ମାଟିରେ ସାମଗ୍ରୀ ପ୍ରସ୍ତୁତ କରି ଗୁଜରାଣ ମେଣ୍ଟାଉଛନ୍ତି ୧୦୦ ରୁ ଅଧିକ କୁମ୍ଭକାର ପାରିବାର, କଞ୍ଚାମାଲର ଅଭାବ ନେଇ ଚିନ୍ତାରେ କୁମ୍ଭକାର

କନକ ବ୍ୟୁରୋ : କେନ୍ଦ୍ରାପଡ଼ା ମାର୍ଶାଘାଇ ବଜାରରେ ଥିବା କୁମ୍ଭାର ସାହିରେ ରହୁନ୍ତି ଶହେରୁ ଉର୍ଦ୍ଧ କୁମ୍ଭକାର । ପିଢ଼ି ପରେ ପିଢ଼ି ମାଟିରେ ବିଭିନ୍ନ ପ୍ରକାରର ଘର କରଣା ସାମଗ୍ରୀ ଯଥା.. ମାଟି ହାଣ୍ଡି, ମାଠିଆ, କୁଣ୍ଡ, ସରା, ପଲମ, ଉଠା ଚୁଲି, କଳସ ପ୍ରସ୍ତୁତ କରି ଏମନେ ବିକ୍ରି କରନ୍ତି । ପୂଜାପର୍ବ ଓ ବିବାହ ବ୍ରତ ପାଇଁ ଆବଶ୍ୟକ ସାତ ଦୀପ, ଲଗ୍ନ ହାଣ୍ଡି ପ୍ରସ୍ତୁତ କରି ଲୋକଙ୍କ ଆବଶ୍ୟକ ଅନୁସାରେ ଯୋଗାଇ ଦିଅନ୍ତି । କୁମ୍ଭାର ସାହିରେ ମାଟି ନିର୍ମିତ ଘର କରଣା ସାମଗ୍ରୀ ସହିତ ଗଣେଷ, ଭାଲୁକୁଣୀ, ସରସ୍ୱତୀ, କାର୍ତିକେଶ୍ୱର, ମା’ ଦୁର୍ଗା ଭଳି ପ୍ରତିମୂର୍ତି ବିକ୍ରି ହୋଇଥାଏ । ଘରର ସମସ୍ତ ସଦସ୍ୟ ମିଶି ମାଟିରେ ବିଭିନ୍ନ ସାମଗ୍ରୀ ପ୍ରସ୍ତୁତ କରନ୍ତି । ଯାହା କିଛି ରୋଜଗାର ହୁଏ ସେଇଥିରେ ଚଳେ ପରିବାର ।

ଦିନକୁ ଦିନ କଂଚା ମାଲ ଅଭାବ, ପ୍ଲାଷ୍ଟିକ ଜିନିଷର ବହୁଳ ବ୍ୟବହାର ଯୋଗୁଁ ପରିଶ୍ରମ ଅନୁସାରେ ଏମାନଙ୍କୁ ପାରିଶ୍ରମିକ ମିଳୁନାହିଁ । ଆଗରୁ ମାଟି ଓ କାଠ ସହଜରେ ଉପଲବ୍ଧ ହେଉଥିଲା । ଏବେ ମାଟି ଟ୍ରିପ୍ଟେ କିଣିଲେ ୨ହଜାର ଟଙ୍କା ଦେବାକୁ ପଡ଼ୁଛି । ମାଟି ପାତ୍ର ଭାଟିରେ ପୋଡ଼ିବା ପାଇଁ କାଠ ବାବଦକୁ ଅଧିକ ଖର୍ଚ୍ଚ କରିବାକୁ ପଡ଼ୁଛି । ସେହି ଅନୁସାରେ ଜିନିଷ କିଣାବିକା ପାଇଁ ବଜାର ବ୍ୟବସ୍ଥା ନଥିରୁ କ୍ଷତି ସହୁଛନ୍ତି କାରିଗର ।

ଆଧୁନିକତାର ଚାକଚକ୍ୟ ଭିତରେ ନିଜ କୌଳିକ ବୃତିକୁ ବଂଚାଇ ରଖିଛନ୍ତି କୁମ୍ଭକାର । ମାଟିରେ ବିଭିନ୍ନ ପ୍ରକାରର ଉପକରଣ ପ୍ରସ୍ତୁତ କରୁଥିବା ଏହି ମାଟିର ମଣିଷଙ୍କ ଉନ୍ନତି ପାଇଁ ସରକାରୀ ସ୍ତରରେ ପଦକ୍ଷେପ ନେବାର ଆବଶ୍ୟକତା ରହିଛି ।