କେଉଁମାନେ ରହିବେ କ୍ୱାରେଂଟିନ କେନ୍ଦ୍ରରେ? ସ୍ପଷ୍ଟ କଲେ ସରକାର, ବାହାରୁ ଆସୁଥିଲେ ୧୪ ନହେଲେ ୭ଦିନ ସଂଗରୋଧରେ ରହିବାକୁ ବାଧ୍ୟ, ୩ଦିନ ପାଇଁ ରାଜ୍ୟ ବାହାରକୁ କି ଭିତରକୁ ଆସୁଥିଲେ କ୍ୱାରେଣ୍ଟିନରେ ରହିବା ଦରକାର ନାହିଁ
କନକ ବ୍ୟୁରୋ: ରାଜ୍ୟରେ ୧୪ ଦିନିଆ ବାଧ୍ୟତାମୂଳକ କ୍ୱାରେଂଟାଇନ ବ୍ୟବସ୍ଥା ଲାଗୁ କଲେ ସରକାର । ଯାହାକୁ ଜିଲ୍ଲାପାଳମାନେ ଗ୍ରାମାଂଚଳରେ ସରପଂଚଙ୍କ ମାଧ୍ୟମରେ କରାଇବା ସହ ମ୍ୟୁନିସପାଲ କମିଶନରମାନେ ସହରାଂଚଳମାନଙ୍କରେ ଏହି ନିୟମକୁ କଡାକଡି ଭାବେ ଲାଗୁ କରିପାରିବେ । ତେବେ ଗ୍ରାମାଂଚଳକୁ ଆସୁଥିବା ପ୍ରବାସୀ ଓଡିଆମାନେ ଏହି ୧୪ ଦିନିଆ କ୍ୱାରେଂଟାଇନ ନିୟମ ଅନୁସାରେ ଅନ୍ତତଃ ୭ ଦିନ ସଂଗରୋଧ କେନ୍ଦ୍ରରେ ରହିବାକୁ ବାଧ୍ୟ । ତେବେ ସେ ଯେଉଁଥିରେ ବି ଆସିଥାଆନ୍ତୁ ନା କାହିଁକି । ସେହିଭଳି ୭ଦିନ ପରେ ଯଦି ସଂପୃକ୍ତ ବ୍ୟକ୍ତିଙ୍କଠାରେ କରୋନା ଲକ୍ଷଣ ଦେଖା ନ ଯାଏଁ ତେବେ ସେ ଆଉ ୭ ଦିନ ନିଜ ଘରେ ରହିପାରିବେ । ସେହିଭଳି ଯଦି ସ୍ଥାନୀୟ କର୍ତ୍ତୃପକ୍ଷ ଅନୁଭବ କରିବେ ଯେ ବ୍ୟକ୍ତି ଜଣଙ୍କ ଘରେ କ୍ୱାରେଂଟିନରେ ରହିବାକୁ ସଠିକ୍ ସୁବିଧା ନାହିଁ କିମ୍ବା ସଂକ୍ରମଣକୁ ରୋକିବାକୁ ସ୍ଥାନୀୟ ପ୍ରଶାସନ ଚାହିଁଲେ ଏହି ଅବଧିକୁ ବଢାଇପାରିବେ ବୋଲି ସ୍ପଷ୍ଟ କରିଛନ୍ତି ରାଜ୍ୟ ସରକାର ।
Kanak News is now on WhatsApp
Join and get latest news updates delivered to you via WhatsApp
