ଆନ୍ଧ୍ର ପରେ ଓଡିଶା ଦୋହରାଇଲା ସ୍ୱତନ୍ତ୍ର ପାହ୍ୟା ଦାବି ! ସ୍ୱାସ୍ଥ୍ୟ ସୁରକ୍ଷା ନେଇ ମୋଦିକୁ ଚିଠି ଲେଖି ନବୀନ ରଖିଲେ ଆଭିମୁଖ୍ୟ
କନକ ବ୍ୟୁରୋ : ପୁଣି ଜୋର ଧରିଲା ଓଡିଶାକୁ ସ୍ୱତନ୍ତ୍ର ରାଜ୍ୟପାହ୍ୟା ପ୍ରସଙ୍ଗ । ନୀତି ଆୟୋଗ ବୈଠକ ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଧାନମନ୍ତ୍ରୀଙ୍କ ଲେଖିଥିବା ଚିଠିରେ ଏହି ଦାବିକୁ ଦୋହରାଇଛନ୍ତି । ଚିଠିରେ ଲେଖିଛନ୍ତି ରାଜ୍ୟର ଜନସଂଖ୍ୟାର ବଡ ଭାଗ ହେଉଛନ୍ତି ଅନୁସୂଚିତ ଜନଜାତି ଓ ଜାତି ବର୍ଗର୍ର ଲୋକେ । କେବଳ ସେତିକି ନୁହେଁ, ରାଜ୍ୟ ବାରମ୍ବାର ବିଭିନ୍ନ ବିପର୍ୟ୍ୟୟକୁ ସାମ୍ନା କରୁଛି । ଏହି ଦୃଷ୍ଟିରୁ ରାଜ୍ୟକୁ ସ୍ୱତନ୍ତ୍ର ଶ୍ରେଣୀର ରାଜ୍ୟ ପାହ୍ୟା ପାଇବାକୁ ଓଡିଶା ଯୋଗ୍ୟ । ସ୍ୱତନ୍ତ୍ର ରାଜ୍ୟ ପାହ୍ୟା ମିଳିଲେ ଓଡିଶାକୁ କେନ୍ଦ୍ରୀୟ ସହାୟତା ରାଶି ବୃଦ୍ଧି ପାଇବ । ଫଳରେ ରାଜ୍ୟର ଚାଲିଥିବା ଉନ୍ନୟନମୂଳକ କାର୍ୟ୍ୟ ତ୍ୱରାନ୍ୱିତ ହୋଇପାରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ସେହିପରି କେନ୍ଦ୍ର ସରକାରଙ୍କର ଆୟୁଷ୍ମାନ ଯୋଜନା, ଓଡ଼ିଶାକୁ ଆସିବ ନା ନାହିଁ ସେ ନେଇ ନିଜ ଆଭିମୁଖ୍ୟକୁ ସ୍ପଷ୍ଟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏନେଇ ନବୀନ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖି ରାଜ୍ୟ ସରକାରଙ୍କ ଅଭିମୁଖ୍ୟ ସ୍ପଷ୍ଟ କରିଛନ୍ତି । ନବୀନ କହିଛନ୍ତି ଆୟୁଷ୍ମାନ ଯୋଜନାରେ ଓଡିଶାରୁ ବାଦ ପଡୁଥିବା ୮ଲକ୍ଷ ପରିବାରକୁ କେନ୍ଦ୍ର ସରକାର ଯୋଜନାଭୁକ୍ତ କଲେ ଓଡିଶା ଏହି ଯୋଜନାରେ ସାମିଲ ହେବ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରୀୟ ବଜେଟ୍ରେ ଶସ୍ୟଗୁଡ଼ିକର ସର୍ବନିମ୍ନ ସହାୟକ ମୂଲ୍ୟ(ଏମ୍ଏସ୍ପି) ଦେଢ଼ଗୁଣ ବୃଦ୍ଧି କରିବାକୁ ଯେଉଁ ଘୋଷଣା କରାଯାଇଛି, ମୁଖ୍ୟମନ୍ତ୍ରୀ ତା’କୁ ସ୍ୱାଗତ କରିଛନ୍ତି । ତାଙ୍କ ମତରେ ଫସଲର ଉତ୍ପାଦନ ମୂଲ୍ୟ ଆକଳନ ବେଳେ ଚାଷୀଙ୍କ ପ୍ରକୃତ ଉତ୍ପାଦନ ଖର୍ଚକୁ ବିଚାରକୁ ନିଆଯିବା ଉଚିତ । ଏ ନେଇ କିପରି ନିୟମାବଳୀ ପ୍ରସ୍ତୁତ ହେଉଛି ସେ ନେଇ ସମସ୍ତେ ଉତ୍କଣ୍ଠାର ସହିତ ଅପେକ୍ଷା କରିଥିବା ସେ ପ୍ରକାଶ କରିଛନ୍ତି । ସେହିପରି ଚାଷୀଙ୍କୁ ବିଭିନ୍ନ ବିପର୍ଯ୍ୟୟରୁ ରକ୍ଷା କରିବା ପାଇଁ ଜାତୀୟ ସ୍ତରରେ ଋଣଛାଡ଼ ନୀତି ପ୍ରସ୍ତୁତ ହେବା କଥା । ଏ ଦିଗରେ କେନ୍ଦ୍ର ସରକାରଙ୍କ ପ୍ରୟାସକୁ ସମର୍ଥନ କରିବାକୁ ରାଜ୍ୟ ସରକାର ପ୍ରସ୍ତୁତ ବୋଲି ମୁଖ୍ୟମନ୍ତ୍ରୀ ଜଣାଇଛନ୍ତି ।
କୃଷି ପାଇଁ ଋଣ ଗ୍ୟାରେଣ୍ଟି ଟ୍ରଷ୍ଟ(ସିଜିଟିଏ) ସୃଷ୍ଟି କରିବାକୁ କେନ୍ଦ୍ର ସରକାରଙ୍କୁ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ପ୍ରସ୍ତାବ ଦେଇଛନ୍ତି। ଏଭଳି ବନ୍ଧକମୁକ୍ତ ଋଣ ବ୍ୟବସ୍ଥାରେ ୫୦ ଲକ୍ଷ ଟଙ୍କା ପର୍ଯ୍ୟନ୍ତ କୃଷି ଋଣ ଏବଂ ୨ ଲକ୍ଷ ଟଙ୍କା ପର୍ଯ୍ୟନ୍ତ ଫସଲ ଋଣ ପ୍ରଦାନ ପ୍ରସ୍ତାବକୁ ବିଚାର କରିବାକୁ ଶ୍ରୀ ପଟ୍ଟନାୟକ ପ୍ରଧାନମନ୍ତ୍ରୀଙ୍କୁ ଅନୁରୋଧ କରିଛନ୍ତି । କୃଷି କ୍ଷେତ୍ରରେ ବିକାଶ ପାଇଁ ସ୍ୱାମିନାଥନ୍ କମିଟି ସୁପାରିସଗୁଡ଼ିକୁ ଯଥାଶୀଘ୍ର ଲାଗୁ କରିବାକୁ ସେ ପ୍ରସ୍ତାବ ଦେଇଛନ୍ତି ।ସୂଚନାଯୋଗ୍ୟ ରବିବାର ରାଷ୍ଟ୍ରପତି ଭବନରେ ନୀତି ଆୟୋଗ ପରିଚାଳନା ପରିଷଦର ୪ର୍ଥ ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜେ ଯୋଗଦାନ କରିନାହାନ୍ତି ।