ଟନେଲ ଟ୍ରାଜେଡି: ବାଧା ଭିତରେ ବି କମିନି ଜୋସ୍, ମଉଳିନି ମନୋବଳ । ଥକି ନାହାନ୍ତି ଉଦ୍ଧାରକାରୀ ଦଳ । ସେମାନେ ଜିତିବେ, ଜୀବନ ଜିତିବ…
କନକ ବ୍ୟୁରୋ: ଦିନ ପରେ ଦିନ ବିତୁଛି । ଘଣ୍ଟା କଣ୍ଟାର ଟିକ୍ ଟିକ୍ ଶବ୍ଦ ସହ ତାଳ ଦେଇ ସମୟ ଗଡିଚାଲିଛି ଆଉ କ୍ୟାଲେଣ୍ଡରର ତାରିଖ ବି ତା ହିସାବରେ ବଦଳି ଚାଲିଛି । କିନ୍ତୁ ଯାହା ବଦଳୁନି ତାହା ହେଉଛି ସୁଡଙ୍ଗ ଭିତରର ସ୍ଥିତି । ଅନେକ ଉଦ୍ୟମ ହେଉଛି, ଅପରେସନ ‘ଟନେଲ’ ଚାଲିଛି, ଜୀବନ ପାଇଁ ଜିଜାନ୍ ଲଗାଇ ଦିଆହୋଇଛି । ହେଲେ ପରିସ୍ଥିତି ସୁଧୁରିବାର ନାଁ ହିଁ ନେଉନି । ସବୁଦିନ ସକାଳେ ନୂଆ ଜୋସ୍ ନୂଆ ଉତ୍ସାହ ନେଇ ଅପରେସନ ଆରମ୍ଭ ହେଉଛି କିନ୍ତୁ ସଞ୍ଜକୁ ସେ ଆଶା ମଉଳିଯାଉଛି । ବାରମ୍ବାର ସମସ୍ୟା ସାମ୍ନାରେ ଅସୁଥିବାରୁ ଉଦ୍ଧାରର ଆଶା ଧିରେଧିରେ ଲମ୍ବି ଲମ୍ବି ଯାଉଛି । ଆଉ ଅନ୍ଧାରୀ ଜୀବନରୁ ମୁକ୍ତି ପାଇ ଆଲୋକ ଦେଖିବାର ସେ ସମୟ ଉପନୀତ ହେବା ସମ୍ଭବ ହେଉନି । କିନ୍ତୁ ତଥାପି ପ୍ରଶାସନ ତରଫରୁ ସବୁ ବ୍ୟବସ୍ଥା ହେଉଛି । ଉଦ୍ଧାରକାରୀ ଦଳ ଭାଙ୍ଗି ନାହାନ୍ତି ମନୋବଳ । ସେମାନେ ଜିତିବେ, ଜୀବନ ଜିତିବ ଆଉ ସୁଦୀର୍ଘ ସୁଡଙ୍ଗର ଅନ୍ଧାର ଭିତରୁ ଜୀବନ ଉଦ୍ଧାର ହେବ । ଏଇ ପଣ ନେଇ ଥକୁନି ରେସ୍କୁ ଟିମର ପାଦ ଓ ହାତ ।
Kanak News is now on WhatsApp
Join and get latest news updates delivered to you via WhatsApp
