କିଏ ଦେହରେ ମହୁମାଛିକୁ ଛାଡୁଛି, ତ ପୁଣି କିଏ ୧୪ ଫୁଟର ନିଶ ରଖିଛି? ଗିନିଜ ୱାର୍ଲ୍ଡ ରେକର୍ଡରେ ସାମିଲ ହୋଇଥିବା କିଛି ଅଜବ ରେକର୍ଡ । ଜାଣନ୍ତୁ ଏହି ରେକର୍ଡ ବୁକରେ କେଉଁ ଭାରତୀୟ ଅଛନ୍ତି ସାମିଲ?
କନକ ବ୍ୟୁରୋ : ରେକର୍ଡ ବୁକରେ ସାମିଲ ହେବା ପାଇଁ କିଏ ବା ନ ଚାହେଁ । ଦୁନିଆର ଏମିତି ଅନେକ ମଣିଷ ଅଛନ୍ତି ଯେଉଁମାନେ ରେକର୍ଡ ହାସଲ କରିବାକୁ ଭିନ୍ନ ଭିନ୍ନ ତରିକା ଆପଣାଇଥାନ୍ତି । ପୂରା ବିଶ୍ୱରେ ନିଜର ଏକ ସ୍ୱତନ୍ତ୍ର ଛାପ ଛାଡିବାକୁ ଅହରହ ଉଦ୍ୟମ କରିଥାନ୍ତି । କିଏ ନିଜର ପ୍ରତିଭା ବଳରେ ବିଶ୍ୱ ରେକର୍ଡ କରିଥାଏ ତ ପୁଣି କିଏ କିଛି ଭିନ୍ନ ଅନ୍ଦାଜ ପାଇଁ ଏହି ତାଲିକାରେ ନିଜ ନାଁ ଯୋଡିଥାଏ । ଗିନିଜ୍ ୱାର୍ଲ୍ଡ ରେକର୍ଡ ବୁକରେ ଏଭଳି ଅନେକ ରେକର୍ଡଧାରୀ ରହିଛନ୍ତି । କିନ୍ତୁ ଏମାନଙ୍କ ମଧ୍ୟରୁ କିଛି ଲୋକପ୍ରିୟ ଓ ଜଣାଶୁଣା ରେକର୍ଡଧାରୀ ରହିଛନ୍ତି ଯେଉଁମାନେ କିଛି ଭିନ୍ନ ଅନ୍ଦାଜ ପାଇଁ ବିଶ୍ୱରେ ପରିଚୟ ହାସଲ କରିଛନ୍ତି । ସେହିଭଳି ଜଣେ ରେକର୍ଡଧାରୀ ହେଉଛନ୍ତି ଭାରତର ନୀଲାଂଶୀ ପଟେଲ । ଗୁଜୁରାଟର ନିଲାଂଶି ୨୦୧୯ରେ ଟିନଏଜ କାଟାଗୋରୀରେ ଲମ୍ବା କେଶ ରଖି ଗିନିଜ ୱାର୍ଲ୍ଡ ରେକର୍ଡରେ ସାମିଲ ହୋଇଛନ୍ତି । ୧୯୦ ସେଣ୍ଟିମିଟର ଲମ୍ବର କେଶ ରଖି ନିଲାଂଶି ଏଭଳି କୀର୍ତ୍ତିମାନ ହାସଲ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାଧାରଣତଃ ଆମେ ଦେଖୁଥିବା ପିଆଜ ଅତି ବେଶିରେ କେତେ ଗ୍ରାମ ହୋଇପାରେ? ୧୦୦ ଗ୍ରାମରୁ ଅଧିକ ଓଜନର ପିଆଜ ହୁଏତ ଆପଣ କେବେ ଦେଖିନଥିବେ । କିନ୍ତୁ ଇଂଲଣ୍ଡର ପିଟର ଗ୍ଲେଜବ୍ରୁକ୍ ଦୁନିଆର ସବୁଠୁ ବଡ ପିଆଜର ମାଲିକ ହେବା ସହ ଗିନିଜ୍ ୱାର୍ଲ୍ଡ ରେକର୍ଡ ବୁକରେ ସାମିଲ ହୋଇଛନ୍ତି । ପିଟର