ଅଭିନେତା ସୁଶାନ୍ତଙ୍କ ମୃତ୍ୟୁରେ ଅବସାଦ ପ୍ରଶଂସକ କଲେ ଆତ୍ମହତ୍ୟା : ଫାଶୀ ଲଗାଇ ଆତ୍ମହତ୍ୟା କଲେ ୧୭ ବର୍ଷୀୟା ପ୍ରଶଂସକ । ସଂପର୍କୀୟ ଭାଉଜଙ୍କ ମଧ୍ୟ ଯାଇଥିଲା ଜୀବନ
୩୪ ବର୍ଷୀୟ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟାରେ ଶୋକରେ ବୁଡିଛି ବଲିଉଡ୍ । ଏବେ ପର୍ଯ୍ୟନ୍ତ ପ୍ରଶଂସକ ତାଙ୍କ ମୃତ୍ୟୁକୁ ଗ୍ରହଣ କରିପାରୁନାହାନ୍ତି । ସୋସିଆଲ୍ ମିଡିଆରେ ସୁଶାନ୍ତଙ୍କୁ ଶ୍ରଦ୍ଧାଞ୍ଜଳୀ ଦିଆଯାଉଛି । ଆଉ ଏଭଳି ସମୟରେ ବିହାରର ପାଟଣାରୁ ଏକ ଚକିତ କରିଦେଲା ଭଳି ଖବର ସାମ୍ନାକୁ ଆସିଛି । ନିଜ ପ୍ରିୟ ଅଭିନେତା ସୁଶାନ୍ତଙ୍କ ମୃତ୍ୟୁରେ ମ୍ରିୟମାଣ ହୋଇ ଜଣେ ପ୍ରଶଂସକ ଆତ୍ମହତ୍ୟା କରିଛନ୍ତି । ୧୭ ବର୍ଷିୟା ସୁଶାନ୍ତଙ୍କ ଏହି ପ୍ରଶଂସକଙ୍କ ନାଁ ଇଶିକା କୁମାରୀ ବୋଲି ଜଣାପଡିଛି । ଇଶିକା ଚଳିତ ବର୍ଷ ଦଶମ ଶ୍ରେଣୀ ପରୀକ୍ଷା ଦେଇଥିଲେ ଆଉ କିଛି ଦିନ ପରେ ତାଙ୍କର ଫଳାଫଳ ବାହାରିଥାନ୍ତା ।
Kanak News is now on WhatsApp
Join and get latest news updates delivered to you via WhatsApp
ଟିଭି ଏବଂ ମୋବାଇଲରେ ସୁଶାନ୍ତଙ୍କ ଆତ୍ମହତ୍ୟା ଖବର କ୍ରମାଗତ ଦେଖିବା ପରେ ସେ ଘରେ ଫାଶୀ ଲଗାଇ ଆତ୍ମହତ୍ୟା କରିଥିଲେ । ସୋମବାର ବିଳମ୍ବିତ ରାତିରେ ଏହି ଦୁଃଖଦ ଘଟଣା ଘଟିଛି । ଅନ୍ୟପକ୍ଷରେ ସୁଶାନ୍ତଙ୍କ ଆତ୍ମହତ୍ୟାର ଖବର ତାଙ୍କ ପରିବାର ଉପରେ ଦୁଃଖର ପାହାଡ଼ ଲଦିଦେଇଥିଲା । ଆଶ୍ଚର୍ଯ୍ୟ କଲା ଭଳି ଏହି ଖବର ତାଙ୍କ ସଂପର୍କୀୟ ଭାଉଜଙ୍କୁ ଭିତରୁ ଭାଙ୍ଗିଦେଇଥିଲା । ଦିଅରଙ୍କ ମୃତ୍ୟୁ ଖବର ଶୁଣି ସେ ଖାଇବାପିଇବା ଛାଡିଦେଇଥିଲେ ଏବଂ ତାଙ୍କର ମଧ୍ୟ ଦେହାନ୍ତ ହୋଇଯାଇଥିଲା ।
ବଲିଉଡରେ ପ୍ରତିଭା ବନାମ୍ ପରିବାରବାଦ କାରଣରୁ ସୁଶାନ୍ତ ଆତ୍ମହତ୍ୟା କରିଥିବା କଥା ଏବେ ଚର୍ଚ୍ଚା ଧରିଛି । ସୋସିଆଲ୍ ମିଡିଆରେ ‘ନେପୋଟିଜମ୍’ କୁ ନେଇ କିଛି ବଲିଉଡ୍ ତାରକାଙ୍କ ଉପରେ ମଧ୍ୟ ଲୋକ ଖୁବ୍ ବର୍ଷୁଛନ୍ତି । ଜଣେ ଯୁବା ପ୍ରତିଭାବାନ୍ ସଫଳ କଳାକାରଙ୍କ ଏଭଳି ଚରମ ନିଷ୍ପତ୍ତି ନେବା ଉପରେ ଏବେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି ।