ପାକିସ୍ତାନରେ ବସ ଉପରେ ଆକ୍ରମଣ । ସେନା ପୋଷାକରେ ପ୍ରଥମେ ବସରେ ପଶି ପରିଚୟ ପତ୍ର ମାଗିଲେ, ପରେ ୧୪ ଜଣଙ୍କୁ ଗୁଳିକରି ହତ୍ୟା କଲେ ଅଜ୍ଞାତ ବନ୍ଧୁକଧାରୀ

ପାକିସ୍ତାନର ଅଶାନ୍ତ ବେଲୁଚିସ୍ତାନରେ କିଛି ଅଜ୍ଞାତ ବନ୍ଧୁକଧାରୀ ରାସ୍ତାରେ ଯାଉଥିବା ଏକ ବସରୁ କିଛି ଯାତ୍ରୀଙ୍କୁ ଓହ୍ଲାଇବା ପରେ ପ୍ରାୟ ୧୪ ଜଣଙ୍କୁ ଗୁଳିକରି ହତ୍ୟା କରିଛନ୍ତି । ତେବେ ଏହି ଅଜ୍ଞାତ ବନ୍ଧୁକଧାରୀ କିଏ ତାହା ଏଯାଏଁ ସ୍ପଷ୍ଟ ହୋଇନାହିଁ । ମିଳିଥିବା ସୂଚନା ମୁତାବିକ, ସେନା ପୋଷାକ ପିନ୍ଧିଥିବା ପ୍ରାୟ ୧୫ରୁ ୨୦ ଅଜ୍ଞାତ ବନ୍ଧୁକଧାରୀ କରାଚୀରୁ ଗ୍ୱାଦର ମଧ୍ୟରେ ଚାଲୁଥିବା ୫ରୁ ୬ ବସକୁ ଅଟକାଇଥିଲେ । ତେବେ ବେଲୁଚିସ୍ତାନର ଓରମାରାର ରାଜପଥରେ ଯାଉଥିବା ଏକ ବସକୁ ଅଟକାଇବା ସହ ସମସ୍ତ ଯାତ୍ରୀଙ୍କର ପରିଚୟ ପତ୍ର ଯାଞ୍ଚ କରିଥିଲେ । ଆଉ ଏମାନଙ୍କ ମଧ୍ୟରୁ ୧୬ ଜଣଙ୍କୁ ତଳକୁ ଓହ୍ଲାଇ ଆଣିଥିଲେ ।

ପାକିସ୍ତାନ ଗଣମାଧ୍ୟମ ଡନର ସୂଚନା ଅନୁଯାୟୀ, ଅଜ୍ଞାତ ବନ୍ଧୁକଧାରୀ ପ୍ରାୟ ୧୪ ଜଣ ଯାତ୍ରୀଙ୍କୁ ଗୁଳି କରି ହତ୍ୟା କରିଥିବା ବେଳେ ଦୁଇ ଜଣ ଖସି ଯିବାରେ ସକ୍ଷମ ହୋଇଥିଲେ । ପରେ ପାଖରେ ଥିବା ଏକ ପୋଲିସ ଥାନାରେ ପହଞ୍ଚିବା ସହ ନିଜର ଜୀବନ ବଞ୍ଚାଇବାକୁ ସକ୍ଷମ ହୋଇଥିଲେ । ପରେ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି ।

ଆକ୍ରମଣ ପରେ ଘଟଣାସ୍ଥଳରେ ପୋଲିସ ପହଞ୍ଚି ଯାଞ୍ଚ ଆରମ୍ଭ କରିଛି । ଏପରିକି ହତ୍ୟା ପଛର କାରଣ ଓ ମୃତ୍ୟୁବରଣ କରିଥିବା ବ୍ୟକ୍ତିଙ୍କର ଏଯାଏଁ ପରିଚୟ ମିଳିପାରିନାହିଁ । ପାକିସ୍ତାନର ଏହି ପ୍ରାନ୍ତରେ ସବୁବେଳେ ଅଶାନ୍ତି ଲାଗି ରହୁଥିବା ବେଳେ ଏଭଳି ଘଟଣା ସ୍ଥାନୀୟ ବାସୀଙ୍କ ମନରେ ଛନକା ପୂରାଇଛି ।