ଉପରାଜ୍ୟପାଳ ନୁହେଁ ମୁଖ୍ୟମନ୍ତ୍ରୀ ହିଁ ଦିଲ୍ଲୀର ଅସଲି ମାଲିକ : ସୁପ୍ରିକକୋର୍ଟଙ୍କ ରାୟ ପରେ ଆଉ କେଉଁ କେଉଁ ପ୍ରସଙ୍ଗ ନେଇ ମୁହାଁମୁହିଁ ହୋଇପାରନ୍ତି ମୁଖ୍ୟମନ୍ତ୍ରୀ ଓ ଉପରାଜ୍ୟପାଳ, ପଢ଼ନ୍ତୁ ଏହି ରିପୋର୍ଟ
କନକ ବ୍ୟୁରୋ : ଦିଲ୍ଲୀ ମୁଖ୍ୟମନ୍ତ୍ରୀ ଓ ଉପରାଜ୍ୟପାଳଙ୍କ ମଧ୍ୟରେ ବିବାଦ ଆଜିର ନୁହେଁ । ଦୀର୍ଘ ତିନି ବର୍ଷ ହେଲା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଓ ଉପରାଜ୍ୟପାଳ ଅନିଲ ବୈଜଲଙ୍କ ମଧ୍ୟରେ ବିଭିନ୍ନ ପ୍ରସଙ୍ଗ ନେଇ ତିକ୍ତତା ବଢିଚାଲିଛି । ଏହାକୁ ନେଇ ସୁପ୍ରିମକୋର୍ଟ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି । ତେବେ ଏହାପରେ ଏହି ବିବାଦରେ ପୂର୍ଣ୍ଣଛେଦ ପଡିବା ଆଶା କରାଯାଉଛି । ତେବେ ଆସନ୍ତୁ ନଜର ପକାଇବା କେଉଁ କେଉଁ ପ୍ରସଙ୍ଗ ନେଇ ମୁହାଁମୁହିଁ ହୋଇପାରନ୍ତି ମୁଖ୍ୟମନ୍ତ୍ରୀ ଓ ଉପରାଜ୍ୟପାଳ ।
Kanak News is now on WhatsApp
Join and get latest news updates delivered to you via WhatsApp
ସର୍ବୋଚ୍ଚ ନ୍ୟାୟାଳୟଙ୍କ ଗରୁତ୍ୱପୂର୍ଣ୍ଣ ନିଷ୍ପତି ପରେ ବିବାଦରେ ପଡିବ କି ପୂର୍ଣ୍ଣଛେଦ? କାହିଁକି ନା ଏବେବି ଅନେକ ଏମିତି ପ୍ରସଙ୍ଗ ରହିଛି ଯାହାକୁ ନେଇ ମୁହାଁମୁହିଁ ହୋଇପାରନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଓ ଉପରାଜ୍ୟପାଳ । ନଜର ପକାଇବା କଣ ରହିଛିଏହି ପ୍ରସଙ୍ଗ ।
୧. କ୍ୟାବିନେଟ ପରାମର୍ଶ ଅନୁଯାୟୀ କାମ କରିବେ କି ଉପରାଜ୍ୟପାଳ?
ଉପରାଜ୍ୟପାଳଙ୍କର ସ୍ୱତନ୍ତ୍ର ଅଧିକାର ନାହିଁ । କ୍ୟାବିନେଟ ପରାମର୍ଶ ଅନୁଯାୟୀ ଉପରାଜ୍ୟପାଳଙ୍କୁ କାମ କରିବାକୁ ପଡ଼ିବ । ତେବେ ତିନି ବର୍ଷ ବିବାଦ ପରେ ଏବେ କ’ଣ ଉପରାଜ୍ୟପାଳ ସବୁ ନିଷ୍ପତିରେ ମନ୍ତ୍ରୀମଣ୍ଡଳର ପରାମର୍ଶ ଲୋଡିବେ କି?କୋର୍ଟ ଅନୁଯାୟୀ କୌଣସି ପ୍ରସଙ୍ଗରେ ଅସହମତି ହେଲେ ଫାଇଲ ରାଷ୍ଟ୍ରପତିଙ୍କ ନିକଟକୁ ଯିବ । ରାଷ୍ଟ୍ରପତି ମଧ୍ୟ ଗୃହ ମନ୍ତ୍ରାଳୟର ପରାମର୍ଶ ଅନୁସାରେ ନିଷ୍ପତି ନେବେ । ଏପରି ସ୍ଥିତିରେ କେଜରିୱାଲ ସରକାରଙ୍କ ବିରୋଧରେ କିଛି ନିଷ୍ପତି ନିଆଗଲେ ସେ କଣ ଏହାକୁ ମାନିବେ କି?