ଯଦି ଏହି ୧୪ ଦିନ ଭିତରେ ସଂପୃକ୍ତ ବ୍ୟକ୍ତିଙ୍କଠାରେ କୋଭିଡ ଲକ୍ଷଣ ଦେଖା ଯାଏଁ ତେବେ ସେମାନଙ୍କୁ ସିଧାସଳଖ ଭାବେ ମେଡିକାଲକୁ ପଠା ଯାଇପାରିବ ନାହିଁ । ସେମାନେ ୧୦୪ ହେଲପଲାଇନ ନମ୍ବରକୁ କଲ କରିବେ ଆଉ ଡାକ୍ତରଙ୍କ ପରାମର୍ଶ କ୍ରମେ ହସ୍ପିଟାଲକୁ ଯିବେ ବୋଲି କହିଛନ୍ତି ଏସଆରସି । ସେହିଭଳି ସହରାଂଚଳକୁ ଆସୁଥିବା ପ୍ରବାସୀ ଓଡିଆ ବାଧ୍ୟତାମୂଳକ ଭାବେ ହୋମ କ୍ୱାରେଂଟିନରେ ରହିବେ । ଏହି ସମୟରେ ରାଜ୍ୟ ସରକାରଙ୍କ ସ୍ୱାସ୍ଥ୍ୟ ବିଭାଗ ଦ୍ୱାରା ଜାରି ହୋଇଥିବା ସମସ୍ତ କ୍ୱାରେଂଟାଇନ ସର୍ତ୍ତାବଳୀ ସେ ପାଳନ କରିବେ । ଯଦି ତାଙ୍କ ଘରେ ସଠିକ୍ ସୁବିଧା ନଥାଏ ବା କ୍ୱାରେଂଟାଇନ ଅବଧି ସମୟରେ ସେ ସର୍ତ୍ତବାଳୀକୁ ଉଲ୍ଲଂଘନ କରନ୍ତି ତେବେ ଏଭଳି ପରିସ୍ଥିତିରେ ସ୍ଥାନୀୟ କର୍ତ୍ତୃପକ୍ଷ ତାଙ୍କୁ ସରକାରଙ୍କ ଦ୍ୱାରା ପରିଚାଳିତ ସଂଗରୋଧ କେନ୍ଦ୍ରରେ ରହିବାକୁ ନିର୍ଦ୍ଦେଶ ଦେଇପାରନ୍ତି । କିମ୍ବା ବ୍ୟକ୍ତି ଚାହିଁଲେ ଚିହ୍ନଟ ହୋଟେଲରେ ପେଡ୍ କ୍ୱାରେଂଟାଇନରେ ରହିପାରିବେ । ତେବେ ପେଡ୍ କ୍ୱାରେଂଟାଇନର ସମସ୍ତ ଖର୍ଚ୍ଚ ସଂପୃକ୍ତ ବ୍ୟକ୍ତି ବହନ କରିବେ । କାରଣ ପେଡ୍ କ୍ୱାରେଂଟାଇନର ଖର୍ଚ୍ଚ ସରକାର ବହନ କରିବେ ନାହିଁ ବୋଲି ସ୍ପଷ୍ଟ କରିଛନ୍ତି ଏସଆରସି ପ୍ରଦୀପ ଜେନା ।
ଅନ୍ୟପକ୍ଷରେ କିଛି ସରକାରୀ କର୍ମଚାରୀ, ବ୍ୟବସାୟୀ, କିଛି କୁଶଳିବ୍ୟକ୍ତି କିମ୍ବା କର୍ମଜୀବୀ ତଥା ଅନ୍ୟ କୌଣସି ବ୍ୟକ୍ତି କୌଣସି କାମରେ ଓଡିଶାକୁ ଆସୁଛନ୍ତି ଏବଂ ସେମାନଙ୍କର ଓଡିଶାରେ ୩ ଦିନରୁ ଅଧିକ ଦିନ ରହିବାର ନାହିଁ । ତେବେ ଏଭଳି ବ୍ୟକ୍ତିଙ୍କୁ କ୍ୱାରେଂଟାଇନରେ ରହିବାର ଆବଶ୍ୟକତା ନାହିଁ । ସେହିଭଳି ଯଦି ଓଡିଶାର କୌଣସି ବ୍ୟକ୍ତି ବାହାର ରାଜ୍ୟକୁ ୩ ଦିନ ପାଇଁ ଯାଉଛନ୍ତି ତେବେ ସେ ମଧ୍ୟ କ୍ୱାରେଂଟାଇନରେ ରହିବାର କୌଣସି ଆବଶ୍ୟକତା ନାହି ବୋଲି ସୂଚନା ଦେଇଛନ୍ତି ଏସଆରସି ପ୍ରଦୀପ ଜେନ ।