ଫସିଗଲେ ବ୍ୟବସାୟୀ: ୧୪ ଲକ୍ଷରୁ ଅଧିକ ଟଙ୍କାର ଚୁନା ଲଗାଇଲେ ଠକ, ଡିପୋଜିଟ୍ ବେଳେ ଠିକଣା ବଦଳାଇଦେଲା ଏସବିଆଇ
କନକ ବ୍ୟୁରୋ: ଶସ୍ତାରେ ଅମ୍ବୁଜା ସିମେଂଟ ପାଇବାର ଲୋଭ ଜଣେ ସିମେଂଟ ବ୍ୟବସାୟୀଙ୍କୁ ମହଙ୍ଗା ପଡିଛି । ବଜାର ଦର ଠାରୁ କମ ଦରରେ ସିମେଂଟ ଯୋଗାଇ ଦେବ କହି ଲକ୍ଷାଧିକ ଟଙ୍କାର ଚୁନା ଲଗାଇଛି ଠକ୍ । ଭୁବନେଶ୍ୱରର ଜଣେ ସିମେଂଟ ବ୍ୟବସାୟୀଙ୍କ ଠାରୁ ୧୪ଲକ୍ଷ ୫୮ ହଜାର ଟଙ୍କାର ଠକେଇ ହୋଇଥିବା ଅଭିଯୋଗ ହୋଇଛି । ଏନେଇ ଚନ୍ଦ୍ରଶେଖର ଥାନା ଓ ସାଇବର ସେଲରେ ବ୍ୟବସାୟୀ ପ୍ରକାଶଚନ୍ଦ୍ର ଡାଲମିଆ ଅପ୍ରେଲ ମାସରୁ ଅଭିଯୋଗ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁସାରେ, ସୌରଭ ତ୍ରିପାଠୀ ନାମକ ବ୍ୟକ୍ତି ନିଜକୁ ଅମ୍ବୁଜା ସିମେଂଟ ଲିମିଟେଡର ଅଧିକାରୀ ଭାବେ ପରିଚୟ ଦେଇ, ଭୁବନେଶ୍ୱରର ସିମେଂଟ ବ୍ୟବସାୟୀ ପ୍ରକାଶ ଚନ୍ଦ୍ର ଡାଲମିଆଙ୍କ ସହ ଯୋଗାଯୋଗ କରିଥିଲେ । ବଜାର ଦର ଠାରୁ କମ ଦାମରେ ସିମେଂଟ ଯୋଗାଇ ଦେବେ ବୋଲି ଲୋଭନୀୟ ପ୍ରସ୍ତାବ ଦେଇଥିଲେ । ପ୍ରସ୍ତାବକୁ ଯାଂଚ କରିବା ପରେ ୫ହଜାର ସିମେଂଟ ବସ୍ତାର ଅର୍ଡର ଦେଇଥିଲେ ଡାଲମିଆଁ । ଯାହାର ମୂଲ୍ୟ ୧୪ ଲକ୍ଷ ୫୮ ହଜାର ଟଙ୍କା । ଏହି ଟଙ୍କାକୁ ବ୍ୟାଙ୍କ ଅଫ ମହାରାଷ୍ଟ୍ରକୁ ଯାଇ ପ୍ରକାଶ ଚନ୍ଦ୍ର ଡାଲମିଆଁ ଆରଟିଜିଏସ ମାଧ୍ୟମରେ ସୌରଭ ଦେଇଥିବା ଠିକଣାରେ ପଠାଇଥିଲେ ।
ହେଲେ ତିନି ଦିନ ପରେ ମଧ୍ୟ ଦେଇଥିବା ଅର୍ଡର ନମିଳିବାରୁ ସୌରଭଙ୍କୁ ଫୋନ କରିଥିଲେ ପ୍ରକାଶ ଡାଲମିଆଁ । ଫୋନରେ ସୌରଭ କହିଥିଲେ, ଏବେ ଅଫର ଚାଲିଛି, ଆପଣ ଯଦି ଆଉ ୫ ହଜାର ସିମେଂଟ ବସ୍ତା ଅର୍ଡର କରନ୍ତି, ତେବେ ବସ୍ତା ପିଛା ଦର ୧୦ରୁ ୧୫ ଟଙ୍କାକୁ କମ କରିଦେଇପାରିବେ । ଏହା ଶୁଣିବା ପରେ ପ୍ରକାଶ ଡାଲମିଆଁଙ୍କ ସନ୍ଦେହହୋଇଥିଲା । ତେଣୁ ସେ ବ୍ୟାଙ୍କ ଯାଇ ଯାଂଚ କରିବା ପରେ ଜଣାପଡିଲା, ସେ ଠକେଇର ଶିକାର ହୋଇସାରିଛନ୍ତି ।
ସେ ପଠାଇଥିବା ଟଙ୍କା ଅମ୍ବୁଜା ସିମେଂଟ ଲିମିଟେଡ ପାଖକୁ ନଯାଇ ଆଉ ଜଣଙ୍କ ବ୍ୟକ୍ତିଗତ ଆକାଉଂଟକୁ ଟଙ୍କା ଯାଇଛି । ଆଶ୍ଚର୍ଯ୍ୟର କଥା ହେଉଛି, ପ୍ରକାଶଚନ୍ଦ୍ର ଟଙ୍କା ପଠାଇବା ପାଇଁ ଯେଉଁ ଠିକଣା, ଆକାଉଂଟ, ଆଇଏଫସି କୋଡ୍ ଫର୍ମରେ ପୂରଣ କରିଥିଲେ, ସେହି ଠିକଣାରେ ଟଙ୍କା ଯାଇ ନାହିଁ । କେବଳ ଆକାଉଂଟ ନଂବର ସମାନ ରହିଥିବା ବେଳେ ଆଏଫସି କୋଡଠୁ ଆରମ୍ଭ କରି ସବୁ ବଦଳି ଯାଇଛି । ଏନେଇ ପ୍ରକାଶଚନ୍ଦ୍ର ଡାଲମିଆ ଆରବିଆଇର ଦ୍ୱାରସ୍ଥ ହୋଇଥିଲେ, ଜବାବ ଦେଇ ଆରବିଆଇ କହିଛି, କେବଳ ଆକାଉଂଟ ନଂବର ଦେଖି ଟଙ୍କା ପଠାଯାଇଥାଏ ।
ଏଥିରେ ବ୍ୟାଙ୍କର କୌଣସି ଭୁଲ ନାହିଁ । ତେବେ ପ୍ରଶ୍ନ ଉଠୁଛି ଯେଉଁଠି ଦସ୍ତଖତ ଭୁଲ ଥିଲେ, ଫର୍ମରେ ତାରିଖ ଏପଟସେପଟ ହେଲେ ଟଙ୍କା ଉଠାଣରେ ଅସୁବିଧା ହୁଏ । ହେଲେ ଲକ୍ଷ ଲକ୍ଷ ଟଙ୍କାର ଜମା ବେଳେ ଠିକଣାକୁ ଗୁରୁତ୍ୱ ନଦେବା ଘଟଣା ସମସ୍ତଙ୍କ ମନରେ ସନ୍ଦେହ ସୃଷ୍ଟି କରିଛି ।