ବଡଧରଣର ଆକ୍ରମଣ ପାଇଁ ଚାଲିଥିଲା ପ୍ରସ୍ତୁତି । ଗୋଟିଏ ଟ୍ରାକ୍ଟର ବିସ୍ଫୋଟକ ସହ ୧୦ ଜଣ ନକ୍ସଲଙ୍କୁ ଗିରଫ କଲା ପୋଲିସ

କନକ ବ୍ୟୁରୋ : ଛତିଶଗଡ-ତେଲେଙ୍ଗାନା ସୀମାରେ ପୋଲିସ ପକ୍ଷରୁ ୧୦ ଜଣ ନକ୍ସଲଙ୍କୁ ଗିରଫ କରାଯାଇଛି । ସେମାନଙ୍କ ନିକଟରୁ ଗୋଟିଏ ଟ୍ରାକ୍ଟର ବିସ୍ଫୋଟକ ମଧ୍ୟ ଜବତ କରାଯାଇଛି । କୁହାଯାଉଛି କି ଏତେ ପରିମାଣର ବିସ୍ଫୋଟକ ନେଇ ସେମାନେ ସେମାନଙ୍କ ଲିଡରଙ୍କ ନିକଟକୁ ଯାଉଥିଲେ । ଏହାସହ ଏହି ବିସ୍ଫୋଟକକୁ ସେମାନେ ଛତିଶଗଡ କିମ୍ବା ତେଲେଙ୍ଗାନାରେ ବ୍ୟବହାର କରିବାକୁ ନେଉଥିଲେ । ପୋଲିସ ସୂଚନା ମୁତାବକ ଏହି ବିସ୍ଫୋଟକ ସହାୟତାରେ ସେମାନେ ଚଳିତବର୍ଷ ଏକ ବଡ ଧରଣର ଆକ୍ରମଣ କରିବାକୁ ଯୋଜନା କରୁଥିଲେ । ଗିରଫ ହୋଇଥିବା ୧୦ ଜଣ ନକ୍ସଲଙ୍କ ମଧ୍ୟରୁ ୫ଜଣ ଛତିଶଗଡ ବିଜାପୁରର ବାସିନ୍ଦା ବୋଲି ଜଣାପଡିଛି ।

ତେଲେଙ୍ଗାନା ପୋଲିସ ତରଫରୁ କୁହାଯାଇଛି କି, ସୂଚନା ମିଳିଥିଲା ନକ୍ସଲ ସଂଗଠନର କିଛି ସଦସ୍ୟ ବହୁମାତ୍ରାରେ ବିସ୍ଫୋଟକ ନେଇ ମୁଲାକାନାପଲ୍ଲୀ ଓ ଦୁମୁଗୁଡେମ୍ ମଣ୍ଡଳ ଠିକଣାରେ ରହିଛନ୍ତି   । ଏହି ସୂଚନା ଆଧାରରେ ଭଦ୍ରାଦୀ କୋତ୍ତାଗୁମ୍ ପୋଲିସ ଦୁମୁକଡେମ ପୋଲିସ ଓ ସିଆରପିଏଫ ଯବାନଙ୍କୁ ନେଇ ଏକ୍ ଟିମ୍ ଗଠନ କରିଥିଲା । ଏହି ଟିମ୍ ଯାଂଚ ବେଳେ ୧୦ ଜଣ ନକ୍ସଲ ଧରାପଡିଥିଲେ ଓ ସେମାନଙ୍କ ସୂଚନା ଆଧାରରେ ଏହି ବିସ୍ଫୋଟକ ଜବତ କରାଯାଇଛି ।

ଜବତ ହୋଇଥିବା ବିସ୍ଫୋଟକ ମାଧ୍ୟମରେ ୯୦ ବଣ୍ଡଲ କାର୍ଡେକ୍ସ ତାର, ୫୦୦ଟି ଡିଟୋନେଟର ସହ ଅନ୍ୟ ବିସ୍ଫୋରକ ସାମିଲ ଅଛି । ସେପଟେ ଗିରଫ ହୋଇଥିବା ନକ୍ସଲଙ୍କ କହିବା ମୁତାବକ ଏତେ ପରିମାଣର ବିସ୍ଫୋରକ ମାଓବାଦୀ ଲିଡରମାନେ ମଗାଇଥିଲେ । ଏହାର ଉପଯୋଗ କୌଣସି ଆକ୍ରମଣ ପାଇଁ ବ୍ୟବହାର କରାଯାଇଥାନ୍ତା ।