ଜଙ୍ଗଲରେ ୧୨ ଘଣ୍ଟା ବନ୍ଧକ ରଖିଲେ ପ୍ରତିଦ୍ୱନ୍ଦ୍ୱୀ! ସମବାୟ ନିର୍ବାଚନରେ ଲଢ଼ିବା ପଡିଲା ମହଙ୍ଗା ।
କନକ ବ୍ୟୁରୋ: ଜଙ୍ଗଲରେ ୧୨ ଘଣ୍ଟା ବନ୍ଧକ ରଖିଲେ ପ୍ରତିଦ୍ୱନ୍ଦ୍ୱୀ । ସମବାୟ ନିର୍ବାଚନରେ ଲଢ଼ିବା ପଡିଲା ମହଙ୍ଗା । ମାଲକାନଗିରିରୁ ଆସିଛି ଏମିତି ଏକ ଅଭିଯୋଗ । କୋରାପୁଟ ସମବାୟ ବ୍ୟାଙ୍କର ୮ ନଂ ଜୋନରେ ନିର୍ଦ୍ଦେଶକ ପଦବୀ ପାଇଁ ପ୍ରତିଦ୍ୱନ୍ଦିତା କରିଥିବା ମାଲକାନଗିରି ନାୟଗୁଡା ଗାଁର ହଳଦଧର କୋପେ । ବିଜେପି ସମର୍ଥନରେ ସେ ଗତ ୩୦ ତାରିଖରେ ନାମାଙ୍କନ ପତ୍ର ଦାଖଲ କରିଥିଲେ । ହେଲେ, ଏହି ନାମାଙ୍କନ ଦାଖଲ ତାଙ୍କ ପାଇଁ ବିପଦକୁ ଡାକି ଆଣିଥିଲା । ମତଦାନ ପାଇଁ ମାଲକାନଗିରି ଯିବା ସମୟରେ ତାଙ୍କୁ ପ୍ରତିଦ୍ୱନ୍ଦ୍ୱୀ ପ୍ରାର୍ଥୀ ଅପହରଣ କରିନେଇଥିଲେ । ଆଉ ଘଞ୍ଚ ଜଙ୍ଗଲ ଭିତରେ ୧୨ଘଣ୍ଟା ବନ୍ଧକ ରଖିବା ପରେ ତାଙ୍କୁ ନିସ୍ତୁକ ମାଡ ମାରି, ଲଣ୍ଡା କରି ଛାଡି ଦେଇଥିବା ସେ ଅଭିଯୋଗ କରିଛନ୍ତି । ଏନେଇ ୩ଜଣଙ୍କ ବିରୋଧରେ ମାଲକାନଗିରି ଥାନାରେ ଏତଲା ଦେଇଛନ୍ତି ହଳଧର ।
Kanak News is now on WhatsApp
Join and get latest news updates delivered to you via WhatsApp
ହଳଧରଙ୍କ ଅଭିଯୋଗ ଅନୁସାରେ ପ୍ରାର୍ଥୀ ପତ୍ର ପ୍ରତ୍ୟାହାର କରିବା ପାଇଁ ତାଙ୍କ ଉପରେ ଶାସକ ଦଳର ଜଣେ ବରିଷ୍ଠ ନେତା ଓ ତାଙ୍କ ସମର୍ଥକ ଚାପ ପକାଇଥିଲେ । କିନ୍ତୁ ସେ ସେମାନଙ୍କ କଥାରେ ରାଜି ନହେବାରୁ ଯୋଜନାବଦ୍ଧ ଭାବେ ଏଭଳି କରିଛନ୍ତି । ତେଣୁ ଦୁବୃର୍ତଙ୍କୁ ତୁରନ୍ତ ଗିରଫ ପାଇଁ ହଳଧର ଦାବି କରିଛନ୍ତିି । ଅଭିଯୋଗକୁ ଆଧାର କରି ତଦନ୍ତ ଆରମ୍ଭ କରିଛି ମାଲକାନଗିରି ଥାନା ପୋଲିସ ।
ସମବାୟ ବ୍ୟାଙ୍କ ନିର୍ବାଚନରେ ରାଜନୈତିକ ଛକାପଂଝା ହୁଏ । ହେଲେ, ସାଧାରଣ ନିର୍ବାଚନ ଭଳି ହିଂସା ଏବଂ କାହାକୁ ଅପହରଣ କରି ଏମିତି ନିର୍ଯାତନା ଦେବା ପ୍ରାୟତଃ କେବେ ସାମନାକୁ ଆସିନଥାଏ । କିନ୍ତୁ ମାଲକାନଗିରିରୁ ଆସିଥିବା ଏହି ଅଭିଯୋଗ ରାଜ୍ୟରେ ଚାଲିଥିବା ସମବାୟ ନିର୍ବାନର ଅନେକ ଦିଗକୁ ଇଙ୍ଗିତ କରୁଛି । ଯାହା ସତ ହୋଇଥିଲେ ସାଂଘାତିକ ।