ରାଜଧାନୀ ପୋଲିସର ଲୁଟେରା ଲିଙ୍କ୍ ? ଟଙ୍କା ଲୁଟିନେଲା ଚୋର, କମ୍ପରମାଇଜ କଲା ପୋଲିସ । ଯୁବକ ଆଣିଲେ ସାଙ୍ଘାତିକ ଅଭିଯୋଗ
କନକ ବ୍ୟୁରୋ: ରାଜଧାନୀ ପୋଲିସର ଲୁଟେରା ଲିଙ୍କ୍ ? ଟଙ୍କା ଲୁଟିନେଲା ଚୋର, କମ୍ପରମାଇଜ କଲା ପୋଲିସ । ଷ୍ଟେସନ ପାଖରୁ ଟଙ୍କା ଲୁଟ ହେବା ପରେ ଲୁଟେରାକୁ ନଧରି ବରଂ ଅଧା ଟଙ୍କା ନେଇ କଥା ଚାପି ଦେବାକୁ କହିଲା ପୋଲିସ । ଏଭଳି ଅଭିଯୋଗ ଆଣିଛନ୍ତି ଲୁଟର ଶିକାର ହୋଇଥିବା ଦିଲ୍ଲୀ ଫେରନ୍ତା ଯୁବକ ସୁନୀଲ କୁମାର ଚକ୍ର ।
Kanak News is now on WhatsApp
Join and get latest news updates delivered to you via WhatsApp
ତେବେ ଆନନ୍ଦପୁର ଗଡବାନ୍ଧଗଡା ଯିବା ପାଇଁ ସକାଳେ ସେ ଷ୍ଟେସନରେ ଓହ୍ଲାଇବା ପରେ ଏଟିଏମରୁ ୧୬ ହଜାର ଟଙ୍କା ଉଠାଇଥିଲେ । ଆଉ ନୟାପଲ୍ଲୀ ଯିବା ପାଇଁ ଅଟୋ ଚାଳକଙ୍କ ସହ କଥାବାର୍ତ୍ତା କରୁଥିଲେ । ଠିକ ଏହି ସମୟରେ ଜଣେ ଚୋର ତାଙ୍କ ହାତରୁ ଟଙ୍କା ନେଇ ଛୁ ମାରିଥିଲା । ସୁନୀଲ ମଧ୍ୟ ଚୋରକୁ ଧରିବାକୁ ପିଛା କରିଥିବା ବେଳେ ଅଧା ବାଟରେ ଜଣେ ପୋଲିସ କନଷ୍ଟେବଲ ତାଙ୍କୁ ଅଟକାଇଥିଲେ । ଆଉ ସେମାନଙ୍କ ସହ ପଙ୍ଗା ନନେବାକୁ କହିଥିଲେ । ତାପରେ ତାଙ୍କୁ ୧୦ ହଜାର ଟଙ୍କା ବଢାଇ ଦେଇ କମ୍ପରମାଇଜ କରିବାକୁ କହିଥିଲେ ପୋଲିସ ବାବୁ ।
ମାତ୍ର ଆଉ ୬ ହଜାର ଟଙ୍କା କୁଆଡେ ଗଲା ବୋଲି ପ୍ରଶ୍ନ କରି ପିସିଆରକୁ ଫୋନ କରିଥିଲେ ସୁନୀଲ । ହେଲେ ପିସିଆରରେ ଥିବା ଅଧିକାରୀ ତାଙ୍କୁ ଆଉ ୫ ହଜାର ଦେଇ କଥା ଆଗକୁ ନବଢାଇବାକୁ କହିଥିଲେ । ମାତ୍ର ଶେଷରେ ସେ ଜିଆରପି ଥାନାରେ ଅଭିଯୋଗ କରିଛନ୍ତି । ତେବେ କିଏ ସେ ପୋଲିସ ଯିଏ ଲୁଟେରାଙ୍କ ପାଇଁ ହାକିମାତି କରୁଥିଲେ ? କଣ ପାଇଁ ଚୋରକୁ ନଧରି କଥା ଚାପିବାକୁ କହୁଥିଲେ ପୋଲିସ ବାବୁ? ଲୁଟେରାଙ୍କ ସହ ପୋଲିସର ଅଛିକି ଭିତିରି ଲିଙ୍କ? ଏ ସମସ୍ତ ପ୍ରଶ୍ନ ଏବେ ପୋଲିସ ପୋଷାକ ଉପରେ ଆଙ୍ଗୁଠି ଉଠାଇଛି ।