ଦେଶରେ ଅଣାୟତ କରୋନା ସ୍ଥିତି । ସଂକ୍ରମିତଙ୍କ ସଂଖ୍ୟା ୧.୪ କୋଟିରୁ ୧.୫ କୋଟିରେ ପହଂଚିବାକୁ ଲାଗିଲା ମାତ୍ର ୪ ଦିନ । ମଶାଣିରେ ଲିଭୁନି ଜୁଇ ଚିତା
କନକ ବ୍ୟୁରୋ : ମେଡିକାଲ ବାହାରେ କରୋନା ସଂକ୍ରମିତଙ୍କୁ ବୋହି ଆଣିଥିବା ଆମ୍ବୁଲାନ୍ସର ଲମ୍ବା ଲାଇନ । ମେଡିକାଲ ଭିତରେ ଯେତିକି ରୋଗୀ ବାହାର ବାରଣ୍ଡାରେ ଶୋଇ ରହିଛନ୍ତି ତାହାଠାରୁ ଅଧିକ । ଏଭଳି କି ଗୋଟିଏ ବେଡରେ ଦୁଇରୁ ଅନେକ ରୋଗୀ ଶୋଇଥିବାର ଚିତ୍ର ସରକାରଙ୍କ ବିକାଶ ମଡେଲର ଧର୍ଜିଆ ଉଡାଉଛି । ମେଡିସିନ୍ ନାହିଁ, ବେଡ ନାହିଁ, ଅକ୍ସିଜେନ ନାହିଁ । ନାହିଁ ନାହିଁ ଭିତରେ କିନ୍ତୁ ଜମିଲା କୁମ୍ଭମେଳା, ନାହିଁ ନାହିଁ ଭିତରେ ଜମୁଛି ନିର୍ବାଚନ ପ୍ରଚାର । ଲକ୍ଷ ଲକ୍ଷ ଲୋକଙ୍କୁ ଧରି ସଭା କରୁଥିବା ନେତା ମାନେ ମଞ୍ଚରେ କିନ୍ତୁ ଭାଷଣ ଦେଉଛନ୍ତି ସାମାଜିକ ଦୂରତା ବଜାୟ ରଖନ୍ତୁ ଓ ମୁହଁରେ ମାସ୍କ ପିନ୍ଧନ୍ତୁ । ଏସବୁର ସୁଯୋଗ ନେଉଛି କରୋନା ଭୂତାଣୁ ।
Kanak News is now on WhatsApp
Join and get latest news updates delivered to you via WhatsApp
ସୋମବାର ଦିନ ସ୍ୱାସ୍ଥ୍ୟମନ୍ତ୍ରଣାୟ ଦ୍ୱାରା ଜାରି ସୂଚନା ମୁତାବକ ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ୧.୫ କୋଟି ପାର କରିଛି । ଏହି ସଂଖ୍ୟା ସୂଚାଇ ଦେଉଛି କି କରୋନା ସଂକ୍ରମଣ ବେଗ କିଭଳି ରହିଛି । କହିରଖୁ କି ମାତ୍ର ୪ ଦିନ ପୂର୍ବରୁ ଦେଶର କରୋନା ଆକ୍ରାନ୍ତଙ୍କ ସଂଖ୍ୟା ୧.୪ କୋଟି ଥିଲା । ହେଲେ ଠିକ୍ ୪ ଦିନ ପରେ ଏହା ୧.୫ କୋଟିକୁ ବୃଦ୍ଧି ପାଇଛି । ଅର୍ଥାତ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ୪ ଦିନ ମଧ୍ୟରେ ୧୦ ଲକ୍ଷ ପାର କରିଛି । କରୋନାର ପ୍ରଥମ ଲହରେ ବେଳେ ୧୦ ଲକ୍ଷ ଲୋକ ସଂକ୍ରମିତ ହେବାକୁ ୧୬୯ ଦିନ ଲାଗିଥିଲା । ହେଲେ ଦ୍ୱିତୀୟ ଲହରରେ ପ୍ରଥମ ୧୦ ଲକ୍ଷଲୋକ ୧୧ ଦିନରେ ସଂକ୍ରମିତ ହୋଇଥିବା ବେଳେ ଦ୍ୱିତୀୟ ୧୦ ଲକ୍ଷ ଲୋକ ସଂକ୍ରମିତ ହେବା ପାଇଁ ମାତ୍ର ୪ ଦିନ ଲାଗିଲା । ଏହାକୁ ଦେଖି ଅନୁମାନ କରାଯାଇପାରେ ଯେ କରୋନା ଭୂତାଣୁ ବିଧାତା ଠାରୁ ବିଜ୍ଞାନ ପର୍ଯ୍ୟନ୍ତ ସମସ୍ତଙ୍କୁ ବେଖାତିର କରି ଆଗେଇ ଚାଲିଛି ।