ସଂକ୍ରମଣଠୁ ବଳିଗଲା ସହିଦଙ୍କ କାହାଣୀ । ଗୋଟିଏ ବର୍ଷରେ ଭାରତ ମାତା ହରାଇଛି ଶହେ ସାହସୀ ପୁଅ । ବର୍ଷ ୨୦୨୦ରେ ଖାଲି ହୋଇଛି ଦେଶ ମାତୃକାର କୋଳ…
କନକ ବ୍ୟୁରୋ: ୨୦୨୦ ! ଏମିତି ଏକ ବର୍ଷ । ଯାହା ସମସ୍ତଙ୍କ ପାଇଁ ଏକ ଅଭିଶପ୍ତ ବର୍ଷ । ଭୂତାଣୁଠୁ ଭୂକମ୍ପ, ମୃତ୍ୟୁଠୁ ମହାମାରୀ । ସବୁକିଛି କୁ ସହିଛି ଏ ମାନବଜାତି । ଆଉ ସବୁ ସଙ୍ଘାତିକ ସ୍ଥିତିକୁ ଧର୍ଯ୍ୟର ସହ ସହିଛି ଧରଣୀ । ହେଲେ ପ୍ରକୃତିର କରାଳ ରୂପଠୁ ବି ମାଆକୁ କନ୍ଦାଇ ଦେଇଛି କୋଳଶୂନ୍ୟର କଷ୍ଟ । କାରଣ ଭାରତ ମାତା ହରାଇଛି ଶହେ ସନ୍ତାନ । ବର୍ଷ ୨୦୨୦ ଦେଶ ମାତୃକା କୋଳରୁ ଛଡାଇ ନେଇଛି ୧୦୦ ଜଣ ବୀର ପୁଅଙ୍କୁ । କ୍ୟାଲେଣ୍ଡର ପୃଷ୍ଠାରୁ ୨୦୨୦ ବିଦାୟ ନେଇଛି ସତ ହେଲେ ବିଗତ ବର୍ଷରେ ଯେଉଁ ବୀର ଯବାନଙ୍କୁ ଦେଶ ହରାଇଛି, ସେମାନଙ୍କୁ ଝୁରି ଝୁରି ମାଟି କାନ୍ଦୁଛି ।
Kanak News is now on WhatsApp
Join and get latest news updates delivered to you via WhatsApp
ଦେଶ ମାତୃକାର ସୁରକ୍ଷା ସହ ମାଟି ମାଆର ମର୍ଯ୍ୟାଦାକୁ ରକ୍ଷା କରିବାକୁ ଯାଇ ବିଭିନ୍ନ ସମୟରେ ବିଭିନ୍ନ ପରିସ୍ଥିତିରେ ଦେଶ ପାଇଁ ପ୍ରାଣବଳୀ ଦେଇଛନ୍ତି ଯବାନ । ସହିଦ ହୋଇଥିବା ୧୦୦ ଯବାନଙ୍କ ମଧ୍ୟରେ ୬ ଜଣ ଅଧିକାରୀ, ୧୨ ଜଣ ଜେସିଓ ଏବଂ ୮୨ ଜଣ ଓଆରଏସ ଅଛନ୍ତି । କର୍ଣ୍ଣେଲ, ସୁବେଦର, ହାବିଲଦାର, ରାଇଫଲ ମ୍ୟାନ ଆଦି ବୀର ଯବାନଙ୍କୁ ହରାଇଛି ଦେଶ ।
ତେବେ ସହିଦ ହୋଇଥିବା ୧୦୦ ଯବାନଙ୍କ ମଧ୍ୟରେ ସବୁଠୁ ଛାତିଥରା ଥିଲା ଗଲୱାନ ଘାଟି ଘଟଣା । ସୀମାରେ ଭାରତ- ଚୀନ ସେନା ମୁହାଁମୁହିଁ ହେବା ପରେ ୨୦ ଜଣ ଯବାନ ପ୍ରାଣବଳୀ ଦେଇଥିଲେ ଯାହା ଦେଶର ଛାତିକୁ ଦୋହଲାଇ ଦେଇଥିଲା । ଆଉ ଯବାନଙ୍କ ପ୍ରାଣବଳୀ ପରେ ବୀର ସନ୍ତାନଙ୍କ ବଳିଦାନ ବ୍ୟର୍ଥ ଯିବନି ବୋଲି ଦେଶ ସାରା ଜଳିଥିଲା ପ୍ରତିଜ୍ଞାର ନିଆଁ ।
ଆଉ ସେନା ଦିବସରେ ଭାରତ ଚୀନ୍ ସୀମା ବିବାଦ ନେଇ ଚାଲବାଜ ଚୀନକୁ କଡା ଚେତାବନୀ ଦେଇଛନ୍ତି ସେନାମୁଖ୍ୟ । କେହି ବି ଭାରତର ଧୈର୍ଯ୍ୟର ପରୀକ୍ଷା ନନିଅନ୍ତୁ ବୋଲି ସିଧାସଳଖ କହିଛନ୍ତି ସେନାମୁଖ୍ୟ । ଯବାନଙ୍କ ବଳିଦାନ ବ୍ୟର୍ଥ ଯିବନି ବୋଲି ପୁଣିଥରେ ସଙ୍କଳ୍ପକୁ ଶକ୍ତ କରିଛନ୍ତି ସ୍ଥଳସେନାର ମୁଖ୍ୟ ।
ତେବେ ରାତି ହେଉ କି ଦିନ, ଖରା ହେଉ କି ଶୀତ… ସବୁବେଳେ, ସବୁ ମୁହୂର୍ତ୍ତରେ ସଜାଗ ଥାଆନ୍ତି ଭାରତର ବୀର ଯବାନ । ରାତିର ଅନ୍ଧାର ଚିରି, ପାଣିର ପ୍ରଖର ସୁଅ କାଟି, ବରଫର ବଳୟ ଭାଙ୍ଗି ଶତ୍ରୁଙ୍କୁ ଚିତ କରନ୍ତି ସେନା ବାହିନୀ । ସେ ଚାଲାକ ଚୀନ ହେଉ କି ସୈତାନ ପାକିସ୍ତାନ ଯେତେବଳେ ବି ଶତ୍ରୁ ସୀମା ଡେଇଁଛି, ଯୁଦ୍ଧ ପାଇଁ ଉଷୁକାଇଛି । ସଙ୍ଗେସଙ୍ଗେ ଶତ୍ରୁର ମୁହଁତୋଡ ଯବାବ ଦେଇଛି ଭାରତ । ଇଟାର ଜବାବ ପଥରର ଦେଇଛନ୍ତି ଆମ ଭାରତୀୟ ବୀର ଯବାନ । ତେଣୁ ଗଲୱାନ ଘାଟିରେ ସହିଦ ହୋଇଥିବା ଯବାନ ବଳିଦାନ କେବେ ବି ବ୍ୟର୍ଥ ଯିବନି । ଆସନ୍ତୁ ସହିଦ ଯବାନଙ୍କୁ ସଲାମ କରିବା ଆଉ ସୀମାରେ ପହରା ମାରୁଥିବା ପ୍ରତିଟି ଯବାନଙ୍କୁ ସାଲ୍ୟୁଟଟେ ମାରି ସେମାନଙ୍କ ଜୋସ ବଢାଇବା…