୧୫ ଦିନ ପରେ ଆସିବ କି ଭଲ ଖବର? ବରିଷ୍ଠ ଡାକ୍ତର ଅଶୋକ ମହାପାତ୍ର କହିଲେ, ୧୫ ଦିନପରେ ଦିଲ୍ଲୀ ଭଳି ଓଡିଶାରେ କମିପାରେ ସଂକ୍ରମଣ । ସେପଟେ ବରିଷ୍ଠ ଭେଷଜ ବିଶେଷଜ୍ଞଙ୍କ ମତ, ଶୀର୍ଷକୁ ଯିବାପାଇଁ ଆହୁରି ଲାଗିପାରେ ଦେଢମାସ ।
କନକ ବ୍ୟୁରୋ: ରାଜ୍ୟରେ ଲଗାତର ଉପରମୁହାଁ ହେଉଥିବା କରୋନାର ଏହି ଗ୍ରାଫ ଆହୁରି ୧୫ ଦିନ ଲାଗି ରହିବ । ଭୂତାଣୁ ସଂକ୍ରମଣ ପିକ୍ରେ ରହିବ । ଅର୍ଥାତ୍, ଆକ୍ରାନ୍ତଙ୍କ ସଂଖ୍ୟା ଅଧିକ ବଢିବ । ଜୁନ୍ ମାସରେ ରାଜ୍ୟରେ କରୋନା ଶୀର୍ଷରେ ପହଁଚିବ ବୋଲି ପ୍ରଥମେ ଆକଳନ କରାଯାଇଥିଲା । ହେଲେ ଜୁଲାଇ ମାସରେ ଏହା ରେକର୍ଡ ପରେ ରେକର୍ଡ କରି ଚାଲିଛି । ସୋଆ ବିଶ୍ୱବିଦ୍ୟାଳୟର କୂଳପତି ତଥା ଏମ୍ସର ପୂର୍ବତନ ନିର୍ଦ୍ଦେଶକ ଡାକ୍ତର ଅଶୋକ ମହାପାତ୍ର କହିଛନ୍ତି, ଆଉ ୧୫ ଦିନ ଅର୍ଥାତ୍ ଅଗଷ୍ଟ ଦ୍ୱିତୀୟ ସପ୍ତାହ ଯାଏ ରାଜ୍ୟରେ ଦ୍ରୁତ ଗତିରେ ବଢିବ ସଂକ୍ରମଣ । ତାପରେ ସଂକ୍ରମଣ କମିବା ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ବିଶେଷଜ୍ଞଙ୍କ ମତ ଅନୁସାରେ, ଅଧିକ ସଂଖ୍ୟାରେ ଆକ୍ରାନ୍ତ ହେଲା ପରେ ହିଁ ହର୍ଡ ଇମ୍ୟୁନିଟି ବା ଗୋଷ୍ଠୀ ପ୍ରତିରୋଧକ ଶକ୍ତି ସୃଷ୍ଟି ହୁଏ । ଏହାପରେ ସଂକ୍ରମଣ ନିୟନ୍ତ୍ରଣକୁ ଆସିଥାଏ । ତେଣୁ ରାଜ୍ୟରେ କେବେ ସଂକ୍ରମଣ ହ୍ରାସ ପାଇବ ତାହା ନିର୍ଭର କରୁଛି ସଂକ୍ରମଣର ଶୀର୍ଷ ସ୍ତର ଉପରେ । ଏଭଳି ସ୍ଥିତିରେ ବରିଷ୍ଠ ଚିକିତ୍ସକ ନିରଜ ମିଶ୍ରଙ୍କ ମତ ହେଉଛି, ରାଜ୍ୟରେ ସଂକ୍ରମଣ ଶୀର୍ଷ ସ୍ତରରେ ପହଁଚିବାକୁ ଆହୁରି ମାସେରୁ ଦେଢମାସ ସମୟ ଲାଗିପାରେ । ..
ଦେଶରେ କରୋନାର ହଟସ୍ପଟ ପାଲଟିଥିବା ଦିଲ୍ଲୀରେ ମଧ୍ୟ ସମାନ ଦୃଶ୍ୟ ଦେଖିବାକୁ ମିଳିଥିଲା । ଦିଲ୍ଲୀରେ ଏପ୍ରିଲ, ମେ ଓ ଜୁନ୍ ତିନି ମାସ ଧରି ସଂକ୍ରମଣ ବଢିଚାଲିଲା । କେବଳ ଜୁନ୍ ମାସରେ ୩୧୯ ପ୍ରତିଶତ ବଢିଯାଇଥିଲା ସଂକ୍ରମଣ । ଆଉ ଜୁଲାଇରେ ସଂକ୍ରମଣର ହାର ରହିଛି ୪୮ ପ୍ରତିଶତ । ସଂକ୍ରମଣ ଶୀର୍ଷରେ ପହଂଚିବା ପରେ ହ୍ରାସ ପାଇବାରେ ଲାଗିଛି । ବିଶେଷଜ୍ଞଙ୍କ ଆକଳନ କହୁଛି, ଆମ ରାଜ୍ୟରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିପାରେ । ଅର୍ଥାତ୍ ଶୀର୍ଷକୁ ଯାଇ ହ୍ରାସ ପାଇବ ସଂକ୍ରମଣ ।