୨. କେନ୍ଦ୍ର ଅଧିନରେ ରହିଛି ପୁଲିସ ପ୍ରଶାସନ
ଦିଲ୍ଲୀ ପୁଲିସ ଏବେବି ଗୃହ ମନ୍ତ୍ରାଳୟ ଅଧିନରେ ରହିବ । କାରଣ ସୁପ୍ରିମକୋର୍ଟଙ୍କ ରାୟ ଅନୁସାରେ ଦିଲ୍ଲୀକୁ ପୂର୍ଣ୍ଣ ରାଜ୍ୟ କ୍ଷମତା ଦେବା ସହଜ ନୁହେଁ । ଆପ୍ ବିଧାୟକଙ୍କ ବିରୋଧରେ ଦିଲ୍ଲୀ ପୁଲିସର କାର୍ଯ୍ୟାନୁଷ୍ଠାନକୁ କେଜରିୱାଲ ଜୋରଦାର ବିରୋଧ କରିଛନ୍ତି । ଏପରି ସ୍ଥିତିରେ ପ୍ରଶ୍ନ ଉଠୁଛି ଯେ, ଦିଲ୍ଲୀ ପୁଲିସ ଯଦି ଭବିଷ୍ୟତରେ କିଛି ବଡ ପଦକ୍ଷେପ ନେବ ତାହେଲେ ଏହାକୁ କେନ୍ଦ୍ରର ହସ୍ତକ୍ଷେପ ବୋଲି ମାନିବେ କି ଦିଲ୍ଲୀ ସରକାର ।
୩. ପୂର୍ଣ୍ଣ ରାଜ୍ୟ କ୍ଷମତା ଦାବି ନେଇ ଜାରି ରହିବ ଲଢେଇ
ଦିଲ୍ଲୀକୁ ପୂର୍ଣ୍ଣ ରାଜ୍ୟ କ୍ଷମତା ଦାବିକୁ ଜୋରସୋର କରିଛି ଆପ୍ । କିନ୍ତୁ ଏହା ଏତେଟା ସହଜ ନୁହେଁ ବୋଲି ସ୍ପଷ୍ଟ କରିଛନ୍ତି ସୁପ୍ରିମକୋର୍ଟ । ତେବେ ପୁଲିସ, ଜମିଜମା ଓ ପବ୍ଲିକ ଅର୍ଡରକୁ ଦିଲ୍ଲୀ ସରକାର ଅଧିନକୁ ଆଣିବାକୁ ଚାହୁଁଥିବା ଆପ୍ ଏହି ଆନ୍ଦୋଳନ ଜାରି ରଖିବ । ଏହାକୁ ନେଇ ପୁଣି ମୁହାଁମୁହିଁ ହେବେ ସରକାର ଓ ଉପରାଜ୍ୟପାଳ । ସେପଟେ କୌଣସି ଜମି ଉପରେ ସ୍କୁଲ, ହସ୍ପିଟାଲ କିମ୍ବା ଅନ୍ୟ କିଛି ନିର୍ମାଣ ପାଇଁ ଦିଲ୍ଲୀ ସରକାର ଯୋଜନା କଲେ ତାଙ୍କୁ ଉପରାଜ୍ୟପାଳଙ୍କ ନିକଟକୁ ଯିବାକୁ ପଡିବ ।
୪. ଅଧିକାରୀଙ୍କୁ ନେଇ ଜାରି ରହିବ ମୁହାଁମୁହିଁ ପରିସ୍ଥିତି
କେନ୍ଦ୍ର ଶାସିତ ଅଂଚଳ ଓ ରାଜଧାନୀ ହୋଇଥିବା କାରଣରୁ ଦିଲ୍ଲୀରେ ରାଜ୍ୟକୁ ବାଦ୍ ଦେଇ କେନ୍ଦ୍ରୀୟ ଅଧିକାରୀ ମଧ୍ୟ ଉପସ୍ଥିତ ରୁହନ୍ତି । ଏମାନଙ୍କୁ ବଦଳି ଓ ପୋଷ୍ଟିଂକୁ ନେଇ ମଧ୍ୟ ବିବାଦ ଚାଲିଥାଏ । ସୁପ୍ରିମକୋର୍ଟଙ୍କ ରାୟ ଅନୁସାରେ ଦିଲ୍ଲୀ ସରକାର ନିଜ ଅଧିକାରୀଙ୍କ ଉପରେ ନିଷ୍ପତି ନେଇପାରିବେ କିନ୍ତୁ କେନ୍ଦ୍ରୀୟ ଅଧିକାରୀଙ୍କ ଉପରେ କୌଣସି ନିଷ୍ପତି ନେଇପାରିବେ ନାହିଁ । ଏଥିରେ ଆଂଟି କରପସନ ବ୍ୟୁରୋକୁ ନେଇ ରହିଛି ବଡ ବିବାଦ । କାରଣ ଆଟିଂ କରପସନ ବ୍ୟୁରୋ ବା ଏସିବି ଏବେବି ଦିଲ୍ଲୀ ପୁଲିସ ଅଧିନରେ ରହିଛି ।
୫. ମ୍ୟୁନିସିପାଲ କର୍ପୋରେସନ ଦିଲ୍ଲୀକୁ ନେଇ ବଡ ବିବାଦ
ଦିଲ୍ଲୀରେ ଏମସିଡି କର୍ମଚାରୀଙ୍କ ଦରମାକୁ ନେଇ ହୋଇଥିବା ଆନ୍ଦୋଳନ ଦିଲ୍ଲୀବାସୀଙ୍କ ସମସ୍ୟାକୁ ବଢାଇଛି । ଏହି ସମୟରେ ସହରର ବିଭିନ୍ନ ସ୍ଥାନରେ କୁଢ କୁଢ ଆର୍ବଜନା ପଡିରହିଥାଏ । ମ୍ୟୁନିସିପାଲ କର୍ପୋରେସନ ଦିଲ୍ଲୀ ବା ଏମସିଡି ଏବେ ମଧ୍ୟ ପୂର୍ଣ୍ଣ ଭାବରେ ବିଜେପି ନିକଟରେ ରହିଛି । ଏହାକୁ ନେଇ ମଧ୍ୟ ମୁହାଁମୁହିଁ ପରିସ୍ଥିତି ହୋଇପାରେ । କେବଳ ପରିମଳ ବ୍ୟବସ୍ଥା ନୁହେଁ ପିଇବା ପାଣି ଯୋଗାଣକୁ ନେଇ ମଧ୍ୟ ସରକାର ଓ ଏମ୍ସିଡି ମଧ୍ୟରେ ତିକ୍ତତା ବଢୁଛି ।