେତ୍ରୀ କେ.କବିତାଙ୍କ ଆନ୍ଦୋଳନରୁ ଦୂରେଇ ରହିବା ଚର୍ଚ୍ଚା ସୃଷ୍ଟି କରିଛି । ମହିଳା ସଂରକ୍ଷଣ ବିଲ୍ ତୁରନ୍ତ ସଂସଦରେ ପାରିତ କରାଇବା ଦାବିରେ ଦିଲ୍ଲୀରେ ଧାରଣ ଦେଇଛନ୍ତି କବିତା । ଅନ୍ୟ ୧୮ଟି ଦଳ ଏଥିରେ ସାମିଲ ହୋଇଥିବା ବେଳେ ବିଜେଡି ଦୂରେଇ ରହିଛି ।
Kanak News is now on WhatsApp
Join and get latest news updates delivered to you via WhatsApp
ତେଲେଙ୍ଗାନା ମୁଖ୍ୟମନ୍ତ୍ରୀ ତଥା ବିଆରଏସ୍ ମୁଖ୍ୟ କେସିଆରଙ୍କ ଝିଅ କେ. କବିତା ଦିଲ୍ଲୀରେ ମହିଳା ସଂରକ୍ଷଣ ପ୍ରସଙ୍ଗରେ ଧାରଣା ଜାରି ରଖିଛନ୍ତି । ବହୁଦିନ ଧରି ପଡ଼ି ରହିଥିବା ମହିଳା ସଂରକ୍ଷଣ ବିଲକୁ ସଂସଦରେ ତୁରନ୍ତ ପାସ୍ କରାଇବାକୁ ସେ ଦାବି କରିଛନ୍ତି । ଲୋକସଭା ଓ ସବୁ ବିଧାନସଭା ନିର୍ବାଚନରେ ମହିଳାଙ୍କ ପାଇଁ ୩୩ ପ୍ରତିଶତ ରିଜର୍ଭେସନ ପାଇଁ ଏହି ବିଲରେ ପ୍ରସ୍ତାବ ରହିଛି । କବିତାଙ୍କ ଏହି ଆନ୍ଦୋଳନକୁ ବହୁ ବିରୋଧୀ ଦଳ ସମର୍ଥନ କରୁଛନ୍ତି । କିନ୍ତୁ ଆଶ୍ଚର୍ଯ୍ୟଜନକ ଭାବେ ବିଜେଡି ଏଥିରେ ସାମିଲ ହୋଇନାହିଁ ।
ବିଶେଷକରି ୧୮ଟି ଦଳ ବିଆରଏସ୍ ନେତ୍ରୀଙ୍କ ଆନ୍ଦୋଳନରେ ସାମିଲ ହୋଇଛନ୍ତି । ହେଲେ ଏଥିରେ ବିଜେଡିର କୌଣସି ନେତାଙ୍କୁ ଦେଖିବାକୁ ମିଳି ନାହିଁ । ଏହାକୁ ନେଇ ପ୍ରଶ୍ନ ଉଠିଛି । ହେଲେ କାହିଁକି ବିଜେଡି ଏହି ଆଭିମୁଖ୍ୟ ଗ୍ରହଣ କରିଛି,ସେ ନେଇ ଦଳ ପକ୍ଷରୁ ମଧ୍ୟ କୌଣସି ପ୍ରତିକ୍ରିୟା ରଖାଯାଇ ନାହିଁ । ତେବେ ସୋମବାର ଠାରୁ ସଂସଦର ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟ ଆରମ୍ଭ ହେଉଛି । ବିଆରଏସ୍ ନେତ୍ରୀ କବିତା ଦାବି କରୁଛନ୍ତି ଯେ, ଏହି ସମୟରେ ମହିଳା ସଂରକ୍ଷଣ ବିଲକୁ ପାସ୍ କରାଯାଉ ।
ମହିଳା ସଂରକ୍ଷଣ ପ୍ରସଙ୍ଗରେ ବିଜେଡି ପୂର୍ବରୁ ଅନେକ ଉଦ୍ୟମ ନିଜ ଆଡୁ ଆରମ୍ଭ କରିଥିଲା । ଏପରିକି ବିଜେଡି ସୁପ୍ରିମୋ ନବୀନ ପଟ୍ଟନାୟକ ସବୁ ଦଳର ସଭାପତିଙ୍କୁ ଏନେଇ ଚିଠି ଲେଖିଥିଲେ । ପ୍ରଧାନମନ୍ତ୍ରୀଙ୍କୁ ମଧ୍ୟ ଏହି ପ୍ରସଙ୍ଗ ନେଇ ଦାବି ଉଠାଇ ଚିଠି ଲେଖିଥିଲେ ନବୀନ । ବିଜେଡି ସଂସଦୀୟ ଦଳ ବୈଠକରେ ମଧ୍ୟ ମହିଳା ଆରକ୍ଷଣ ନେଇ ଆଲୋଚନା ହୋଇଥିଲା । ସଂସଦରେ ଏହି ପ୍ରସଙ୍ଗ ଉଠାଇବା ପାଇଁ ନବୀନ ଦଳୀୟ ସାଂସଦଙ୍କୁ ନିର୍ଦ୍ଦେଶ ଦେଇଥିଲେ । ହେଲେ କବିତା ସମାନ ପ୍ରସଙ୍ଗ ଓ ଦାବିକୁ ନେଇ ଆନ୍ଦୋଳନ କରୁଥିବା ବେଳେ ବିଜେଡି କାହିଁକି ଦୂରେଇ ରହୁଛି, ବୁଝାପଡୁନାହିଁ । ହେଲେ ମୋଦୀ ବିରୋଧୀମାନେ ଏକାଠି ହୋଇ ଏହି ଆନ୍ଦୋଳନରେ ସାମିଲ ହୋଇଥିବାରୁ, ହୁଏତ ସମଦ୍ୱରତ୍ୱର ସନ୍ଦେଶ ଦେବାକୁ ଜାଣଶୁଣି ନିଜକୁ ଦୂରେଇ ରଖିଛି ବିଜେଡି ।
- ୧୫ ବର୍ଷ ହେଲା ପଡ଼ିରହିଛି ମହିଳା ସଂରକ୍ଷଣ ବିଲ୍
- ୨୦୦୮ରେ ପ୍ରଥମେ ଆଗତ ହୋଇଥିଲା ବିଲ୍
ଉଭୟ ଲୋକସଭା ଓ ବିଧାନସଭା ନିର୍ବାଚନରେ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ ପାଇଁ ଏହି ବିଲରେ ପ୍ରସ୍ତାବ ରହିଛି । ୨୦୦୮ରେ ପ୍ରଥମେ ରାଜ୍ୟସଭାରେ ଏହି ବିଲକୁ ଆଗତ କରାଯାଇଥିଲା । ପରେ ଏହାକୁ ଷ୍ଟାଣ୍ଡିଂ କମିଟି ପାଖକୁ ପଠାଯାଇଥିଲା ଏବଂ ୨୦୧୦ରେ ଏହା ରାଜ୍ୟ ସଭାରେ ପାରିତ ହୋଇଥିଲା । ଏହାପରେ ପାରିତ ପାଇଁ ଲୋକସଭାକୁ ପଠାଯାଇଥିଲା । ହେଲେ ସେବେଠାରୁ ଏହା ଆଉ ଆଗକୁ ବଢ଼ି ପାରି ନାହିଁ ।