ଭୂତ ନେଇଛି ଚାଷୀ ଋଣ : ମୃତ୍ୟୁର ୫ବର୍ଷ ପରେ ବି ଚାଷୀଙ୍କ ନାଁରେ ଉଠୁଛି ଋଣ ଟଙ୍କା, ରାଜକନିକା ସିକୋ କୃଷି ସମବାୟ ସମିତିରେ ବ୍ୟାପକ ଦୁର୍ନୀତି ଅଭିଯୋଗ
କନକ ବ୍ୟୁରୋ : କେନ୍ଦ୍ରାପଡା ଜିଲ୍ଲା ରାଜକନିକା ବ୍ଲକ ସିକୋ ପ୍ରାଥମିକ କୃଷି ସମବାୟ ସମିତିରେ ବ୍ୟାପକ ଦୁର୍ନୀତି । ଏହି ସମବାୟ ସମିତିରେ ୨୨ଶହ ଚାଷୀ ଥିବା ବେଳେ ୧୭ଶହ ଚାଷୀ ରୁଣ ନେଇଛନ୍ତି । ଚାଷୀମାନେ ସମବାୟ ସମିତିରୁ ପ୍ରାୟ ୪ କୋଟି ଟଙ୍କା ଋଣ ନେଇଛନ୍ତି । ଏହି ଋଣ ଭିତରୁ ଅଧିକାଂଶ ଋଣ ଚାଷୀଙ୍କ ଅଜାଣତରେ ହୋଇଛି । ଏପରିକି ମୃତ ଚାଷୀଙ୍କ ନାଁରେ ଉଠିଛି ଋଣ ।
Kanak News is now on WhatsApp
Join and get latest news updates delivered to you via WhatsApp
ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଏଭଳି ଅଭିଯୋଗ ଆସିଛି କେନ୍ଦ୍ରାପଡା ରାଜକନିକା ବ୍ଲକ ସିକୋ ପ୍ରାଥମିକ କୃଷି ସମବାୟ ସମିତିରୁ । ମୃତ ଚାଷୀଙ୍କ ନାଁରେ ଋଣ ଉଠାଯାଇଥିବା ଅଭିଯୋଗ ହୋଇଛି । ବଳରାମ ନାୟକ ନାମକ ଜଣେ ଚାଷୀ ୫ବର୍ଷ ହେବ ମୃତ୍ୟୁ ବରଣ କରିଥିଲେ ବି ତାଙ୍କ ନାମରେ ଋଣ ଉଠାଯାଇଥିବା ଜଣାପଡ଼ିଛି । ସେହିଭଳି ରାସ ବିହାରି ସାହୁଙ୍କ ମୃତ୍ୟୁ ପରେ ବି ଟଙ୍କା ଉଠିଥିବା ଅଭିଯୋଗ ହୋଇଛି । ଆଉ ଏସବୁ ଦୁର୍ନୀତି ପଛରେ ସମବାୟ ସମିତିର ପୂର୍ବତନ ସମ୍ପଦକଙ୍କ ହାତ ଥିବା ଅଭିଯୋଗ କରିଛନ୍ତି ମୃତକଙ୍କ ସମ୍ପର୍କୀୟ ।
କେବଳ ମୃତ ଲୋକଙ୍କ ନାମରେ ଋଣ ଉଠିଛି ତା ନୁହେଁ ଆହୁରି ଏମିତି ଅନେକ ଚାଷୀ ଅଛନ୍ତି ଯେଉଁମାନଙ୍କ ଅଜାଣତାରେ ତାଙ୍କ ନାଁରେ ଲକ୍ଷାଧୀକ ଟଙ୍କାର ଋଣ କରାଯାଇଛି । ସବୁଠାରୁ ବଡ଼ କଥା ହେଉଛି ବର୍ଷ ବର୍ଷ ଧରି ଚାଷିଙ୍କ ଋଣ ବହି ସମ୍ପାଦକ ନିଜ ପାଖରେ ରଖୁଥିଲେ । ଏହାକୁ ଗୁରୁତର ସହ ନେଇଛନ୍ତି କେନ୍ଦ୍ରାପଡ଼ା ଜିଲ୍ଳାପାଳ । ଘଟଣାର ସତ ଜାଣିବା ପାଇଁ ଏକ ଟିମ୍ ଗଠନ କରି ତଦନ୍ତ ପାଇଁ ଉପଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ଜିଲାପାଳ ସମର୍ଥ ବର୍ମା ।
ଋଣ ନେଇନଥିବା ଗରିବ ଚାଷୀ କିଭଳି ଋଣ ସୁଝିବେ ତାହା ଏବେ ଚିନ୍ତାର ବିଷୟ ପାଲଟିଛି । ତୁରନ୍ତ ଏହାର ତଦନ୍ତ କରାଯାଇ ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ହେବା ସହ ଚାଷୀଙ୍କୁ ନ୍ୟାୟ ମିଳିବା ଅବଶ୍ୟକ ।