କନକ ବ୍ୟୁରୋ: ସ୍ୱାଧୀନତାର ୭୫ବର୍ଷ ପରେ ବି ଅନ୍ଧକାରରେ ବିତୁଛି ଦିନ । ସନ୍ଧ୍ୟା ହେଲେ ଗାଁରେ ପଡ଼ୁଛି ତାଟି କବାଟ । ପିଲାଙ୍କ ପାଠପଢ଼ା ବି ବନ୍ଦ ହୋଇଯାଉଛି । କାରଣ ଏବେ ବି ବିଜୁଳି ଆଲୋକ ଠାରୁ ଅନେକ ଦୂରରେ ଏମାନେ । ଏ ଭଳି ଦୃଶ୍ୟ ଆସିଛି ରାୟଗଡ଼ା ବ୍ଲକ କର୍ଲାକଣା ଗାଁର । ସରକାର ଡିଜିଟାଲାଇଜେସନର ନାରା ଦେଉଥିବା ବେଳେ ଏହି ଗାଁରେ କିନ୍ତୁ ଅଲଗା ଚିତ୍ର ଦେଖିବାକୁ ମିଳିଛି । ଅନ୍ୟପଟେ ଲୋକଙ୍କ ପାଖରେ ଡିବି ଆଲୁଅ ପାଇଁ କିରୋସିନି କିଣିବାକୁ ପଇସା ନାହିଁ । ଲୋକଙ୍କୁ ୧ ଟଙ୍କାରେ ଚାଉଳ ମିଳୁଥିବା ବେଳେ କିରୋସିନି ଲିଟର ପିଛା ପାଖାପାଖି ୮୦ ଟଙ୍କା ଦେଇ କିଣିବାକୁ ପଡ଼ୁଛି ।
Kanak News is now on WhatsApp
Join and get latest news updates delivered to you via WhatsApp
ରାୟଗଡ଼ାର ଜିଲ୍ଲାର ପାଖାପାଖି ୧୬୭ଟି ଗାଁରେ ପହଞ୍ଚିପାରିନି ବିଜୁଳି ଆଲୋକ ।ଦୁର୍ଗମ ଅଞ୍ଚଳର ଏହି ଲୋକମାନେ ଦିନ ମଜୁରିଆ ଭାବେ ଦିନ କାଟୁଥିବାରୁ ଏମାନଙ୍କ ପକ୍ଷେ କିରୋସିନ୍ କିଣିବାକୁ ମଧ୍ୟ ପଇସା ନାହିଁ । ତେବେ ଅଧିକାଂଶ ଗାଁରେ ଲାଗିଥିବା ସୋଲାର ଲାଇଟ୍ ମରମତି ନହୋଇ ପଡ଼ିରହିଥିବା ଦେଖିବାକୁ ମିଳିଛି । ଜିଲ୍ଲା ଯୋଗାଣ ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ ବିଷମକଟକ ବ୍ଳକରେ ଏସଏଫଏସ୍ ଓ ଏନଏଫଏସରେ ମୋଟରେ ୨୭,୭୦୨ଟି କାର୍ଡ ଥିବା ବେଳେ ମାସିକ ୨୭୯୭୯.୦୨ ଲିଟର କିରାସିନି ଦରକାର ପଡୁଥିବା ବେଳେ ବିଷମକଟକ ବ୍ଳକରେ ଲିଟର ପିଛା ଦର ରହିଛି ୭୫ ଟଙ୍କା ୮୪ ପଇସା । ଚନ୍ଦ୍ରପୁର ବ୍ଳକରେ ୧୧,୨୭୦ଟି କାର୍ଡ ଥିବା ବେଳେ ମାସିକ ୧୧୩୮୨.୭୦ ଲିଟର କିରାସିନି ଆବଶ୍ୟକ ହେଉଛି, ଯାହାର ମୂଲ୍ୟ ରହିଛି ଲିଟର ପିଛା ୭୬ ଟଙ୍କା ୪୮ ପଇସା । କଲ୍ୟାଣସିଂହପୁରରେ ୧୮,୦୪୯ କାର୍ଡ ପାଇଁ ସମୁଦାୟ ୧୮୨୨୯.୪୯ ଲିଟର ଦରକାର, ଯାହାର ମୂଲ୍ୟ ଲିଟର ପିଛା ୭୫ ଟଙ୍କା ୮୪ ପଇସା ରହିଛି । ମୁନିଗୁଡାରେ ୨୬,୦୧୬ ଟି କାର୍ଡ ପାଇଁ ସମୁଦାୟ ୨୬୨୭୬.୧୬ ଲିଟର ଦରକାର, ଯାହାର ମୂଲ୍ୟ ଲିଟର ପିଛା ୭୬ ଟଙ୍କା ୧୯ ପଇସା ରହିଛି । ପଦ୍ମପୁରରେ ୧୪,୧୩୭ ବଟି କାର୍ଡ ପାଇଁ ସମୁଦାୟ ୧୪୨୭୮.୩୭ ଲିଟର, ଯାହାର ମୂଲ୍ୟ ଲିଟର ପିଛା ୭୫ ଟଙ୍କା ୮୫ ପଇସା ରହିଛି । ରାୟଗଡା ବ୍ଳକ ଓ ମ୍ୟୁନିସିପାଲିଟିରେ ୪୧,୯୬୨ଟି କାର୍ଡ ପାଇଁ ସମୁଦାୟ ୪୨୩୮୧.୩୫ ଲିଟର କିରୋସିନି ଦରକାର ହୋଉଥିବା ବେଳେ ଯାହାର ସରକାରୀ ସ୍ତରରେ ମୂଲ୍ୟ ଲିଟର ପିଛା ୭୫ ଟଙ୍କା ୬୧ ପଇସା ରହିଛି । ଦୁର୍ଗମ ଅଞ୍ଚଳର ବିକାଶ ପାଇଁ ସରକାର ଅନେକ ଯୋଜନା କରୁଛନ୍ତି । କିନ୍ତୁ ଏହି ଯୋଜନା ଗୁଡ଼ିକର ବାସ୍ତବତା କିନ୍ତୁ ସମ୍ପୂର୍ଣ୍ଣ ଭିନ୍ନ ।