ଉତ୍ପାଦନ କରିଥିବା ପିଆଜର ଓଜନ ୮ କେଜିରୁ ମଧ୍ୟ ଅଧିକ ରହିଛି । ଅନ୍ୟ ଜଣେ ଭାରତୀୟ ରାମ ସିଂ ଚୌହ୍ୱାନ ମଧ୍ୟ ନିଜର ଭିନ୍ନ ଏକ ସୌକ ପାଇଁ ଗିନିଜ୍ ୱାର୍ଲ୍ଡ ରେକର୍ଡରେ ସାମିଲ ହୋଇଛନ୍ତି । ରାମ ସିଂ ନିଜର ଲମ୍ବା ନିଶ ପାଇଁ ଏହି ରେକର୍ଡ ହାସଲ କରିଛନ୍ତି । ୧୪ ଫୁଟରୁ ଅଧିକ ଲମ୍ବର ନିଶ ରଖିଥିବା ରାମ ସିଂ ଦୀର୍ଘ ୩୯ ବର୍ଷ ହେବ ନିଜର ନିଶ କାଟି ନାହାଁନ୍ତି ।
ରଷିଆର ୪୯ ବର୍ଷୀୟ ମହିଳା ସ୍ୱେଲାନା ବିଶ୍ୱର ସବୁଠୁ ଲମ୍ବା ଗୋଡ ଥିବା ମହିଳା ଭାବେ ରେକର୍ଡ କରିଛନ୍ତି । ୫୧.୯ ଇଞ୍ଚର ଲମ୍ବା ଗୋଡ ଥିବା ସ୍ୱେଲାନା ଗିନିଜ୍ ୱାର୍ଲ୍ଡ ରେକର୍ଡ ବୁକରେ ସାମିଲ ହୋଇଛନ୍ତି । ସେହିଭଳି ଲମ୍ବା ନଖ ରଖି କ୍ରିସ ବୋଲଟନ ଏହି ରେକର୍ଡ ତାଲିକାରେ ନିଜର ନାଁ ଯୋଡିଛନ୍ତି । କ୍ରିସଙ୍କର ବାମ ହାତର ନଖ ୧୦ ଫୁଟ ୨ ଇଞ୍ଚ ଲମ୍ବର ହୋଇଥିବା ବେଳେ ଡାହାଣ ହାତ ନଖର ଲମ୍ବ ୯ ଫୁଟ୍ ୭ ଇଞ୍ଚ ରହିଛି । ଦୀର୍ଘ ୧୮ ବର୍ଷ ଧରି କ୍ରିସ ନଖ ବଢାଇ ଆସୁଛନ୍ତି ।
ଚୀନର ସି ପିଙ୍ଗ ମଧ୍ୟ ନିଜର ଭିନ୍ନ ଅନ୍ଦାଜ ପାଇଁ ଗିନିଜ୍ ୱାର୍ଲ୍ଡ ରେକର୍ଡ ବୁକରେ ସାମିଲ ହୋଇଛନ୍ତି । ସି ପିଙ୍ଗ ନିଜ ଶରୀରରେ ୩ ଲକ୍ଷରୁ ଅଧିକ ମହୁମାଛି ରଖି ଏକ ନିଆରା ରେକର୍ଡ ହାସଲ କରିଛନ୍ତି । ସି ପିଙ୍ଗଙ୍କ ଶରୀରରେ ଛଡାଯାଇଥିବା ମହୁମାଛିଙ୍କର ଓଜନ ପ୍ରାୟ ୩୩ କିଲୋଗ୍ରାମ ରହିଥିଲା । ଏତେ ସଂଖ୍ୟକ ମହୁମାଛିଙ୍କ ଦେହରେ ବସିଥିଲେ ମଧ୍ୟ ଭୟଭୀତ ହୋଇନଥିଲେ ସି ପିଙ୍ଗ । ଏସବୁ ଭିତରେ ଚଳିତ ଦୀପାବଳିରେ ଅଯୋଧ୍ୟାର ଦୀପତ୍ସୋବ ସମାରୋହ ମଧ୍ୟ ଗିନିଜ୍ ୱାର୍ଲ୍ଡ ରେକର୍ଡରେ ସାମିଲ ହୋଇଛି । ଏହି ଉତ୍ସବରେ ଅଯୋଧ୍ୟାରେ ଏକକାଳୀନ ପାଖାପାଖି ସାଢେ ୫ ଲକ୍ଷ ଦୀପ ଜଳିବା ସହ ରେକର୍ଡ ବୁକରେ ସାମିଲ ହୋଇଥିଲା ।