ତେବେ ଉତ୍ତରକାଶୀ ଟନେଲରେ ଫଶିଥିବା ଶ୍ରମିକମାନେ ଯେତେ ଶୀଘ୍ର ବାହାରକୁ ଆସିବେ ବୋଲି ଆଶା କରାଯାଉଥିଲା, ତାହା ବିଳମ୍ବ ହେବାର ଆଶଙ୍କା ସୃଷ୍ଟି ହୋଇଛି । ଖନନ ସମୟରେ ବାରମ୍ବାର ଲୁହା ଆସୁଥିବାରୁ ମେସିନର ବ୍ଲେଡ ଭାଙ୍ଗିବା ପରେ ଏହି ଆଶଙ୍କା ସୃଷ୍ଟି ହୋଇଛି । ତେବେ ପାହାଡର ଉପର ପଟୁ ସୁଡଙ୍ଗ କରି ଉଦ୍ଧାର ପାଇଁ ବିକଳ୍ପ ପନ୍ଥା ଆପଣାଯାଇଛି । ଆଉ ଉଦ୍ଧାରକାର୍ଯ୍ୟରେ ସହାୟତା ପାଇଁ ହାଇଦ୍ରାବାଦରୁ ଆସୁଛି ପ୍ଲାଜମା କଟର । ରବିବାର ସକାଳୁ ମେସିନ ଡ୍ରିଲିଂ ବଦଳରେ ମାନୁଆଲ ଡ୍ରିଲିଂ କରାଯିବ । ଆଉ ଏହା ସମୟ ସାପେକ୍ଷ ହେବା ଯୋଗୁଁ ଉଦ୍ଧାରକାର୍ଯ୍ୟରେ ବିଳମ୍ବ ହେବାର ଆଶଙ୍କା କରାଯାଉଛି ।
ସେପଟେ ଶ୍ରମିକଙ୍କ ଉଦ୍ଧାରକାର୍ଯ୍ୟରେ ବାଧା ଭିତରେ ଭଲ ଖବର ସାମ୍ନାକୁ ଆସିଛି । ଟନେଲ ଭିତରେ ଥିବା ସବୁ ଶ୍ରମିକ ସୁସ୍ଥ ଅଛନ୍ତି । ଶ୍ରମିକଙ୍କ ପାଖକୁ ଠିକ ସମୟରେ ଖାଦ୍ୟପାନୀୟ ପଠାଯାଉଛି । ଶ୍ରମିକଙ୍କ ସହ ଲଗାତାର ଯୋଗାଯୋଗରେ ଥିବା ନେଇ କହିଛନ୍ତି ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ।
ଚଳିତ ମାସ ନଭେମ୍ବର ୧୨ ତାରିଖରେ ସୁଡ଼ଙ୍ଗ କାମ କରୁଥିବାବେଳେ ମାଟି ଅତଡ଼ା ଓ ପଥର ପଡ଼ି ଶ୍ରମିକ ମାନେ ଟନେଲ ଭିତରେ ଫସିରହିଥିଲେ । ଉତ୍ତରକାଶୀରୁ ପ୍ରାୟ ୩୦ କିଲୋମିଟର ଦୂରରେ ଥିବା ସିଲକ୍ୟାରା ସୁଡ଼ଙ୍ଗରେ ଏହି ଖନନ ଚାଲିଥିଲା । ଟନେଲ ନିର୍ମାଣ କାର୍ଯ୍ୟରେ ୮ଟି ରାଜ୍ୟର ୪୧ ଜଣ ଶ୍ରମିକ ଫସିରହିଛନ୍ତି । ଯେଉଁଥିରେ ଝାରଖଣ୍ଡର ସର୍ବାଧିକ ୧୫ଜଣ, ଉତ୍ତରପ୍ରଦେଶର ୮ଜଣ, ଓଡ଼ିଶାର ୫ଜଣ, ବିହାରର ୫ଜଣ, ଆସାମର ୨ଜଣ, ଉତ୍ତରାଖଣ୍ଡର ୨ଜଣ ଓ ପଶ୍ଚିମବଙ୍ଗର ୩ଜଣ, ହିମାଚଳ ପ୍ରଦେଶର ଜଣେ ଶ୍ରମିକ ଅଛନ୍ତି । ଶ୍ରମିକମାନେ ଭଲରେ ଭଲରେ ଉଦ୍ଧାର ହୋଇଯାଆନ୍ତୁ ଆଉ ସେମାନେ ସେମାନଙ୍କ ଘରକୁ ଫେରନ୍ତୁ । ଏହାହିଁ ପ୍ରାର୍ଥନା କରୁଛନ୍ତି ଦେଶବାସୀ ।