ତୃତୀୟ ଲହର ପାଇଁ ଏବେଠୁ ସଜାଗ । ଶିଶୁଙ୍କ ପାଇଁ ଏମ୍ସରେ ୧୪ ଆଇସିୟୁ ଶଯ୍ୟା ସହ ୬୦ ଶଯ୍ୟାର ବ୍ୟବସ୍ଥା ।
କନକ ବ୍ୟୁରୋ : ବଢ଼ୁଛି ତୃତୀୟ ଲହରରେ ଶିଶୁଙ୍କ ଚିନ୍ତା। ଏଥିପାଇଁ ଏମ୍ସ ପକ୍ଷରୁ ପ୍ରସ୍ତୁତି ଅନ୍ତିମ ପର୍ଯ୍ୟାୟରେ ପହଞ୍ଚି ସାରିଛି। ଶିଶୁଙ୍କ ପାଇଁ ୧୪ ଆଇସିୟୁ ସହ ଶିଶୁ ବିଭାଗରେ ୬୦ ଶଯ୍ୟାର ବ୍ୟବସ୍ଥା କରାଯାଇଛି। ଏପରିକି କୌଣସି ଶିଶୁ ରୋଗୀଙ୍କ ପାଇଁ ଏକ୍ମୋ ଚିକିତ୍ସାର ଆବଶ୍ୟକ ହେଲେ ମଧ୍ୟ ତା’ର ବ୍ୟବସ୍ଥା କରାଯିବ। ଏଥିପାଇଁ ସ୍ୱତନ୍ତ୍ର ଶିଶୁରୋଗ ବିଶେଷଜ୍ଞ ରହିଥିବା ଏମ୍ସ ପକ୍ଷରୁ କୁହାଯାଇଛି।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ଲହରରେ ଶହେରୁ ଅଧିକ କୋଭିଡ୍ ଆକ୍ରାନ୍ତ ନାବାଳକ ଏମ୍ସରେ ଚିକିତ୍ସାଧୀନ ଥିଲେ। ଦ୍ବିତୀୟ ଲହରରେ ପ୍ରାୟ ୫୦ରୁ ୬୦ଜଣ ଚିକିତ୍ସିତ ହୋଇଥିଲେ। ଉଭୟ ଲହରରେ ଚିକିତ୍ସାଧୀନ ଅବସ୍ଥାରେ କୋଭିଡରେ କୌଣସି ଶିଶୁଙ୍କ ମୃତ୍ୟୁ ହୋଇନାହିଁ। ତୃତୀୟ ଲହରରେ ସ୍ଥିତି ବଦଳିବା ନେଇ ବିଶେଷଜ୍ଞମାନେ କହୁଛନ୍ତି। ଏହାକୁ ଦୃଷ୍ଟିରେ ରଖି ଏମ୍ସରେ ଶିଶୁରୋଗ ଚିକିତ୍ସା ପାଇଁ ସ୍ୱତନ୍ତ୍ର କମିଟି ଗଠନ, କୋଭିଡ୍ ଆକ୍ରାନ୍ତ ଶିଶୁଙ୍କ ପାଇଁ ସ୍ୱତନ୍ତ୍ର ଗାଇଡଲାଇନ୍, ଆଡମିସନ୍ ପ୍ରୋଟୋକଲ ପ୍ରସ୍ତୁତ ହୋଇଛି। ଗୁରୁତର ସ୍ଥିତିରେ ଶିଶୁଙ୍କ ଚିକିତ୍ସା ପାଇଁ ସେମାନଙ୍କ ପାଇଁ ଥିବା ସ୍ୱତନ୍ତ୍ର ଆଇସିୟୁ, ଭେଣ୍ଟିଲେଟର୍, ଔଷଧ, ବିଭିନ୍ନ ପ୍ରକାର ପରୀକ୍ଷା ଉପକରଣ, ଟ୍ରାନ୍ସପୋର୍ଟ ବ୍ୟବସ୍ଥା ରହିଛି। ଅପରପକ୍ଷେ ସାଧାରଣ କୋଭିଡ୍ ରୋଗୀଙ୍କ ସହ ପରିଜନ ରୁହନ୍ତି ନାହିଁ। ଶିଶୁ କୋଭିଡ୍ ଆକ୍ରାନ୍ତଙ୍କ ସହ ତାଙ୍କର ଜଣେ ଅଭିଭାବକ ରହିବାକୁ ମଧ୍ୟ ଅନୁମତି ଦିଆଯିବ ବୋଲି ଏମ୍ସ ପକ୍ଷରୁ କୁହାଯାଇଛି।