କନକ ବ୍ୟୁରୋ: ବାଲେଶ୍ୱର ଉପଜିଲ୍ଲାପାଳଙ୍କୁ ଆକ୍ରମଣ ଘଟଣାକୁ ନେଇ ଆକ୍ସନରେ ଜିଲ୍ଲା ପ୍ରଶାସନ । ୧୧ ଜଣଙ୍କୁ ଗିରଫ କଲା ପୋଲିସ । ଗିରଫଙ୍କ ମଧ୍ୟରେ ୩ଜଣ ମହିଳା ଅଛନ୍ତି । ତେବେ ମୁଖ୍ୟ ଅଭିଯୁକ୍ତ କୁହାଯାଉଥିବା ଚିତ୍ତରଞ୍ଜନ ବେହେରା ଓରଫ କଟି ଫେରାର ହୋଇଯାଇଛି । ଚିତ୍ତଙ୍କର ଏକ ଇଟା ଭାଟି ରହିଛି । ଆଜି ପ୍ରଶାସନ ପକ୍ଷରୁ ସେହି ବେଆଇନ ଇଟା ଭାଟିକୁ ଭଙ୍ଗାଯାଇଛି । ସୂଚନା ଅନୁସାରେ ଦୀର୍ଘ ୨୦ ବର୍ଷ ହେବ ବେହେରା ପରିବାର ବେଆଇନ ଭାବେ ଇଟା ଭାଟି ଓ ବାଲି ଚୋରା ଚାଲାଣ କରି କଳା ସାମ୍ରାଜ୍ୟ ବିସ୍ତାର କରିଛନ୍ତି । ବିଭିନ୍ନ ଅପରାଧିକ କାର୍ଯ୍ୟରେ ଲିପ୍ତ ଅଛନ୍ତି । ଝାଡଖଣ୍ଡ ଅଞ୍ଚଳରୁ ଶ୍ରମିକ ଆଣି ଇଟା ଭାଟିରେ ଲଗାଉଥିଲେ । ଅନ୍ୟପଟେ ଚୋରା ବାଲି ଚାଲାଣ କରିବାକୁ ପଦକ୍ଷେପ ନେଇଛି ପୁଲିସ । ଏସପିଙ୍କ ସୂଚନା ଅନୁସାରେ ଉପଜିଲ୍ଲାପାଳଙ୍କୁ ଆକ୍ରମଣ ଘଟଣାରେ ୩୦ଜଣ ସମ୍ପୃକ୍ତ ଅଛନ୍ତି । ୧୧ଜଣ ଗିରଫ ହୋଇଛନ୍ତି ଓ ଅନ୍ୟ ମାନଙ୍କୁ ଖୋଜା ଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ଗତ ୨ତାରିଖରେ ବାଲିମାଫିଆମାନେ ବୁଢାବଳଙ୍ଗ ନଦୀରୁ ବାଲି ଉତ୍ତୋଳନ କରୁଥିବାବେଳେ ଉପଜିଲ୍ଲାପାଳ ମୋତିରାମ ଚୌହ୍ୱାନଙ୍କ ନେତୃତ୍ୱରେ ଏକ ଟିମ୍ ସେଠାରେ ଚଢାଉ କରିଥିଲା । ଚଢାଉ କରି ୨ ଟି ଜେସିବି, ୪ଟି ଡମ୍ପର, ଟ୍ରାକ୍ଟର ସହ ଶତାଧିକ ବାଲି ଟ୍ରିପ ଜବତ କରି ସ୍ଥାନୀୟ ଲୋକଙ୍କୁ ତାର ଜଗାରଖା ଦାୟିତ୍ୱ ଦେଇ ଫେରିଆସିଥିଲେ । ଗତକାଲି ଉପଜିଲ୍ଲାପାଳ ଜବତ ଗାଡିଗୁଡିକୁ ଆଣିବାକୁ ଯାଇଥିବା ବେଳେ ସଂଘବଦ୍ଧ ଭାବେ ତାଙ୍କୁ ଆକ୍ରମଣ କରିଥିଲେ ଦୁର୍ବୃତ୍ତ । ଉପଜିଲ୍ଲାପାଳଙ୍କ ସହ ତାଙ୍କ ଗାଡି ଚାଳକ ଗୁରୁତର ଆହତ ହୋଇଥିଲେ । ଉପଜିଲ୍ଲାପାଳଙ୍କ ପିଏସଓ ଉପସ୍ଥିତ ବୁଦ୍ଧି ଖଟାଇ ଚୌହ୍ୱାନ ଏବଂ ତାଙ୍କ ଗାଡିଚାଳକଙ୍କୁ ଘଟଣାସ୍ଥଳରୁ ଖସାଇ ଆଣିବାରେ ସକ୍ଷମ ହୋଇଥିଲେ ।