କନକ ବ୍ୟୁରୋ: ଗୋଟିଏ ଗଛରେ ଫଳିଛି ୧୦୦ ପ୍ରକାର ଆମ୍ବ । ଏକଥା ଶୁଣିବାକୁ ସତ ଲାଗୁନଥିଲେ ବି ଗୋଟିଏ ଗଛରେ ପ୍ରାୟ ଶହେ ପ୍ରଜାତିର ଆମ୍ବ ଫଳାଇ ଚର୍ଚ୍ଚାକୁ ଆସିଛନ୍ତି ବରଗଡ଼ ଜିଲ୍ଲା ଅତାବିରାର ଚାଷୀ ଭି.ଚନ୍ଦ୍ରା ରାଓ । ତାଙ୍କ ବାଡିରେ ଥିବା ପୁରୁଣା ଆମ୍ବ ଗଛରେ କଳମୀ କରି ବିଭିନ୍ନ ପ୍ରକାର ଆମ୍ବ ଫଳାଇ ଅନ୍ୟମାନଙ୍କ ପାଇଁ ସେ ଉଦାହରଣ ପାଲଟିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବରଗଡ଼ ଅତାବିରା ବ୍ଲକ ଅନ୍ତର୍ଗତ ପାଲିବୁଗବୁଗା ଗାଁର ଭି. ଚନ୍ଦ୍ରା ରାଓଙ୍କ ବାଡ଼ିରେ ଥିବା ଆମ୍ବ ବଗିଚାରେ ଫଳିଛି ଭଳି କି ଭଳି ଆମ୍ବ । ଆଉ ଗଛରେ ଫଳିଛି ୧୦୦ ପ୍ରଜାତିର ଆମ୍ବ । କିଛି ବର୍ଷ ପୂର୍ବରୁ କିଡନି ଜନିତ ରୋଗରେ ଆକ୍ରାନ୍ତ ହୋଇଥିଲେ ଭି ଚନ୍ଦ୍ରା ରାଓ । ସ୍ୱାସ୍ଥ୍ୟରେ ଉନ୍ନତି ହେବା ପରେ କିଛି ନୂଆ କରିବା ପାଇଁ ସଂକଳ୍ପ ନେଇ ଆରମ୍ଭ କରିଥିଲେ ଗଛ କଲମୀ କରିବା ପ୍ରକ୍ରିୟା । ଗୋଟିଏ ଗଛରେ ବିଭିନ୍ନ ପ୍ରକାର ଆମ୍ବ ଫଳାଇବା ପାଇଁ ପ୍ରଥମେ ନିଜେ ଉଦ୍ୟମ କରିଥିଲେ, ୩-୪ ଥର ଫେଲ ମାରିବା ପରେ ଉଦ୍ୟାନ ବିଭାଗର ଅଧିôକାରୀଙ୍କ ପରାମର୍ଶ ନେଇ ବାଡିରେ ଥିବା ଆମ୍ବ ଗଛରେ ପରୀକ୍ଷା ନିରୀକ୍ଷା ଆରମ୍ଭ କରିଥିଲେ । ଏହାପରେ ତାଙ୍କୁ ମିଳିଥିଲା ସଫଳତା ।
ବିଭିନ୍ନ ଅଂଚଳରୁ ଦେଶୀ-ବିଦେଶୀ ଆମ୍ବ ଡାଳ ସଂଗ୍ରହ କରି କଲମୀ କରିଥିଲେ ଭି ଚନ୍ଦ୍ରା ରାଓ । ନିଲମ, ଦଶେରି, ଆମ୍ରପଲ୍ଲି , ବାଇଗଣ ପଲେଇ, ତୋଟା ପଲେଇ, ଅଲଫାନ୍ସୋ, ଲେଙ୍ଗଡା, ସୁନ୍ଦରୀ ସମେତ ପ୍ରାୟ ୧୦୦ ପ୍ରକାର ଆମ୍ବ ଗୋଟିଏ ଗଛରେ ଫଳେଇ ସେ ଉଦାହରଣ ସୃଷ୍ଟି କରିଛନ୍ତି । ତାଙ୍କର ଏହି ପ୍ରୟାସକୁ ସ୍ଥାନୀୟ ଅଂଚଳରେ ବେଶ ପ୍ରଶଂସା କରାଯାଇଛି ।
ସିଅନ ପଦ୍ଧତିରେ ଆମ୍ବ ଗଛକୁ କଲମୀ କରିଛନ୍ତି ଭି. ଚନ୍ଦ୍ରା ରାଓ । ବର୍ଷା ଯୋଗୁଁ ଗଛରୁ ଅନେକ ଆମ୍ବ ଝଡ଼ି ଯାଇଛି । ତେବେ ଏହା କେବଳ ଅର୍ନାମେଂଟାଲ ଉଦେଶ୍ୟରେ କରାଯାଇ ପାରିବ, ବ୍ୟବସାୟିକ ଉଦ୍ଦେଶ୍ୟରେ ଫଳପ୍ରଦ ହେବ ନାହିଁ ବୋଲି ମତ ଦେଇଛନ୍ତି ଉଦ୍ୟାନବିତ ।