ଦ୍ବିତୀୟ ପର୍ଯ୍ୟାୟରେ ଆରମ୍ଭ ହେବ ପରୀ ଅଭିଯାନ ! ମୁଖ୍ୟତଃ ସ୍ବୟଂ ସହାୟକ ଗୋଷ୍ଠୀର ସଦସ୍ୟମାନଙ୍କୁ ସାମିଲ୍ କରାଯିବାକୁ ଯୋଜନା
କନକ ବ୍ୟୁରୋ : ପରୀ ପାଇଁ କଥାଟିଏ ଅଭିଯାନରେ ଲୋକମାନଙ୍କ ବ୍ୟାପକ ଅଂଶ ଗ୍ରହଣ ଓ ଆଗ୍ରହକୁ ଲକ୍ଷ୍ୟ ରଖି ପୁଣି ଥରେ ଦ୍ବିତୀୟ ପର୍ଯ୍ୟାୟ ପରୀ-୨ ଅଭିଯାନ ପରିକଳ୍ପନା କରିଛନ୍ତି ରାଜ୍ୟ ସରକାର । ଦ୍ବିତୀୟ ପର୍ଯ୍ୟାୟରେ ୧୮ ବର୍ଷ ବୟସ୍କ ପିଲାଙ୍କ ନରାପଦ ଓ ସୁରକ୍ଷିତ ସାମାଜିକ ପରିବେଶ ସୃଷ୍ଟି ନିମନ୍ତେ ଦୀର୍ଘସୂତ୍ରୀ ଏକାଭିମୁଖୀ କାର୍ଯ୍ୟକ୍ରମ ଯୋଜନା ପ୍ରସ୍ତୁତ ହୋଇଛି । ଶିଶୁ ଅଧିକାର, ଶିଶୁଶ୍ରମ ନିରୋଧ, ବାଲ୍ୟ ବିବାହ ନିରୋଧ, ଶିଶୁ ଶକ୍ଷା, ସ୍ବାସ୍ଥ୍ୟ ସମନ୍ବିତ ବିକାଶ, ବାଳ ଅପରାଧ ନ୍ୟାୟ ଆଇନ ସମ୍ପର୍କିତ ବିଭିନ୍ନ କାର୍ଯ୍ୟକ୍ରମ, ଯୋଜନା, ବିଭାଗ ଓ ସଂସ୍ଥା ଓ ଅନୁଷ୍ଠାନମାନଙ୍କୁ ସାମିଲ୍ କରି ଏହି କାର୍ଯ୍ୟ ଯୋଜନା ପ୍ରସ୍ତୁତ ହେବ । ଦ୍ବିତୀୟ ପର୍ଯ୍ୟାୟରେ ମୁଖ୍ୟତଃ ସ୍ବୟଂ ସହାୟକ ଗୋଷ୍ଠୀର ସଦସ୍ୟମାନଙ୍କୁ ସାମିଲ୍ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ଏଥିରେ ୧୮ ବର୍ଷରୁ କମ୍ ଝିଅଙ୍କୁ ବୋହୂ କରି ନ ଆଣିବା, ଶିଶୁ ଶ୍ରମିକ ନିଯୁକ୍ତ ନ କରିବା ଓ ଶିଶୁ ଯୌନ ନିର୍ଯାତନା ପୂର୍ଣ୍ଣ ନିରୋଧ କରିବା ପାଇଁ ଶପଥ ନେଇ କାର୍ଯ୍ୟ କରିବେ । ଏହି ଅଭିଯାନରେ ରାଜ୍ୟର ପ୍ରାୟ ୧.୫ କୋଟି ବାଳକ ବାଳିକା ଉପକୃତ ହେବେ । ଅଭିଯାନକୁ ଅଧିକ ପ୍ରଭାବଶାଳୀ କରିବାକୁ ରାଜ୍ୟ ସରକାରଙ୍କ ମହିଳା ଓ ଶିଶୁ ବିକାଶ, ପଞ୍ଚାୟତରାଜ, ଶ୍ରମ, ବିଦ୍ୟାଳୟ ଓ ଗଣଶିକ୍ଷା, ସଂସ୍କୃ୍ତି, କ୍ରୀଡ଼ା ଓ ଯୁବ କଲ୍ୟାଣ ବିଭାଗର ଅଧିକାରୀମାନେ ପୁଲିସ ସହିତ ମିଶି ଶିବିର ଆୟୋଜନ କରିବେ ବୋଲି ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ ନିର୍ଦେଶ ଦେଇଛନ୍ତି । ଏଥିପାଇଁ ମୁଖ୍ୟ ଶାସନ ସଚିବ ଶ୍ରୀ ପାଢ଼ୀଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ସଚିବାଳୟରେ ଅନୁଷ୍ଠିତ ହୋଇ ଯାଇଛି ।
ସୂଚନା ଥାଉକି, ଚଳିତ ବର୍ଷ ମେ ମାସରୁ ଜୁନ ମାସ ପର୍ଯ୍ୟନ୍ତ ସାରା ରାଜ୍ୟରେ ପରୀ ପାଇଁ କଥାଟିଏ ଅନୁଷ୍ଠିତ ହୋଇଥିଲା । ଏଥିରେ ୧୫ଟି ପରୀ ଏକ୍ସପ୍ରେସ ୧୫ ଦିନ ଧରି ରାଜ୍ୟର ୩୦ ଜିଲ୍ଲାର ବିଭିନ୍ନ ଗ୍ରାମ ଓ ସହରାଞ୍ଚଳ ବୁଲିଥିଲେ । ଶିଶୁ ଯୌନ ନିର୍ଯାତନା ବିରୋଧରେ ବ୍ୟାପକ ଜନସଚେତନତା ସୃଷ୍ଟି ଅଭିଯାନ ମୂଖ୍ୟ ଲକ୍ଷ୍ୟ ଥିଲା ।