ଖୁଂଟୁଣୀ ଅନନ୍ତପୁର ଗାଁରେ ସାଇକେଲ ଦୁର୍ଘଟଣାକୁ ନେଇ ଗଣ୍ଡଗୋଳ ! ପ୍ରଜାକୋର୍ଟର ଅଜବ ନ୍ୟାୟ, ଗୋଟିଏ ପରିବାର ଗାଁରୁ ବାସନ୍ଦ
କନକ ବ୍ୟୁରୋ : କିଛି ଗାଁରେ ଏବେ ବି ଚାଲିଛି ମଧ୍ୟଯୁଗୀୟ ଶାସନ । କଥା କଥାକେ ସାମାଜିକ ବାସନ୍ଦ ହେଉଛନ୍ତି ଲୋକେ । ଆଦିବାସୀ ବହୁଳ ନବରଂଗପୁର କି ମାଲକାନଗିରି ନୁହେଁ, ଘଟଣା ଘଟିଛି ଉନ୍ନତ କଟକ ଜିଲ୍ଲାରେ । ଖୁଂଟୁଣୀ ଥାନା ଅନନ୍ତପୁର ଗାଁରେ ସାମାନ୍ୟ ସାଇକେଲ ଦୁର୍ଘଟଣାକୁ ନେଇ ଗୋଟିଏ ପରିବାରକୁ ନିଆଁ ପାଣି ବାସନ୍ଦ କରାଯାଇଛି । ଗତ ୬ ତାରିଖ ଦିନ ଗାଁ ସଭାପତି ବଟକିଶୋର ସେଠୀ ଓ ଗାଁର ଗୌରୀ ସାହୁଙ୍କ ପରିବାରର ଦୁଇ ପିଲାଙ୍କ ଭିତରେ ସାଇକେଲ ଦୁର୍ଘଟଣାକୁ ନେଇ ଗଣ୍ଡଗୋଳ ହୋଇଥିଲା । ପରେ ଏ ବିବାଦ ରାଜନୈତିକ ରୂପ ବି ନେଇଥିଲା ।
Kanak News is now on WhatsApp
Join and get latest news updates delivered to you via WhatsApp
ମନ୍ଦିରରେ ଉଭୟ ପକ୍ଷ ବସି ଆପୋଷ ସମାଧାନ କରିଥିଲେ ବି ପରେ ସଭାପତିଙ୍କ ସମର୍ଥକ, ଗୌରୀ ସାହୁଙ୍କ ଘରେ ପଶି ମାରଣାସ୍ତ୍ରରେ ଆକ୍ରମଣ କରିଥିଲେ । ଫଳରେ ଖୁଂଟୁଣୀ ଥାନାରେ ଅଭିଯୋଗ କରିଥିଲେ ଗୌରୀ । ଆଉ ପୋଲିସ ପାଖକୁ କାହିଁକି ଗଲେ ବୋଲି ଗାଁ ସଭାପତି ପ୍ରଜାକୋର୍ଟ ବସାଇ ତାଙ୍କ ପରିବାରରକୁ ବାସନ୍ଦ କରିଛନ୍ତି । ଏପରିକି ଗାଁରେ ଡେଙ୍ଗୁରା ବଜାଇ ଏ ସଂପର୍କରେ ଘୋଷଣା ମଧ୍ୟ କରାଯାଇଛି । ଗୌରୀଙ୍କ ପରିବାରକୁ ନିଆଁପାଣି ବନ୍ଦ କରାଯାଇଥିବା ବେଳେ ଦୋକାନୀ ବି ତାଙ୍କୁ ସଉଦା ନଦେଇ ଫେରାଇ ଦେଇଛନ୍ତି । ୫ହଜାର ଟଙ୍କା ଜୋରିମାନା ଦେଲେଗୌରୀଙ୍କ ପରିବାର ଗାଁରେ ମିଶିବେ ବୋଲି ରାୟ ଶୁଣାଇ ଦେଇଛନ୍ତି ସଭାପତି ।